ប៉ូលីសក្នុងប្រទេសនេប៉ាល់បានចាប់ខ្លួនអតីតប្រធានសភានេប៉ាល់ ឈ្មោះ Krishna Bahadur Mahara ក្រោយពេលបុគ្គលិកស្រីម្នាក់ចោទប្រកាន់គាត់ពីបទចាប់រំលោភ។
ការចាប់ខ្លួនត្រូវបានធ្វើឡើង ក្រោយពេលតុលាការក្នុងរដ្ឋធានី Kathmandu ចេញដីការឲ្យចាប់ខ្លួនលោក Krishna Bahadur Mahara ដែលទើបតែបានលាលែងពីដំណែងនៅថ្ងៃអង្គារកន្លងទៅ។
លោកបានបដិសេធការចោទប្រកាន់នោះ។
បុគ្គលិកស្រីនោះបានចោទប្រកាន់លោកថា បានបំពានលើរូបនាងនៅផ្ទះរបស់នាងកាលពីថ្ងៃអាទិត្យមុន។
នាងបាននិយាយថា អ្នកនយោបាយខាងលើបានមកផ្ទះរបស់នាងទាំងស្រវឹងជោកជាំ មុនពេលគាត់បានបំពានលើរូបនាង។
ស្រ្តីខាងលើថ្លែងបន្តថា “ខ្ញុំមិនបានគិតថា វាកើតឡើងដូច្នោះសោះ។ គាត់បានពោបពីលើខ្ញុំ ហើយគាត់បានចាកចេញ ក្រោយពេលខ្ញុំនិយាយថា ខ្ញុំនឹងតេប្រាប់ប៉ូលីស”។
សូមបញ្ជាក់ថា លោក Krishna Bahadur Mahara គឺជាប្រធានអ្នកសម្របសម្រួលរបស់គណបក្សកុម្មុនិស្តនេប៉ាល់ ក្នុងកំឡុងពេលកិច្ចចរចាសន្តិភាព ដែលបានបញ្ចប់សង្រ្គាមស៊ីវិលកាលពីឆ្នាំ ២០០៦។
លោកត្រូវបានជ្រើសតាំងឲ្យក្លាយជាប្រធាសភា ក្រោយពេលក្រុមសម្ព័ន្ធ និងបក្សកុម្មុនិស្តនិយមកណ្តាល បានឈ្នះការបោះឆ្នោតភ្លូកទឹកភ្លូកដីកាលពីឆ្នាំ ២០១៧។
គាត់បានចុះចេញពីដំណែងកាលពីថ្ងៃអង្គារមុន ដោយគាត់បញ្ជាក់ថា គាត់ឲ្យមានការស៊ើបអង្កេតដោយយុត្តិធម៌ ចំពោះការចោទប្រកាន់ប្រឆាំងនឹងរូបគាត់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
