កម្មករកូរ៉េខាងជើងចំនួន ២០នាក់បានធ្លាក់ចូលទឹក ក្រោយពេលទូកនេសាទរបស់កូរ៉េខាងជើង បុកគ្នាជាមួយនឹងទូកយាមល្បាតរបស់ជប៉ុន នៅថ្ងៃចន្ទនេះ នៅសមុទ្រជប៉ុន។ នេះបើតាមការបញ្ជាក់របស់ឆ្មាំសមុទ្រជប៉ុន។
អ្នកនាំពាក្យឆ្មាំសមុទ្រជប៉ុនឈ្មោះ Kazuma Nohara បានថ្លែងប្រាប់ AFP ដូច្នេះថា “ពួកយើងបានបញ្ជូនទូកសង្រ្គោះ និងយន្តហោះទៅកាន់តំបន់កើតហេតុ ប៉ុន្តែពួកយើងមិនបានដឹងលម្អិតពីបញ្ហានោះទេ”។
ទូករបស់កូរ៉េខាងជើង ដែលត្រូវបានគេជឿជាជាទូកនេសាទ បានលេចភ្លាមៗក្រោយពេលហេតុការណ៍បុកគ្នា។ គេនៅមិនទាន់បានដឹងពីស្ថានភាពនៃមនុស្សដែលនៅលើទូកនោះនៅឡើយទេ។
ការបុកគ្នាកើតឡើងនៅដែនទឹកចម្ងាយប្រមាណ ៣៥០គីឡូម៉ែត្រពីឧបទ្វីប Noto នៃតំបន់ Ishikawa របស់ជប៉ុន។
អ្នកជំនាញបាននិយាយថា អ្នកនេសាទខ្លះមកពីកូរ៉េខាងជើង បានធ្វើដំណើរទៅកាន់ដែនទឹកឆ្ងាយៗ ដើម្បីចាប់ត្រីឲ្យបានច្រើន ដើម្បីផ្គាប់ចិត្តរដ្ឋាភិបាលកូរ៉េខាងជើង។ ទូកនេសាទត្រីរបស់កូរ៉េខាងជើង បានរសាត់អណ្តែកមកលើឆ្នេរជប៉ុនជារៀងរាល់ឆ្នាំ ដោយសារតែទូកបំពាក់ដោយឧបករណ៍ មិនសូវមានប្រសិទ្ធភាព ជាហេតុធ្វើឲ្យមានបញ្ហា និងការអស់ប្រេងជាដើម។
សូមបញ្ជាក់ថា កាលពីឆ្នាំ ២០១៨ ជនជាតិកូរ៉េខាងជើងចំនួន ១០នាក់ដែលរសាត់តាមទូកឈើដ៏តូចមកជប៉ុន ត្រូវបានជួយសង្រ្គោះ និងត្រូវបានបញ្ជូនត្រឡប់ទៅកាន់ប្រទេសពួកគេវិញ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia