មនុស្សចំនួន ៨នាក់ត្រូវបានតុលាការក្នុងប្រទេសវៀតណាម កាត់ទោសប្រហារជីវិតពីបទរត់ពន្ធនំគ្រឿងញៀនហេរូអ៊ីនចំនួន ៣៧៩នំ មានទម្ងន់ ១៣២គីឡូក្រាម និងគ្រឿងញៀនមេតំហ្វេតាមីនទម្ងន់ ៥៥គីឡូក្រាម។ នេះបើតាមប្រព័ន្ធផ្សព្វផ្សាយ ក្នុងប្រទេសចុះផ្សាយនៅថ្ងៃអង្គារម្សិលមិញនេះ។
កាលពីថ្ងៃចន្ទ តុលាការ ក្រុងហូជីមិញ បានអនុវត្តន៍ទោសទៅលើជនទាំង ៨នាក់ ដែលពួកគេ គឺជាសមាជិក នៃក្រុមដឹកជញ្ជូនគ្រឿងញៀនពីទីក្រុង Da Nang ទៅកាន់ភាគខាងត្បូងទីក្រុងហូជីមិញ។
មេខ្លោងនៃក្រុមនោះ ទទួលបានគ្រឿងញៀន ពីបុរសជនជាតិឡាវម្នាក់ នៅក្នុងទីក្រុង Da Nang បន្ទាប់មកគាត់ក៏ធ្វើការរត់ពន្ធបន្ត ទៅកាន់ទីក្រុងហូជីមិញ ដើម្បីយកឲ្យកូនចៅរបស់ខ្លួន។
ប៉ូលីសវៀតណាមកំពុងតាមប្រម៉ាញ់អ្នកផ្សេងទៀត ដាក់ជាប់ពាក់ព័ន្ធ នឹងឧក្រិដ្ឋជនខាងលើ។
បើតាមច្បាប់របស់វៀតណាម ជនទាំងឡាយណាដែលរត់ពន្ធគ្រឿងញៀន ប្រភេទហេរូអ៊ីនលើចំនួន ៦០០ក្រាម ឬច្រើនជាង ២,៥គីឡូក្រាម នៃប្រភេទថ្នាំមេតំហ្វេតាមីន នឹងត្រូវទទួលទោសប្រហារជីវិត។
ចំណែកអ្នកជួញដូរហេរូអ៊ីនចំនួន ១០០ក្រាម ឬ ៣០០ក្រាមនៃប្រភេទគ្រឿងញៀនផ្សេងៗទៀត ក៏អាចប្រឈមមុខ នឹងទោសប្រហារជីវិតផងដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua
