ស្រ្តីជនជាតិអ៊ីរ៉ង់ដែលជាអ្នកគាំទ្របាល់ទាត់ ត្រូវបានគេអនុញ្ញាតឲ្យចូលរួមទស្សនាការប្រកួតជាលើកដំបូងនៅក្នុងរយៈពេល ៤ទសវត្សរ៍ចុងក្រោយនេះ។ ការអនុញ្ញាតនេះកើតឡើង ក្រោយពេលស្ថាប័នបាល់ទាល់ FIFA បានគំរាមព្យួរប្រទេសអ៊ីរ៉ង់ដោយសារតែគោលនយោបាយរបស់ប្រទេសនេះ ដែលអនុញ្ញាតឲ្យតែប្រុសៗប៉ុណ្ណោះចូលទៅក្នុងពហុកីឡដ្ឋានបាន។
អ៊ីរ៉ង់បានហាមប្រាមស្រ្តីមិនឲ្យទស្សនាបាល់ទាត់ និងមិនឲ្យចូលទីលានបាល់ទាត់អស់រយៈពេល ៤០ឆ្នាំមកហើយ។
កាលពីខែមុន FIFA បានបញ្ជាឲ្យប្រទេសអ៊ីរ៉ង់អនុញ្ញាតឲ្យស្រ្តីចូលទៅក្នុងទីលានបាល់ទាត់បានដោយគ្មានការរឹតត្បិត។
ការដាក់បញ្ជានោះកើតឡើងក្រោយពេលអ្នកគាំទ្របាល់ទាត់ជាស្រ្តីម្នាក់ បានដុតសម្លាប់ខ្លួនឯង ដោយនាងភ័យខ្លាចថានឹងត្រូវគេយកទៅដាក់គុក ក្រោយពេលនាងបានស្លៀកពាក់ និងតុបតែងខ្លួនជាប្រុស ដើម្បីចូលរួមទស្សនាការប្រកួត។
ក្រោយពេលប្រកាសពីការអនុញ្ញាត ស្រ្តីជាច្រើនបានបានរួសរាន់ទិញសំបុត្រដើម្បីចូលរួមមើលការប្រកួតជម្រុះ World Cup ទល់នឹងក្រុមកម្ពុជា នៅពហុកីឡាដ្ឋាន Azadi នៅថ្ងៃព្រហស្បតិ៍ស្អែកនេះ។
សំបុត្រត្រូវបានលក់ដាច់អស់ក្នុងរយៈពេល ១ម៉ោង។ មន្រ្តីក្រសួងកីឡាអ៊ីរ៉ង់បាននិយាយថា កីឡាដ្ឋានដែលអាចផ្ទុកមនុស្សបាន ១០០.០០០នាក់ ត្រៀមខ្លួនរួចរាល់ដើម្បីផ្ទុកអ្នកទស្សនាជាស្រ្តីយ៉ាងច្រើន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia