ខេត្តស្វាយរៀង ៖ រង្វង់មូលរូបសំណាកគោ៤ជានិមិត្តសញ្ញាតំណាងឱ្យខេត្តស្វាយរៀងត្រូវរថយន្តយីឌុបភ្លៅ៥បុកប្រល័យគ្មានស្តាយស្រណោះបានបណ្តាលឱ្យរូបសំណាកសត្វគោ១ក្បាលក្នុងចំណោមរូបសំណាកសត្វគោទាំង៤បានបាក់កគួរឱ្យអណោចអធមជាពន់ពេកបង្កឱ្យមានការភ្ញាក់ផ្អើលដល់ប្រជាពលរដ្ឋដែលមានលំនៅឋានក្បែរនោះទាំងកណ្តាលរាត្រី។ ហេតុការណ៍នៃគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១និង៤៥នាទីរំលងអាធ្រាតឈានចូលថ្ងៃទី១០ខែតុលាឆ្នាំ២០១៩ស្ថិតនៅភូមិរូបគោសង្កាត់ព្រៃឆ្លាក់ក្រុងស្វាយរៀងខេត្តស្វាយរៀង។
តាមសាក្សីនៅកន្លែងកើតហេតុបានឱ្យដឹងថា:រថយន្តបង្កជាប្រភេទរថយន្តយីឌុបភ្លៅ៥ពាក់ស្លាកលេខស្វាយរៀង3A0665 បើកបរពីទិសខាងលិចទៅកើតដោយបុរសម្នាក់ពុំស្គាល់អត្តសញ្ញាណ។ លុះមកដល់កន្លែងកើតហេតុរថយន្តបង្កក៍បានបុករូបសំណាកសត្វគោ១ក្នុងចំណោមរូបសំណាកសត្វគោទាំង៤ប៉ែកខាងត្បូងបានបណ្តាលឱ្យរូបសំណាកសត្វគោនោះបាក់កចំណែករថយន្តក៍បានរេចង្កូតបុកគ្រឹះរង្វង់មូលបណ្តាលឱ្យបែកកង់មុខប៉ែកខាងខាងឆ្វេងរេចង្កូតបន្តទៅបុករបងទ្វាររបស់គ្រឹះស្ថានមីក្រូហិរញ្ញវត្ថុ lolcតែសំណាងល្អពុំបានបណ្តាលឱ្យមានអ្នករងរបួសរឺក៍ស្លាប់ដោយសារករណីគ្រោះថ្នាក់ចរាចរណ៍ខាងលើនេះទេ។
ប្រភពដដែលបានឱ្យដឹងទៀតថាៈក្រោយកើតខាងសមត្ថកិច្ចដែលនៅប្រចាំការត្រង់ចំណុចរូបសំណាកសត្វគោ៤ខាងលើបានជួយធ្វើការសម្រួលចរាចរណ៍ព្រមទាំងបានធ្វើការទំនាក់ទំនងទៅខាងអគ្គិសនីខេត្តដើម្បីយករថយន្តស្ទួចមកស្ទួចយករថយន្តខាងលើឱ្យសមត្ថកិច្ចយកទៅរក្សាទុកចាត់ការបន្តទៅតាមផ្លូវច្បាប់។
សាក្សីខាងលើបានបន្ថែមទៀតថា៖ នៅត្រង់ចំណុចរូបសំណាកសត្វគោ៤នេះគឺ:ឧស្សាហ៍ជួបប្រទះនូវគ្រោះថ្នាក់ចរាចរណ៍ណាស់សង្ស័យអាចបណ្តាលមកពីអ្នកបើកបរងងុយដេកផងនិងមកពីទីនោះមានសភាពងងឹតព្រោះអំពូលភ្លើងបំភ្លឺផ្លូវខ្លះបានដាច់ស្ទើរអស់ទៅហើយទើបបណ្តាលឱ្យមានគ្រោះថ្នាក់ដូច្នេះ ៕ ដោយ ៖ វ៉ៃកូ