ខេត្តព្រះសីហនុ៖ កម្លាំងសមត្ថកិច្ចនគរបាលខេត្តព្រះសីហនុ បានឲ្យដឹងថា កាលពីយប់មិញវេលាម៉ោង ៨ និង ៤៥នាទី យប់ថ្ងៃទី៩ ខែតុលា មានករណីប្រើហិង្សា១ករណី បង្កឡើងដោយជនជាតិចិន នៅចំណុចផ្ទះជួល ម្តុំឧតុនិយមភូមិ ៣សង្កាត់លេខ៣ ក្រុង-ខេត្តព្រះសីហនុ។
សមត្ថកិច្ចនគរបាលខេត្តព្រះសីហនុ បញ្ជាក់ថា ករណីហិង្សាខាងលើនេះ បង្កឡើងដោយជនជាតិចិនចំនួន ៦នាក់ បានយកដំបងដេញវាយគ្នាទៅលើជនជាតិចិនដូចគ្នា (មិនទាន់ដឹងមូលហេតុ) ។
ក្រោយពេលកើតហេតុ កម្លាំងចម្រុះគណៈបញ្ជាការឯកភាពខេត្តព្រះសីហនុ មានកម្លាំងកងរាជអាវុធហត្ថ និងនគរបាល ក៏ចុះទៅដល់កន្លែងកើតហេតុ និងបានឃាត់ខ្លួនជនសង្ស័យ ៦នាក់បញ្ជូនទៅកាន់ស្នងការនគរបាលខេត្តព្រះសីហនុ ដើម្បីសាកសួរ និងដោះស្រាយតាមនីតិវិធី៕ ដោយ៖ ដែន សីមា
