ខេត្តស្វាយរៀងៈ លោក សក់ សេដ្ឋា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ នាព្រឹកថ្ងៃព្រហស្បតិ៍ ទី១០ ខែកញ្ញា ឆ្នាំ២០១៩នេះ បានអញ្ជើញជាអធិបតី នៅក្នុងពិធីប្រកាសចូលកាន់មុខតំណែងលោក សេង សិលា ជាអភិបាលរង នៃគណៈអភិបាលខេត្តស្វាយរៀង ។
ពិធីនេះក៏មានការអញ្ជើញចូលរួមផងដែរ ពីសំណាក់លោកម៉ែន វិបុល អភិបាល នៃគណៈអភិបាលខេត្តស្វាយរៀង លោក ជុំ ហាត ប្រធានក្រុមប្រឹក្សាខេត្ត ព្រមទាំងមានអញ្ជើញចូលរួមពីអស់លោកលោកស្រីជា ប្រតិភូក្រសួងមហាផ្ទៃ ព្រមទាំងអស់លោក លោកស្រីជាអភិបាលរងខេត្ត សមាជិកក្រុមប្រឹក្សាខេត្ត លោក លោកស្រីប្រធានមន្ទីរ អង្គភាព កងកម្លាំងទាំង៣ប្រភេទ លោកអភិបាលក្រុង/ស្រុក មេឃុំ ចៅសង្កាត់ ប៉ុស្តិ៍រដ្ឋបាល និងលោក លោកស្រីជាមន្ត្រីរាជការជាច្រើនរូបទៀត។
លោក ម៉ែន វិបុល អភិបាលខេត្តស្វាយរៀង បានសម្តែងនូវការស្វាគមន៍ និងថ្លែងអំណរគុណចំពោះលោករដ្ឋលេខាធិការ និងគណៈប្រតិភូក្រសួងមហាផ្ទៃ ដែលបានផ្ដល់កិត្តិយសអញ្ជើញជាអធិបតី និងចូលរួមនៅថ្ងៃនេះ និងបានបង្ហាញជូនពីលទ្ធផលការងារសំខាន់ៗ ដែលរដ្ឋបាលខេត្តសម្រេចបាននាពេលកន្លងមក រួមទាំងការអភិវឌ្ឍសេដ្ឋកិច្ចសង្គម ការផ្ដល់សេវាសាធារណៈ ការកសាងហេដ្ឋារចនាសម្ព័ន្ធរូបវ័ន្ត និងការថែរក្សាសន្តិសុខ សុវត្ថិភាព សណ្ដាប់ធ្នាប់សាធារណៈ ក្នុងខេត្តស្វាយរៀងជាដើម។
លោក សក់ សេដ្ឋា រដ្ឋលេខាធិការក្រសួងមហាផ្ទៃ បានថ្លែងនូវការកោតសរសើរ និងវាយតម្លៃខ្ពស់ ចំពោះក្រុមប្រឹក្សាខេត្ត គណៈអភិបាលខេត្ត អាជ្ញាធរពាក់ព័ន្ធគ្រប់លំដាប់ថ្នាក់ ដែលបានរួមសាមគ្គីសហការគ្នា ខិតខំប្រឹងប្រែងយ៉ាងសកម្ម ក្នុងការអនុវត្តស្របតាមកម្មវិធីនយោបាយ និងយុទ្ធសាស្រ្តចតុកោណ របស់រាជរដ្ឋាភិបាលកម្ពុជា ដោយបានជំរុញការអភិវឌ្ឍខេត្តឲ្យមានការរីកចម្រើនលើគ្រប់វិស័យ និងរក្សាបាននូវសន្តិសុខសណ្ដាប់ សាធារណៈបានល្អប្រសើរ នាពេលកន្លងមក។
លោករដ្ឋលេខាធិការ ក៏បានផ្តាំផ្ញើដល់រដ្ឋបាលខេត្ត និងអាជ្ញាធរពាក់ព័ន្ធគ្រប់លំដាប់ថ្នាក់ នូវចំណុចសំខាន់ៗមួយចំនួនដូចជា៖
១- ត្រូវពង្រឹងសន្តិភាព ស្ថិរភាពនយោបាយ និងទប់ស្កាត់ឲ្យបាននូវបដិវត្តន៍ពណ៌ ដែលជាសកម្មភាពមិនស្របច្បាប់ មិនស្របតាមគោលការណ៍លទ្ធិប្រជាធិបតេយ្យ សេរី ពហុបក្ស នៅកម្ពុជា។ ២- ត្រូវពង្រឹងសន្តិសុខ សណ្តាប់ធ្លាប់សាធារណៈ សុវត្ថិភាពសង្គម និងត្រូវប្រកាន់ភ្ជាប់នូវការអនុវត្តគោលនយោបាយ ភូមិឃុំមានសុវត្ថិភាព។ ៣- ការគ្រប់គ្រង ការអភិវឌ្ឍនៅតាមតំបន់ព្រំដែន ដូចពង្រឹងកិច្ចសហប្រតិបត្តិការល្អ ជាមួយអាជ្ញាធរ នៃប្រទេសជិតខាងបន្ថែមទៀត ក្នុងការការពារសន្តិសុខសណ្តាប់ធ្នាប់ នៅតាមតំបន់ព្រំដែន ឲ្យក្លាយទៅជាព្រំដែនសន្តិភាព និងការអភិវឌ្ឍ។ ៤- ត្រូវយកចិត្តទុកដាក់អនុវត្តការងារ កំណែទម្រង់ វិមជ្ឈការ និងវិសហមជ្ឈការ ដែលទាមទាឲ្យមានការចូលរួមពីគ្រប់ភាគីពាក់ព័ន្ធ។ ៥- ត្រូវរួមគ្នាបន្តពង្រឹងការផ្តល់សេវាសាធារណៈ និងការដោះស្រាយបញ្ហាប្រឈមនានានៅក្នុងមូលដ្ឋាន។ ៦- រដ្ឋបាលដែនដី គ្រប់លំដាប់ថ្នាក់ត្រូវបន្តពង្រឹង របៀបរបបធ្វើការងារ រួមមានការទំនាក់ទំនង សាមគ្គីភាព ឯកភាពផ្ទៃក្នុងឲ្យបានល្អ និងការអនុវត្តនូវតួនាទីភារកិច្ច របស់ស្ថាប័ន អង្គភាពនីមួយៗ។
សូមបញ្ជាក់ថា យោងតាមអនុក្រឹត្យលេខ១១១៤ អនក្រ.តត ចុះថ្ងៃអង្គារ៥រោច ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២០ ខែសីហា ឆ្នាំ២០១៩ ត្រូវបានតែងតាំងអតីតអភិបាលក្រុងបាវិត លោក សេង សិលា ឋានន្តរស័ក្តិវរមន្ត្រីថ្នាក់លេខ៦ ឲ្យកាន់មុខតំណែង ជាអភិបាលរង នៃគណៈអភិបាលខេត្តស្វាយរៀង៕ដោយ៖វ៉ៃកូ