សៀមរាប ៖ សមត្ថកិច្ចខេត្តសៀមរាបឃាត់ខ្លួនជនសង្ស័យ ០២នាក់ ករណី អំពើលួចមានស្ថានទម្ងន់ទោស (ឆក់កាបូប) នៅថ្ងៃទី១០ ខែ តុលា ឆ្នាំ២០១៩ ។ ជនសង្ស័យចំនួន ០២នាក់ ១. ឈ្មោះ ហេង ភារុណ ភេទប្រុស អាយុ ១៨ឆ្នាំ មុខរបរសិស្ស ទីលំនៅបច្ចុប្បន្ន ភូមិតាភុល សង្កាត់ស្វាយដង្គុំ ក្រុង/ខេត្តសៀមរាប ។ ២. ឈ្មោះ គីម លឿង ភេទប្រុសអាយុ ១៩ឆ្នាំ មុខរបរកម្មករសំណង់ មានទីលំនៅ ស្នាក់នៅបណ្ដោះអាសន្នភូមិតាភុល សង្កាត់ស្វាយដង្គុំ ក្រុង/ខេត្តសៀមរាប ពាក់ព័ន្ធនិងករណី អំពើលួចមានស្ថានទម្ងន់ទោស (ឆក់ការបូប)។
លោកឧត្តមសេនីយ៍ត្រី ភឹង ចិន្តារ៉េត ស្នងការរងនគរបាលខេត្តសៀមរាប ទទួលបន្ទុកផ្នែកព្រហ្មទណ្ឌ បានឲ្យដឹងថា នៅថ្ងៃទី៩ ខែតុលា ឆ្នាំ២០១៩ វេលាម៉ោង ១៥និង១០នាទីនៅចំណុច ខាងត្បូងការ៉ាសសាំង ភូមិខ្នារ សង្កាត់ជ្រាវ ចម្ងាយប្រហែល ១០០ ម៉ែត្រ មានករណី អំពើលួចមានស្ថានទម្ងន់ទោស (ឆក់កាបូប) បង្កឡើងដោយជនសង្ស័យចំនួន ២នាក់ដែលមានឈ្មោះខាងលើ បានជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ ផលិតឆ្នាំ២០១៨ បិទតែម ២០១៥ គ្មានផ្លាកលេខ គ្មានកញ្ចក់ គ្មានកន្ត្រក និងកុងទ័រ ដែលមានលេខតួលេខនិងលេខម៉ាស៊ីន ៥៤០៤៩០១ បានធ្វើសកម្មភាពឆក់កាបូបប្រាក់ពណ៌ផ្កាឈូក ពីជនរងគ្រោះឈ្មោះ យី ចន្ថា ភេទស្រី អាយុ ២៩ឆ្នាំ រស់នៅភូមិតាចេក សង្កាត់ជ្រាវ ក្រុង/ខេត្តសៀមរាបដោយក្នុងកាបូបមាន ប្រាក់រៀលចំនួន ១២ ម៉ឺនរៀល ទូរស័ព្ទម៉ាក oppo A៧១k ខ្សែកផ្លាកទីន ចំនួន៣ខ្សែ កងដៃ ផ្លាកទីន ចំនួន ២កង និងចិញ្ចៀនមួយវង់ ផ្លាកទីន ដាំត្បូង ។
ក្រោយពីជនសង្ស័យទាំងពីរបានធ្វើសកម្មភាពឆក់កាបូបបានសម្រេច ក៏ជិះគេចខ្លួនសំដៅទៅផ្លូវកុងស៊ី ក្នុងភូមិខាងលើហើយ ជនរងគ្រោះក៏បានជិះម៉ូតូដេញតាមពីក្រោយ ហើយស្រែកឆោឡោឲ្យជួយចាប់ចោរ លុះដល់ចំណុចក្រុមទី១០ ភូមិខ្នារ សង្កាត់ជ្រាវ ក្រុង/ខេត្តសៀមរាប ម៉ូតូរបស់ជនសង្ស័យបានរលត់ ត្រូវហើយកម្លាំងប៉ុស្តិ៍ នឹងប្រជាការពារភូមិខ្នារដែលកំពុងល្បាត រួមទាំងប្រជាពលរដ្ឋនៅក្បែរនោះ បានចាប់ខ្លួនជនសង្ស័យខាងលើ ហើយនាំយកមកសួរនាំនៅប៉ុស្តិ៍នគរបាលរដ្ឋបាល សង្កាត់ជ្រាវតែម្ដង ក្រោយពីសួរនាំជនសង្ស័យខាងលើបានសារភាពថា ខ្លួននឹងបក្ខពួកពិតជាបានធ្វើសកម្មភាពឆក់កាបូបរបស់ជនរងគ្រោះពិតមែន រីឯជនសង្ស័យឈ្មោះហេង ភារុណ ហៅ យក់ ក៏បានសារភាពផងដែរថា កាលពីថ្ងៃទី១៣ ខែកញ្ញា ឆ្នាំ២០១៩ វេលាម៉ោង១៤:០០នាទី ខ្លួនបានធ្វើសកម្មភាពឆក់កាបូបប្រជាពលរដ្ឋ នៅភូមិបុស្សក្រឡាញ់ សង្កាត់ជ្រាវ ហើយយើងក៏បានទទួលបណ្តឹងពីជនរងគ្រោះរួចផងដែរ។
បច្ចុប្បន្នសមត្ថកិច្ចកំពុងរៀបចំសំណុំរឿងបញ្ជូនទៅសាលាដំបូងចាត់ការបន្តតាមនីតិវិធីច្បាប់៕ ដោយ៖បញ្ញាស័ក្តិ