ខេត្តព្រះសីហនុ៖ រដ្ឋបាលខេត្តព្រះសីហនុ នៅថ្ងៃទី១០ ខែតុលា ឆ្នាំ២០១៩នេះ បានបើកកិច្ចប្រជុំស្តីពីការធ្វើបទបង្ហាញ របស់កំពង់ផែស្វយ័តក្រុងព្រះសីហនុ ដោយមានការចូលរួមពី មន្ត្រីថ្នាក់ដឹកនាំមន្ទីរស្ថាប័នពាក់ព័ន្ធ ក្រោមឱវាទរដ្ឋបាល ខេត្តព្រះសីហនុ ។
នៅក្នុងកិច្ចប្រជុំនោះ លោក លូ គឹមឈន់ ប្រតិភូរាជរដ្ឋាភិបាល និងជាអគ្គនាយកកំពង់ផែស្វយ័ត ក្រុងព្រះសីហនុ បានឡើងធ្វើបទបង្ហាញ ពីសកម្មភាពការងារ របស់កំពង់ផែជាបម្តបន្ទាប់មកនេះ។
លោក លូ គឹមឈន់ បញ្ជាក់ថា កំពង់ផែស្វយ័តក្រុងព្រះសីហនុ បានចាប់ផ្តើមសាងសង់ នៅឆ្នាំ១៩៥៣ ពេលប្រទេសជាតិទទួលបានឯករាជ្យ និងដាក់ឱ្យដំណើរការនៅឆ្នាំ១៩៦០។ ហើយថា មកដល់បច្ចុប្បន្ននេះ កំពង់ផែទទួលបានដៃគូរវិនិយោគពីជប៉ុន JICA ដើម្បីអភិវឌ្ឍន៍ផែ ក្នុងជំហានទី៣,៤,៥,៦ និង៧ ចំពោះជម្រៅទឹកមិនជាបញ្ហាទៀតទេ។
លោក លូ គឹមឈន់ បន្តថា កំពង់ផែស្វយ័តក្រុងព្រះសីហនុ មានសេវាកម្មនាំនាវាចេញ ចូល សេវាស្តុកទំនិញ សេវាតំបន់សេដ្ឋកិច្ចពិសេស និងសេវាកម្មមូលដ្ឋានផ្គត់ផ្គង់។
ចំពោះបរិមាណទំនិញឆ្លងកាត់ ២០១៨ បសនកើន២២ភាគរយ ហើយការនាំចូលច្រើនជាងកានាំចេញ។ ក្នុងនោះមានបរិមាណកុងតឺន័រឆ្លងកាត់ក្នុងឆ្នាំ២០១៨ ធៀបនឹង២០១៧ បានកើន ១៧.៧ភាគរយ។
លោក លូ គឹមឈន់ ឲ្យដឹងដូច្នេះ រួចបញ្ជាក់ថា ៩ខែដើមឆ្នាំ២០១៩នេះ ទំនិញឆ្លងកាត់កំពង់ផែនេះ បានកើន ១៨ភាគរយ បើប្រៀបធៀប ៩ខែ ឆ្នាំ២០១៨ ដោយបានកើនខ្លាំងក្នុងរយ:ពេល ៣ខែចុងក្រោយនេះ។
ទន្ទឹមគ្នានេះ លោក លូ គឹមឈន់ ក៏បានលើកឡើងពីបញ្ហាប្រឈម គឺកំពង់ផែនេះ បានចាប់ផ្តើមស្ទះបណ្តើរៗ ព្រោះផែស្វយ័តក្រុងព្រះសីហនុនេះ អាចផ្ទុកកុងតឺន័របាន ១៣.០០០ស៊ីអីយូ ដោយសារតែតម្លៃជួលដីខាងក្រៅថ្លៃ និងស្ទះចរាចរណ៍ផ្លូវជាតិលេខ ៤ផង ជាដើមហេតុនាំឲ្យ កុងតឺន័រមួយចំនួនមិនអាចយកចេញបានទេ និងបានឡើងរហូត ២៧.០០០ស៊ីអីយូ ពោលគឺពេញបរិវេណកំពង់ផែតែម្តង។
យ៉ាងនេះក្តី លោក លូ គឹមឈន់ អគ្គនសយកកំពង់ផែស្វយ័តកហរុងព្រះសីហនុ ថ្លែងថា លោកមានមោទនភាព ដែលទំនិញឆ្លងកាត់កំពង់ផែនេះមានការកើន ឡើងជាបន្តបន្ទាប់។
ចំណែក លោក គួច ចំរើន អភិបាលខេត្តព្រះសីហនុ បានស្តាប់បាយការណ៍វឌ្ឍនភាព កំពង់ផែស្វយ័តក្រុងព្រះសីហនុ ដែលមានសក្តានុពលទាក់ទាញអ្នកវិនិយោគិន ដើម្បីបង្ហាញដៃគូវិនិយោគ ដើម្បីយើងមានមូលដ្ឋានក្នុងការចែលរំលែកព័ត៌មានទៅដៃគូ របស់វិនិយោគិន អំពីសកម្មភាពនានា ក្នុងប្រតិបត្តិការ របស់កំពង់ផែនាពេលបច្ចុប្បន្ន។
ព្រមជាមួយគ្នានេះ លោក អភិបាល ក៏បាន កោតសរសើរដល់ថ្នាក់ដឹកនាំកំពង់ផែស្វយ័តក្រុងព្រះសីហនុ ជាពិសេសលោកបានបានជួបជាមួយបុគ្គលិក កម្មករកំពង់ផែទាំងអស់ ដែលបានខិតខំបំពេញការងារ ជម្រុញឱ្យកំពង់ផែនេះ ទទួលបានទំនិញ ឆ្លងកាត់មានការកើនឡើងជាបន្តបន្ទាប់។
ផ្តើមពីបញ្ហានេះ លោក គួច ចំរើន អភិបាលខេត្តព្រះសីហនុ រំពឹងថា នៅឆ្នាំខាងមុខៗទៀត កំពង់ផែស្វយ័តក្រុងព្រះសីហនុ នឹងអាចទាក់ទាញ ទំនិញឆ្លងកាត់បានកាន់តែច្រើនទៀត៕ ដោយ៖ ដែន សីមា