សមាជិកចំនួន ២៩រូបមកពីបក្សសាធារណរដ្ឋក្នុងសភាតំណាងរាស្ត្រ បានប្រកាសពីគម្រោងធ្វើច្បាប់ដាក់ទណ្ឌកម្មលើប្រទេសតួកគីក្រោយពេលប្រទេសនេះបានធ្វើការវាយទៅលើកងកម្លាំងសម្ព័ន្ធមិត្តរបស់អាមេរិចនៅក្នុងប្រទេសស៊ីរី។
សមាជិសភាម្នាក់ឈ្មោះ Liz Cheney បានថ្លែងថា ប្រទេសតួកគីត្រូវប្រឈមនឹងផលវិបាកចំពោះការវាយប្រហាររបស់ខ្លួនទៅលើកងកម្លាំង Kurd ដែលជាសម្ព័ន្ធមិត្តរបស់ពួកយើង។
ការប្រកាសពីគម្រោងដាក់ទណ្ឌកម្មនោះកើតឡើង ក្រោយពេលប្រធានាធិបតីអាមេរិដូណាល់ ត្រាំ បាននិយាយថា គាត់សង្ឃឹមថានឹងធ្វើការសម្របសម្រួលទំនាស់។
កងកម្លាំងរបស់តួកគីបានផ្លាស់ទីចូលក្នុងប្រទេសស៊ីរីភាគខាងជើងកាលពីថ្ងៃពុធកន្លងទៅនេះ ក្រោយពេលលោក ដូណាល់ ត្រាំបានដកទ័ពចេញពីតំបន់នោះ។
ជនស៊ីវិលរាប់ពាន់នាក់បានភៀសខ្លួនចេញពីផ្ទះសម្បែងពួកគេ នៅថ្ងៃទី ២នៃការវាយប្រហាររបស់តួកគី។
អ្នករិះគន់និយាយថា ការដកទ័ពអាមេរិចចេញបានផ្តល់ភ្លើងបៃតងដល់តួកគីក្នុងការចាប់ផ្តើមការវាយប្រហាររបស់ខ្លួននៅតាមតំបន់ព្រំដែន ដែលប្រធានាធិបតីតួកគីលោក Recep Tayyip Erdogan និយាយថា ការវាយប្រហារគឺដើម្បីបង្កើតតំបន់សុវត្ថិភាពតាមបណ្តោយព្រំដែនប្រវែង ៤៨០គីឡូម៉ែត្រជាមួយនឹងស៊ីរី។
កងកម្លាំងរបស់ Kurd នៃកងកម្លាំងប្រជាធិបតេយ្យស៊ីរី បានគ្រប់គ្រងតំបន់ឆ្លងព្រំដែន ប៉ុន្តែក្រុមនេះ ត្រូវបានតួកគីហៅថាជាក្រុមភេរវជន ដែលបានគាំទ្រក្រុមប៉ះបោរប្រឆាំងតួកគី។
សូមបញ្ជាក់ថា កងកម្លាំងប្រជាធិបតេយ្យស៊ីរី ជាសម្ព័ន្ធមិត្តរបស់អាមេរិចជាយូរមកហើយ ក្នុងការប្រយុទ្ធប្រឆាំងទៅនឹងក្រុមរដ្ឋអ៊ីរស្លាម (IS) ប៉ុន្តែក្រុមនេះបាននិយាយថា ពួកគេត្រូវបានអាមេរិចចាក់ពីក្រោយខ្នង ក្រោយពេលតួកគីវាយប្រហារលើ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC