កម្មវិធីផែនទីដែលក្រុមបាតុករហុងកុងប្រើប្រាស់ដើម្បីចាប់ទីតាំងរបស់ប៉ូលីស ត្រូវបានក្រុមហ៊ុន Apple សម្រេចចិត្តដកចេញ ក្រោយពេលមានការត្អូញត្អែរពីសំណាក់ប្រជាជនជាច្រើននៅហុងកុង។
Apple បាននិយាយក្នុងសេចក្តីប្រកាសថ្ងៃព្រហស្បតិ៍ម្សិលមិញថា ខ្លួនបានដកចេញកម្មវិធី HKmap.live ពី App Store របស់ខ្លួន។ ការប្រើប្រាសកម្មវិធីនោះធ្វើឲ្យប៉ះពាល់ដល់ការពង្រឹងច្បាប់ និងប្រជាជននៅក្នុងទីក្រុងហុងកុង។
ក្រុមហ៊ុននិយាយទៀតថា “កម្មវិធីនោះបានបង្ហាញពីទីតាំងរបស់ប៉ូលីស ហើយពួកយើងបានធ្វើការបញ្ជាក់ជាមួយនឹងអាជ្ញាធរហុងកុងថា កម្មវិធីត្រូវបានប្រើប្រាស់ដើម្បីចាប់គោលដៅ និងស្ទាក់ប៉ូលីស គំរាមកំហែងដល់សុវត្ថិភាពសាធារណៈ ហើយឧក្រិដ្ឋជនបានប្រើប្រាស់វាដើម្បីធ្វើបាបប្រជាជនក្នុងតំបន់’។
“កម្មវិធីបានរំលោភគោលការណ៍របស់ពួកយើង និងច្បាប់នៅតំបន់ ហើយពួកយើងក៏បានលុបវាចេញពី App Store”។ នេះជាការបញ្ជាក់របស់ Apple។
សូមបញ្ជាក់ថា ទីក្រុងហុងកុងត្រូវបានញាំញីដោយការតវ៉ាអស់រយៈពេលជាច្រើនខែមក ដោយសារតែច្បាប់ធ្វើបច្ចាប័ន្យប្រកាសដោយរដ្ឋាភិបាលហុងកុង។ ទោះបីជាច្បាប់នោះត្រូវបានមេដឹកនាំហុងកុងប្រកាសលុបចោលក្តី ក៏អ្នកតវ៉ានៅតែធ្វើការទាមទារជាច្រើនចំណុចទៀតដែរ។
ហុងកុង ត្រូវបានអង់គ្លេសប្រគល់ឲ្យចិនកានកាប់វិញក្នុងឆ្នាំ ១៩៩៧ ក្រោមកិច្ចព្រមព្រៀង ប្រទេសមួយ ប្រព័ន្ធដឹកនាំពីរ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN