ភ្នំពេញ ៖ យុវជនម្នាក់បានស្លាប់ និងម្នាក់ទៀត រងរបួស បន្ទាប់ពីជិះម៉ូតូជ្រុលចង្កូតទៅបុករថយន្តកុងតឺន័រ ពីក្រោយកាលពីម៉ោងជិត១១យប់ថ្ងៃទី១០ ខែតុលា ឆ្នាំ២០១៩នេះ នៅលើកំណាត់ផ្លូវ២៧១ កែងនិងផ្លូវ៣៧១ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
សពជនរងគ្រោះមានឈ្មោះ គឹម សីហា ភេទប្រុស អាយុ២២ឆ្នាំ នៅភូមិជីសាក់ សង្កាត់ ចោមចៅទី៣ ខណ្ឌពោធិ៍សែនជ័យ និងមានស្រុកកំណើត នៅភូមិអូរប៊ិ ឃុំជយោ ស្រុកចំការ លើ ខេត្តកំពង់ចាម។
អ្នករបួសឈ្មោះ ពាង ចំរើន ភេទប្រុស អាយុ២៥ឆ្នាំ នៅសង្កាត់បឹងកេងកងទី១ ខណ្ឌបឹងកេងកង។ ដោយឡែកខាងអ្នកបើករថយន្តមានឈ្មោះ ភាព រ៉ាវី ភេទប្រុស អាយុ២៣ឆ្នាំ មុខរបរ បើករថយន្ត មានស្រុកកំណើតនៅភូមិពង្រ សង្កាត់កណ្តាលដុំ ក្រុងច្បារមន ខេត្តកំពង់ស្ពឺ ។
តាមប្រភពពីកន្លែងកើតហេតុ បាននិយាយថា នាមុនពេលកើតហេតុគេឃើញយុវជន២នាក់ ខាងលើជិះម៉ូតូនិចពណ៌ស ពាក់ផ្លាកលេខភ្នំពេញ 1CU- 4351 ធ្វើដំណើរតាមបណ្ដោយផ្លូវ២៧១ ទិសដៅពីត្បូងទៅជើង ខណៈមកដល់ចំណុចកើតហេតុខាងលើ បានជ្រុលទៅបុករថយន្តកុងតឺន័រ ដែលកំពុងឈប់ស្តុប មានក្បាលពណ៌លឿង ពាក់ផ្លាកលេខព្រះស៊ីហនុ4A 2349 ទឹសដៅស្របគ្នា បុកពីក្រោយពេញទំហឹងបណ្ដាលឲ្យបោកក្បាលស្លាប់ភ្លាមៗ និងម្នាក់ទៀតរង របួសត្រូវបានរត់ចេញពីកន្លែងកើតហេតុបាត់។
ភ្លាមៗនោះដែរ រថយន្តកុងតឺន័រមិនព្រមឈប់នៅនិងកន្លែងនោះទេ ព្យាយាមបើករត់ តែត្រូវបានសមត្ថកិច្ចឃាត់បានរថយន្តរួមទាំងតៃកុងរថយន្ត បញ្ជូនទៅប៉ុស្តិ៍ផ្សារដើមថ្កូវ រង់ចាំជំនាញមកនិងប្រគល់ឲ្យ។
សមត្ថកិច្ចមូលដ្ឋានទាក់ទងជំនាញ វាស់វែងយករថយន្តបង្ក និងតៃកុងរថយន្ត ទៅការិយាល័យចរាចរណ៍ផ្លូវគោក ស្នងការរាជធានីភ្នំពេញ រង់ចាំដោះស្រាយតាមផ្លវច្បាប់៕ដោយ៖កូឡាប