ភ្នំពេញ ៖ យោងតាមហ្វេសប៊ុកផេកផ្លូវការរបស់ស្នងការដ្ឋាននគរបាលរាជធានីភ្នំពេញ ចេញផ្សាយនៅថ្ងៃទី១១ ខែតុលានេះថា សមត្ថកិច្ចសង្ឃឹមជឿជាក់ថា បងប្អូនប្រជាពលរដ្ឋនឹងចូលរួមសហការគោរពច្បាប់ ដោយយកយានយន្តទៅធ្វើស្លាកលេខ ដើម្បីកុំអោយខាតពេលវេលា និងជៀសផុតពីការផាកពិន័យ ។
បន្ទាប់ពីទទួលបានការណែនាំពីលោកឧត្តមសេនីយ៍ឯក ស ថេត អគ្គស្នងការរង និងជាស្នងការដ្ឋាននគរបាលរាជធានីភ្នំពេញ , កម្លាំងនគរបាលនៃការិយាល័យចរាចរណ៍ផ្លូវគោក និងអធិការខណ្ឌទាំង១៤ នឹងចាប់ផ្តើមធ្វើការឃាត់ទុកបណ្តោះអាសន្ន និងធ្វើការផាកពិន័យទៅតាមច្បាប់កំណត់ ចំពោះយានយន្ត ទោចក្រយានយន្ត និងត្រីចក្រយានយន្តទាំងឡាយណាដែលធ្វើចរាចរណ៍ដោយគ្មានស្លាកលេខ ឬពាក់ស្លាកលេខមិនប្រក្រតី ចាប់ពីថ្ងៃចន្ទ ទី២១ ខែតុលា ឆ្នាំ២០១៩នេះតទៅ ។
បើតាមសេចក្តីជូនដំណឹង បានបញ្ជាក់ថា ដោយសង្កេតឃើញថាមួយរយៈពេលចុងក្រោយនេះ មានរថយន្ត និងទោចក្រ-ត្រីចក្រយានយន្ត មួយចំនួនដែលធ្វើចរាចរណ៍នៅតាមដងផ្លូវដោយគ្មានផ្លាកលេខ ឬប្រើប្រាស់ផ្លាកលេខមិនប្រក្រតី និងបានឆ្លៀតឱកាសយករថយន្ត និងទោចក្រ-ត្រីចក្រយានយន្តទាំងនោះ ទៅប្រព្រឹត្តអំពើឆក់ ប្លន់ ឬធ្វើសកម្មភាពល្មើសច្បាប់ ផ្សេងៗទៀត និងបង្កគ្រោះថ្នាក់រួចបើកគេចវេសពីការទទួល ខុសត្រូវចំពោះមុខច្បាប់។
ចំពោះមុខដើម្បីចូលរួមរក្សាសណ្តាប់ធ្នាប់ សុវត្ថិភាពចរាចរណ៍ និងសណ្តាប់ធ្នាប់សង្គមនៅរាជធានីភ្នំពេញ
សំដៅទប់ស្កាត់ បង្ក្រាបរាល់សកម្មភាពល្មើសច្បាប់ផ្សេងៗ និងផ្តល់ភាពងាយស្រួលដល់សមត្ថកិច្ចក្នុងការស្រាវជ្រាវតាមរកជនល្មើសមួយចំនួន និងដើម្បីបង្កើនប្រសិទ្ធភាពនៃការគោរពអនុវត្តច្បាប់ស្តីពីចរាចរណ៍ផ្លូវគោកស្នងការដ្ឋាននគរបាលរាជធានីភ្នំពេញ សូមជូនដំណឹងដល់ប្រជាពលរដ្ឋជាអ្នកប្រើប្រាស់រថយន្ត និងទោចក្រ-ត្រីចក្រយានយន្តដែលគ្មានផ្លាកលេខ ឬពាក់ផ្លាកលេខមិនប្រក្រតី ត្រូវរួសរាន់ទៅបំពេញបែបបទសុំផ្លាកលេខ និងប័ណ្ណសម្គាល់រថយន្ត និងទោចក្រ-ត្រីចក្រយានយន្តឲ្យបាន ត្រឹមត្រូវ និងទាន់ពេលវេលា។
ចាប់ពីថ្ងៃទី២១ ខែតុលា ឆ្នាំ២០១៩ តទៅ ស្នងការដ្ឋាននគរបាលរាជធានីភ្នំពេញ នឹងចាត់វិធានការត្រួតពិនិត្យ ចាប់ឃាត់ជាបណ្តោះអាសន្នរថយន្ត និងទោចក្រ-ត្រីចក្រយានយន្ត ដែលគ្មានផ្លាកលេខយកមករក្សាទុក និងធ្វើការផាកពិន័យ នៅការិយាល័យនគរបាលចរាចរណ៍ផ្លូវគោក រហូតទាល់តែធ្វើផ្លាកលេខរួចរាល់ហើយទើបអនុញ្ញាតឲ្យយកត្រឡប់ទៅវិញបាន ។
ស្នងការដ្ឋាននគរបាលរាជធានីភ្នំពេញ សង្ឃឹមជឿជាក់ថា បងប្អូនប្រជាពលរដ្ឋនឹងចូលរួមសហការគោរព
អនុវត្តច្បាប់ ដោយយកយានយន្តទៅធ្វើផ្លាកលេខ ដើម្បីកុំឲ្យខាតពេលវេលា និងជៀសផុតពីការផាកពិន័យនេះ៕ដោយ៖កូឡាប