ភ្នំពេញ៖ នៅវិមានសន្តិភាព រសៀលថ្ងៃសុក្រ ទី១១ ខែតុលា ឆ្នាំ២០១៩ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទទួលជួបលោកស្រី Domica Pottie ឯកអគ្គរដ្ឋទូតកាណាដា ដែលចប់អណត្តិ ដែលបានបញ្ចប់អាណត្តិបេសកម្មការទូតនៅក្នុងប្រទេសកម្ពុជា។
ក្នុងជំនួបនោះ លោកស្រីបានមានប្រសាសន៍ថា លោកស្រីបានមកបំពេញបេសកកម្មការងារ នៅក្នុងប្រទេសកម្ពុជា ២អាណត្តិហើយ គឺអណត្តិទី១ គឺពី ២០០៤-២០០៧ និងអណត្តិទី២ ពី ២០១៦-២០១៩។ លោស្រីបានមានប្រសាសន៍ថា កម្ពុជា និងកាណាដាមានទំនាក់ទំនងជាមួយគ្នាជាយូរមកហើយ ហើយក៏បានចូលរួមក្នុងកិច្ចការជាច្រើនជាមួយប្រទេសកម្ពុជាផងដែរ។ លោកស្រី ក៏បានសម្ដែងការពេញចិត្ត និងបានកោតសរសើរ ចំពោះការរីកចម្រើនរបស់ប្រទេសកម្ពុជា ក្រោមការដឹកនាំរបស់សម្ដេចតេជោជានាយករដ្ឋមន្ត្រី។ លោកស្រីក៏មានការពេញចិត្តផងដែរ សម្រាប់ទំនាក់ទំនងរវាងប្រទេសទាំងពីរកម្ពុជាកាណាដា។
សម្តេចតេជោ ហ៊ុន សែន ក៏បានមានប្រសាសន៍ថាកាលណាបានដើរតួនាទីយ៉ាងសំខាន់ ក្នុងការអភិវឌ្ឍរបស់ប្រទេសកម្ពុជា ដូចជាក្នុងការស្វែងរកសន្តិភាពសម្រាប់កម្ពុជា ក្នុងនោះប្រទេសកាណាដាក៏បានចូលរួមក្នុងវិស័យសំខាន់ៗផងដែរ ដូចជាការវិនិយោគ ពាណិជ្ជកម្ម ការបោសសំអាតមីនវិស័យធនាគារ និងអប់រំជាដើម។ សម្រាប់ទំហំពាណិជ្ជកម្មរវាងកាណាដា និងកម្ពុជាវិញជាង១ពាន់លានដុល្លារ ហើយផលិតផលរបស់កម្ពុជាដែលនាំចេញទៅកាន់ប្រទេសកាណាដាច្រើននោះគឺសម្លៀកបំពាក់។ ត្រង់ចំណុចនេះ លោកស្រីក៏បានកោតសរសើរ ចំពោះរាជរដ្ឋាភិបាលកម្ពុជាដែលបានយកចិត្តទុកដាក់ ចំពោះបងប្អូនកម្មករ កម្មការិនីដែលបម្រើការងារលើវិស័យវឧស្សាហកម្មនេះ។
ជាពិសេសការផ្ដល់នូវតម្រូវការសំខាន់ដល់កម្មករដូចជា ការគិតគូរពីកន្លែងធ្វើការ ប្រាក់ខែ និងរបបគាំពារសង្គមជាដើមជាពិសេសស្ត្រីដែលមានផ្ទៃពោះនោះ។ ដែលចំណុចនេះធ្វើឲ្យលោកស្រីក៏ដូចជាប្រទេសកាណាដា កាន់តែមានជំនឿទុកចិត្តមកលើប្រទេសកម្ពុជា ជាពិសេសការដឹកនាំរបស់សម្ដេចតេជោ ហ៊ុន សែន ជានាយករដ្ឋមន្ត្រី។
នៅក្នុងឱកាសនោះផង ដែរលោកស្រីក៏បានកោតសរសើរប្រទេសកម្ពុជា ដែលទាក់ទងទៅនឹងការបង្កើនកងកម្លាំងថែរក្សាសន្តិភាព មួកខៀវទៅកាន់បណ្ដាប្រទេសផ្សេងៗ ដែលជាការរួមចំណែកយ៉ាងសំខាន់ ក្នុងការថែរក្សាសន្តិភាពទៅកាន់បណ្ដាប្រទេសផ្សេងៗ ជាពិសេសចំនួនស្ត្រីដែលបានទៅចូលរួមនៅក្នុងកងកម្លាំងមួកខៀវថែរក្សាសន្តិភាពនោះ។ សម្ដេចក៏បានមានប្រសាសន៍ថា កាលពីមុនយើងទទួលកងកម្លាំងមួកខៀវ ពីប្រទេសក្រៅ ក៏ប៉ុន្តែឥឡូវនេះយើងបញ្ជូនមួកខៀវ បញ្ជូនកងកម្លាំងមួកខៀវថែរក្សាសន្តិភាព ទៅកាន់បណ្ដាលប្រទេសផ្សេងៗ នេះជាមោទនភាពមួយសម្រាប់ប្រទេសកម្ពុជាផងដែរ។ សម្ដេចក៏បានអរគុណដល់លោកស្រី ដែលតែងតែឲ្យតម្លៃសម្រាប់ប្រទេសកម្ពុជា និងបានមើលឃើញពីការអភិវឌ្ឍរីកចម្រើន របស់ប្រទេសកម្ពុជារហូតដល់សព្វថ្ងៃនេះ។
លោកស្រីបានមានប្រសាសន៍ទៀតថា ថ្មីៗនេះយើងបានចុះហត្ថលេខាជាមួយគ្នា ទាក់ទងវិស័យអប់រំជាមួយ នឹងមហាវិទ្យាល័យ ផារ៉ាហ្គន ដើម្បីបញ្ជូននិស្សិតកម្ពុជាទៅសិក្សានៅប្រទេសកាណាដា ហើយលោកស្រីនឹងខិតខំ ដើម្បីឱ្យមានអាហារូបករណ៍បន្ថែមទៀត សម្រាប់ការបណ្ដុះបណ្ដាលធនធានមនុស្សរបស់កម្ពុជា។
ទាក់ទងទៅនឹងទំនាក់ទំនងនៅលើវេទិកាអន្តរជាតិវិញ សម្ដេចតេជោនាយករដ្ឋមន្ត្រី បានប្រកាសថានឹងគាំទ្របេក្ខភាពរបស់កាណាដា ជាសមាជិកមិនអចិន្ត្រៃយ៍ នៅក្នុងក្រុមប្រឹក្សាសន្តិសុខអង្គការសហប្រជាជាតិ សម្រាប់ឆ្នាំ២០២១-២០២២ ដែលនឹងបោះឆ្នោតនៅក្នុងឆ្នាំ២០២០ ខាងមុខ៕ ដោយ ៖ កូឡាប