ខេត្តព្រះសីហនុ៖ ក្រុមឃាតករដែលបាញ់សម្លាញ់ជនជាតិចិន ហើយទម្លាក់ពីលើរថយន្តនៅកាលពីថ្ងៃទី៦ តុលា ចំនួន២នាក់ទៀតពេលនេះ កម្លាំងនគរបាលខេត្តព្រះសីហនុ ចាប់បានហើយនៅថ្ងៃទី១១ តុលា នេះ ដោយដកបានអាវុធធ្វើសកម្មភាពទៀតផង។
សូមបញ្ជាក់ថា កាលពីព្រឹកថ្ងៃ៦តុលា២០១៩ មានករណីជនជាតិចិនម្នាក់ ត្រូវឃាតករជាជនជាតិចិនដូចគ្នា បាញ់សម្លាប់ក្នុងនោះ កម្លាំងជំនាញនៃស្នងការដ្ឋាននគរបាលខេត្តព្រះសីហនុ បានឃាត់ខ្លួនជនសង្ស័យ២នាក់ ជាជនជាតិចិនប្រុសស្រី នៅចំណុចរង្វង់មូលតោ២ ស្ថិតនៅក្រុមទី១៤ ភូមិ៤ សង្កាត់៤ ក្រុង-ខេត្តព្រះសីហនុ ចំណែកបក្ខពួកផ្សេងទៀត បានរត់គេចខ្លួនបាត់។
តាមរបាយការណ៍បានឲ្យដឹងថា ជនសង្ស័យទាំង២នាក់រួមមាន ៖ ១-ឈ្មោះ DU QIANG ភេទប្រុស អាយុ២៥ឆ្នាំ ជនជាតិចិន មុខរបរ មិនពិតប្រាកដ ស្នាក់នៅ មិនពិតប្រាកដ ។ ២-ឈ្មោះ CHEN MI XIANG ភេទស្រី អាយុ ៣១ឆ្នាំ ជនជាតិចិន មុខរបរ បុគ្គលិក KTV ស្នាក់នៅភូមិ១ សង្កាត់៣ ក្រុង-ខេត្តព្រះសីហនុ ។
ជនរងគ្រោះឈ្មោះ WU QINGWEI ភេទប្រុស អាយុ៤១ឆ្នាំ ត្រូវជនសង្ស័យបាញ់ចំនួន២គ្រាប់ (មួយគ្រាប់ចំកំភួនជើងខាងស្តាំធ្លាយ និងមួយគ្រាប់ទៀតចំលើដោះខាងឆ្វេងធ្លាយ ) ។
វត្ថុតាងចាប់យកបានរួមមាន ៖ សម្បកគ្រាប់ចំនួន២គ្រាប់ ប្រភេទ ៩mm (នៅក្នុងរថយន្ត), គ្រាប់កាំភ្លើងចំនួន២គ្រាប់ ប្រភេទ ៩mm (នៅក្នុងរថយន្ត), ម្សៅក្រាម ពណ៌ស ២កញ្ចប់តូច សង្ស័យជាសារធាតុញៀន (នៅក្នុងរថយន្ត), រថយន្តម៉ាក Mitsubishi ពណ៌ប្រផេះ ពាក់ផ្លាកលេខ ភ្នំពេញ 2AJ-8653 ។
របាយការណ៍អង្កេតបានឲ្យដឹងថា តាមចម្លើយសារភាព បឋមរបស់ជនសង្ស័យថា ៖ ករណីទី១ នៅថ្ងៃទី៥ តុលា ២០១៩ វេលាម៉ោង២៣ និង៥០ នាទី ពួកគេទាំង៣នាក់ បានធ្វើសកម្មភាពប្លន់ប្រដាប់អាវុធ នៅក្នុងហាងលក់ខោអាវយីហោរ ហូលីវ៉ូត ដែលមានទីតាំងស្ថិតនៅមហោ ស្រពចាស់ ស្ថិតក្នុងភូមិ២ សង្កាត់២ ក្រុង-ខេត្តព្រះសីហនុ ហើយពួកវាបានចាប់ចងដៃជនរងគ្រោះ ជាជនជាតិចិន ភេទស្រី មកខាងក្រោយដោយប្រើខ្សែរិត (ស៊ីល) និងបានយកខ្សែក្រវាត់ ព្រមទាំងក្រណាត់ទៅចងមាត់ជនរងគ្រោះកុំឲ្យស្រែក រួចយកទៅឃុំទុកនៅជាន់ទី៣ យកលុយអស់ចំនួន ២០០០ដុល្លារ រួចគេចខ្លួន ។ ករណីទី២ នៅថ្ងៃទី៦ តុលា ២០១៩ វេលាម៉ោង៧ និង៣០នាទី ពួកវាទាំង៣នាក់ដដែល បានណាត់ជនជាតិចិនម្នាក់ (ជនរងគ្រោះដែលបានស្លាប់) មកជួបក្នុងគោលបំណងចាប់ជំរិត លុះពេលជនរងគ្រោះចូលដល់ក្នុងរថយន្ត ពួកវាក៏យកកាំភ្លើងខ្លីភ្ជង់ជនរងគ្រោះ មិនឲ្យកម្រើក តែដោយជនរងគ្រោះរើបម្រាស់ខ្លាំងពេក ពួកវាក៏បាញ់ជនរងគ្រោះ ១គ្រាប់ ចំកំភួនជើងខាងស្តាំធ្លាយ ពេលនោះជនរងគ្រោះរឹតតែរើបម្រាស់ខ្លាំងឡើងថែមទៀត ទើបពួកវាបាញ់ជនរងគ្រោះ ១គ្រាប់ទៀត ចំលើដោះខាងឆ្វេងធ្លាយ បណ្តាលឲ្យស្លាប់នៅក្នុងរថយន្ត ។
បន្ទាប់មកពួកវាបានទម្លាក់សពជនរងគ្រោះចោលតាមផ្លូវ រួចបើករថយន្តគេចខ្លួន ដល់ចំណុចផ្លូវចូលវត្តក្រោម ក៏ផ្លុងទុករថយន្តចោលនៅទីនោះ រួចចែកផ្លូវគ្នារត់គេចរៀងៗខ្លួន ។
ចំពោះករណីនេះ កម្លាំងជំនាញនៃស្នងការដ្ឋាននគរបាលខេត្តព្រះសីហនុ បន្តនីតិវិធីបញ្ជូនជនសង្ស័យទៅសាលាដំបូងខេត្តព្រះសីហនុ៕ ដោយ ៖ បញ្ញាស័ក្តិ