ខេត្តកំពត៖ ប្រជាពលរដ្ឋជាអាណាព្យាបាល មានលំនៅដ្ឋានរស់នៅក្រុងកំពត ជាពិសេសភ្ញៀវទេសចរ បានបង្ហាញការព្រួយបារម្ភជាថ្មីទៀត ចំពោះបទល្មើសចាប់រំលោភ ផ្តើមដោយជនទំនើង ដែលតែងធ្វើសកម្មភាព នៅតាមតំបន់ទេសចរណ៍មួយចំនួន ជាពិសេសភ្ញៀវទេសចរធ្វើដំណើរដោយថ្មើរជើង នាពេលរាត្រីនៅតាមឆ្នេរព្រែកកំពតជាដើម។
ជាក់ស្តែងកាលពីវេលាម៉ោង៣ជិតភ្លឺ ព្រឹកថ្ងៃទី១១ ខែតុលា ឆ្នាំ២០១៩ មានករណីស្ត្រីវ័យក្មេងជនជាតិបារាំងម្នាក់ ត្រូវបានជនទំនើងមួយក្រុមមានគ្នាបីនាក់ បានចាប់បង្ខំរុញចូលរថយន្ត យកទៅចាប់រំលោភបូក នៅតាមផ្លូវចាក់បេតុងរួចចូលទៅក្នុងព្រៃស្ងាត់មួយកន្លែង នាមូលដ្ឋានក្រុងកំពត បានសម្រេចទាំងអស់គ្នា។ បន្ទាប់មកនៅរសៀលថ្ងៃដដែល ស្ត្រីរងគ្រោះជនជាតិបារាំងរូបនោះ ក៏បានទៅដាក់ពាក្យបណ្តឹងប្តឹងដល់កម្លាំងសមត្ថកិច្ចស្នងការដ្ឋានខេត្តកំពត ដើម្បីឲ្យជួយធ្វើអន្តរាគមន៍ ស្រាវជ្រាវរកមុខល្មើសយកមកផ្តន្ទាទោសតាមច្បាប់។
ស្ត្រីរងគ្រោះ បាននិយាយប្រាប់សមត្ថកិច្ចថា នៅក្នុងអំឡុងពេល រូបនាង ត្រូវជនល្មើសចំនួន ៣នាក់ ចាប់រំលោភនៅក្នុងរថយន្ត ក៏ត្រូវជនល្មើសថតជាវីដេអូរួមភេទនោះតាមទូរស័ព្ទដៃថែមទៀតផង។
យ៉ាងណាក៏ដោយចុះ ចំពោះបទល្មើសចោរឆក់ ចោរលួចម៉ូតូ-រថយន្ត ចាប់ជំរិត និងបទល្មើសរំលោភផ្លូវភេទជាដើម ដែលតែងកើតមាននៅមូលដ្ឋានក្រុងកំពត ជាបន្តបន្ទាប់មកនេះ គឺបានបង្កការភ័យខ្លាចដល់ការរស់នៅ របស់ប្រជាពលរដ្ឋក្នុងមូលដ្ឋាន ក៏ដូចជាបានប៉ះពាល់ដល់សុវត្ថិភាព របស់ភ្ញៀវទេសចរជាតិ-អន្តរជាតិធ្ងន់ធ្ងរ។
ត្រង់ចំណុចនេះ ប្រជាពលរដ្ឋរស់នៅក្រុងកំពត បានសំណូមពរដល់ លោក ជាវ តាយ អភិបាលខេត្តកំពត ឲ្យជួយជំរុញទៅ លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត និងលោកមេបញ្ជាការកងរាជអាវុធហត្ថខេត្តកំពត ឲ្យជួយបង្កើនកម្លាំងល្បាតទាំងយប់ថ្ងៃ ឲ្យបានច្រើនថែមទៀត ដើម្បីថែរក្សាការពារសុវត្ថិភាពជូនប្រជាពលរដ្ឋ និងភ្ញៀវទេសចរ ឲ្យបានប្រសើរឡើងវិញ។
យោងតាមពាក្យបណ្តឹង របស់ស្ត្រីជនជាតិបារាំង បញ្ជាក់ថា នៅម៉ោងប្រមាណ ៣ជិតភ្លឺ ព្រឹកថ្ងៃទី១១ ខែតុលា ឆ្នាំ២០១៩ មានជនល្មើសមួយក្រុម មានគ្នាបីនាក់បានរំលោភបូករូបនាងបានសម្រេចទាំងអស់គ្នា។
តាមពាក្យបណ្តឹង របស់ស្រ្តីរងគ្រោះ គឺនៅយប់កើតហេតុ គាត់បានដើរចេញពីផឹកស៊ី នៅហាងមួយកន្លែង មានទីតាំងនៅម្តុំឆ្នេរមាត់ព្រែកកំពត។ បន្ទាប់មក ក៏បានធ្វើដំណើរដោយថ្មើរជើងតាមឆ្នេរមាត់ព្រែកកំពត លុះធ្វើដំណើរមកដល់ជិតស្ពានថ្មកំពង់បាយ ក៏ឃើញជនសង្ស័យមានគ្នា៣នាក់ បានជិះរថយន្ត១គ្រឿង ម៉ាកកាមរីហើម ពណ៌ស បានបើករថយន្តមកឈប់ក្បែរនាង រួចក៏ចាប់បង្ខំឲ្យចូលក្នុងរថយន្ត រួចដឹងចេញទៅតាមផ្លូវចាក់បេតុង បត់ចូលទៅក្នុងព្រៃស្ងាត់មួយកន្លែង រួចជនល្មើសទាំងនោះ ក៏បានធ្វើសកម្មភាពចាប់រំលោភរូបនាង យ៉ាងសាហាវព្រៃផ្សៃ និងបានប្រើហិង្សាវាយដំរូបនាង ព្រមទាំងបានថតវីដេអូ ពេលពួកគេធ្វើសកម្មភាពចាប់រំលោភរូបនាងម្នាក់ម្តងៗ រហូតបានសម្រេច។ បន្ទាប់ក្រោយមក ជនសង្ស័យទាំងនោះ ក៏បានអូសរូបនាង ទម្លាក់ចេញពីរថយន្ត ហើយបើកគេចខ្លួនបាត់ដោយសុវត្ថិភាព និងមុនរំខានដល់កម្លាំងនគរបាល និងកម្លាំងកងរាជអាវុធហត្ថខេត្តកំពតសម្រាកទេ។
យ៉ាងណានេះក្តី រហូតមកដល់ពេលនេះ កម្លាំងសមត្ថកិច្ចស្ថាប័នពាក់ព័ន្ធ រួមមាន៖ កម្លាំងស្នងការនគរបាលខេត្តកំពត និងកម្លាំងកងរាជអាវុធហត្ថខេត្តនេះ នៅមិនទាន់ចាប់បានជនល្មើសក្នុងករណីចាប់រំលោភខាងលើ យកមកបង្ហាញមុខ ឲ្យសាធារណជនបានដឹងជាសាធរណៈនៅឡើយទេ គិតត្រឹមព្រឹកម៉ោង១១ និង៤០នាទី ថ្ងៃទី១៣ ខែតុលា ឆ្នាំ២០១៩នេះ។
ចំពោះបទល្មើសចាប់រំលោភបូក ទៅលើស្ត្រីភ្ញៀវទេសចរជនជាតិបារាំង របស់ក្រុមជនទំនើងមួយក្រុមមានគ្នាបីនាក់នេះ អ្នកយកព័ត៌មាន នៅមិនទាន់អាចទាក់ទង លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត ដើម្បីបំភ្លឺបន្ថែមករណីបទល្មើសរំលោភផ្លូវភេទខាងលើ បានទេតាមទូរស័ព្ទ នៅថ្ងៃទី១៣ ខែតុលា ឆ្នាំ២០១៩នេះ។
យ៉ាងនេះក្តី អធិការនគរបាលខេត្តកំពត លោក ហោ វណ្ណា បានឲ្យដឹងនៅរសៀលថ្ងៃទី១៣ ខែតុលា ឆ្នាំ២០១៩នេះថា ស្ត្រីរងគ្រោះជនជាតិបារាំងខាងលើ ពិតជាស្នាក់នៅទីកន្លែងស្នាក់នៅ ក្នុងមូលដ្ឋានក្រុងកំពតពិតមែន ប៉ុន្តែទីកន្លែង ដែលជនល្មើសធ្វើសកម្មភាពចាប់រំលោភស្រ្តីរងគ្រោះជនជាតិបារាំងនោះ គឺអាចនៅមូលដ្ឋានផ្សេងទេ ព្រោះតាមការសាកសួរស្ត្រីរងគ្រោះ គឺរថយន្តជនល្មើសមានទិសដៅឆ្ពោះទៅខេត្តកែប។
យ៉ាងណាក៏ដោយចុះ លោក ហោ វណ្ណា អធិការនគរបាលក្រុងកំពត សង្កត់ធ្ងន់ថា សំណុំរឿងចាប់រំលោភខាងលើនេះ សមត្ថកិច្ចជំនាញ កំពុងបើកការស៊ើបអង្កេត និងស្រាវជ្រាវវែករកជនល្មើស ដើម្បីកសាងសំណុំរឿង យកមកផ្តន្ទាទោតាមច្បាប់នាថ្ងៃខាងមុខ៕ ដោយ៖ ដែន សីមា