មនុស្សច្រើនជាង ១១០.០០០នាក់ បានចូលរួមក្នុងប្រតិបត្តិការសង្រ្គោះ និងស្វែងរក ក្រោយពេលព្យុះទីហ្វុងដ៏ខ្លាំងខ្លាឈ្មោះ Hagibis បានវាយប្រហារលើប្រទេសនេះកាលពីថ្ងៃសៅរ៍កន្លងទៅនេះ។
ព្យុះទីហ្វុង Hagibis បានសម្លាប់មនុស្សយ៉ាងតិច ៣១នាក់ និងបណ្តាលឲ្យមនុស្ស ១៥នាក់ផ្សេងទៀតបាត់ខ្លួន។
ព្យុះនេះក៏ធ្វើឲ្យមានការលុបចោលការប្រកួតកីឡាបាល់អោបវូលខាប់ចំនួន ៣ប្រកួតផងដែរ ប៉ុន្តែការប្រកួតដ៏សំខាន់រវាងជប៉ុន និងស្កុតឡែននៅតែធ្វើដដែល។
ក្រុមជួយសង្រ្គោះរាប់ម៉ឺននាក់ រួមមានប៉ូលីស ក្រុមពន្លត់អគ្គិភ័យ យោធា ជាដើមកំពុងតែធ្វើកិច្ចការរបស់ពួកគេនៅតំបន់រងគ្រោះ ដើម្បីស្វែងរកជនរងគ្រោះដែលជាប់ដោយការរអិលបាក់ដី និងទឹកជំនន់។
មនុស្សជាង ៧លាននាក់ត្រូវបានបង្ខំខ្លួនចាកចេញពីផ្ទះរបស់ពួកគេ នៅពេលកំពុងមានព្យុះខ្លាំង ប៉ុន្តែមានមនុស្សប្រហែល ៥០.០០០នាក់ត្រូវបានគេគិតថា បានស្នាក់នៅក្នុងជម្រក។
សូមបញ្ជាក់ថា កាលពីខែមុន ជប៉ុនក៏រងការវាយប្រហារពីព្យុះទីហ្វុង Faxai ផងដែរ បណ្តាលឲ្យផ្ទះសម្បែងចំនួន ៣០.០០០ខ្នងរងការខូចខាត៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC