ប្រទេសអ៊ីរ៉ង់បានប្រកាសពីថ្ងៃអាទិត្យម្សិលមិញថា ខ្លួនបានរកឃើញឧស្ម័នធម្មជាតិប្រភេទថ្មី ដែលអាចមានសមត្ថភាព ផលិតឧស្ម័នបានចំនួន ៤០០លានធុង និងអាចរកចំណូលឲ្យជាតិបាន ៤០ពាន់លានដុល្លារ។
កន្លែងឧស្ម័នធម្មជាតិឈ្មោះ Eram ដែលនៅក្បែរឈូងសមុទ្រពែក្ស ស្ថិតក្នុងខេត្ត Fars។ កន្លែងនោះមានផ្ទុកឧស្ម័នចំនួនច្រើនជាង ៥សែនលានម៉ែត្រគូប។ នេះបើតាមការបញ្ជាក់របស់លោក Reza Dehghan អនុប្រធាននាយកគ្រប់គ្រងក្រុមហ៊ុនប្រេងជាតិអ៊ីរ៉ង់ (NIOC)។
លោកបាននិយាយថា ”ពួកយើងអាចមានសក្តានុពលក្នុងការកំណត់ ទីតាំងប្រេង ដែលពុំទាន់រកឃើញក្នុងប្រទេសយើង ដោយប្រើប្រាស់បច្ចេកទេសរុករកភូមិរូប និងការខួង ហើយវានឹងជួយបន្ថែមទ្រព្យសម្បតិ្តយ៉ាងច្រើនដល់ជាតិ”។
ការរុករកឃើញដ៏មហាសាលនេះ កើតឡើងនៅពេលដែលអ៊ីរ៉ង់កំពុងជួបការលំបាកផ្នែកសេដ្ឋកិច្ចខ្លាំង ក្រោយរងទណ្ឌកម្មជាច្រើនពីសហរដ្ឋអាមេរិច ជុំវិញកម្មវិធីផលិតនុយក្លេអ៊ែររបស់ប្រទេសនេះ។
រដ្ឋមន្រ្តីប្រេងអ៊ីរ៉ង់លោក Bijan Namdar Zanganeh បានថ្លែងថា “អាមេរិចមិនអាចបញ្ឈប់ការផលិតប្រេងរបស់អ៊ីរ៉ង់បាននោះទេ។ ទណ្ឌកម្មមិនអាចបញ្ឈប់ឧស្សាហ៍កម្មប្រេងអ៊ីរ៉ង់បានទេ។ ពួកយើងនៅតែផលិតវា។ ពួកយើងនៅតែរស់”៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
