ភ្នំពេញ៖ នៅវេលាថ្ងៃត្រង់ថ្ងៃចន្ទ ទី១៤ ខែតុលា ឆ្នាំ២០១៩នេះ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានអញ្ជើញដឹកនាំដាំដើមឈើបន្ថែម នៅគល់ស្ពានជ្រោយចង្វាទាំងសងខាង មានដើមធ្នង់ ដើមគគីរ និងដើមគ្រញូង សរុបចំនួន៣០២ដើម ដោយមានការចូលរួមដាំពីមន្ទីរជំនាញពាក់ព័ន្ធ និងរដ្ឋបាលខណ្ឌដូនពេញ ដើម្បីធ្វើឲ្យតំបន់គល់ស្ពានជ្រោយចង្វា ប្រែក្លាយជាឧទ្យានបៃតង និងផ្ដល់ជាម្លប់សម្រាប់អ្នកធ្វើដំណើរទាំងអស់។
បើតាមការបញ្ជាក់ពីលោក សំ សាមុត ប្រធានអង្គភាពសួនច្បារ និងរុក្ខជាតិ បានឱ្យដឹងថា លោកអភិបាលរាជធានីភ្នំពេញ បានជំរុញឱ្យអង្គភាពរបស់លោក ដាំដើមឈើប្រណិតៗនៅលើសួននេះឱ្យបានច្រើន ប្រែក្លាយជាសួនឧទ្យានមួយកណ្តាលក្រុងភ្នំពេញ។ ដើមឈើ ដែលត្រូវដាំមានប្រភេទឈើធ្នង់ គគីរ និងគ្រញូង។
ការរៀបចំឧទ្យានតូចនេះ ដើម្បីឱ្យរាជធានីភ្នំពេញ ក្លាយជាទីក្រុងដែលមានពណ៌បៃតង និងមានបរិស្ថានស្រស់ល្អស្អាត ក្នុងគោលបំណងដើម្បីទាក់ទាញភ្ញៀវទេសចរជាតិ និងអន្ដរជាតិ ឱ្យចូលមកទស្សនាកាន់តែច្រើនឡើងថែមទៀត៕ដោយ៖កូឡាប
