កំពង់ធំ៖ ស្នងការដ្ឋាននគរបាលខេត្តកំពង់ធំ បានឲ្យដឹងថា នៅព្រឹកថ្ងៃទី ១៤ ខែ តុលា ឆ្នាំ២០១៩ មន្ត្រីនគរបាល
ការិយាល័យប្រឆាំងគ្រឿងញៀន បានកំពុងកសាងនីតិវិធី ដើម្បីបញ្ជូនជនសង្ស័យ ២នាក់ជា ប្ដី ប្រពន្ធ ជាមុខសញ្ញាយ៉ាងសកម្ម ដែលបានធ្វើសកម្មភាពជួញដូរគ្រឿងញៀន នៅភូមិស្រុកសន្ទុក ទៅសាលាដំបូងខេត្តកំពង់ធំ ដើម្បីចាត់ការបន្ត ។
កិច្ចប្រតិបត្តិការ បង្ក្រាបបទល្មើសគ្រឿងញៀនត្រូវបានធ្វើឡើងថ្ងៃទី ១២ ខែ តុលា ឆ្នាំ២០១៩ វេលាម៉ោង១៦ និង ០០នាទី ដោយមានការសម្របសម្រួលនីតិវិធីពីលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ និងក្រោមដឹកនាំបញ្ជាផ្ទាល់ពី លោក
ឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ លោកវរសេនីយ៍ឯក ងួន ហ៊ាង នាយការិយាល័យប្រឆាំងគ្រឿងញៀន បានដឹកនាំមន្ត្រីការិយាល័យប្រឆាំងគ្រឿងញៀន សហការជាមួយកម្លាំងអធិការដ្ឋាននគរបាលស្រុកសន្ទុក ចុះបង្រ្កាបករណីជួញដូរ នូវសារធាតុញៀនខុសច្បាប់ ១ករណី នៅចំណុច ភូមិ ចំបក់ជ្រំ ឃុំ ប្រាសាទ ស្រុក សន្ទុក ខេត្ត កំពង់ធំ ។
ឃាត់ខ្លួនជនសង្ស័យ ២នាក់ ស្រី ១នាក់ ១-ឈ្មោះ ម៉ៅ មឿន ភេទ ប្រុស អាយុ ៥៣ ឆ្នាំ រស់នៅភូមិ ស៊ីវត្ថា ឃុំ ប្រាសាទ ស្រុក សន្ទុក ខេត្តកំពង់ធំ ។ ២-ឈ្មោះ គួន ខុម ភេទ ស្រី អាយុ ៤៨ ឆ្នាំ រស់នៅភូមិ ស៊ីវត្ថា ឃុំ ប្រាសាទ ស្រុក សន្ទុក ខេត្តកំពង់ធំ ។
វត្ថុតាងដែលសមត្ថកិច្ចដកហូតបានម្សៅក្រាមពណ៌ សថ្លា សង្ស័យជាសារធាតុញៀន ខុសច្បាប់ចំនួន១៨ កញ្ចប់ និងទូរស័ព្ទដៃចំនួន ១ គ្រឿង ៕ដោយ៖កូឡាប