ភ្នំពេញ៖ ក្នុងថ្ងៃខួប២៥ឆ្នាំថ្ងៃកំណើតរបស់កងពលតូចលេខ៧០ នៅព្រឹកថ្ងៃទី១៤ ខែតុលា ឆ្នាំ២០១៩នេះ បានបង្ហាញនូវអានុភាពកងទ័ព និងសព្វាវុធជាច្រើន តាមរយៈក្បួនព្យុហយាត្រា។ តាមរយៈព្យុហយាត្រានេះ បានបង្ហាញថា កងពលតូចលេខ៧០ ក្នុងរយៈពេល២៥ឆ្នាំមកនេះ ខ្លួនបានធ្វើសកម្មភាពយ៉ាងសកម្មក្នុងបុព្វហេតុជាតិមាតុភូមិ។ ជាពិសេសបានបង្ហាញសមត្ថភាព របស់កងពលបានពង្រឹងកាន់តែប្រសើរ ដើម្បីបំពេញការងារ និងភារកិច្ចចូលរួមថែរក្សាសន្តិសុខ សណ្តាប់ធ្នាប់ និងសុខសន្តិភាពរបស់សង្គមជាតិ។
ភ្ញៀវជាតិ និងអន្តរជាតិ ដែលចូលរួមក្នុងពិធី និងបានទស្សនានូវព្យុហយាត្រានោះ បានសម្តែងនូវការចាប់អារម្មណ៍ខ្លាំង ទៅលើការបង្ហាញយុទ្ធោបករណ៍ និងកងទ័ព ជាពិសេសភ្ញៀវជាតិ និងអន្តរជាតិ បានចាប់អារម្មណ៍ខ្លាំង ទៅការបង្ហាញគ្បាច់គុណកងយោធពលខេមរភូមិន្ទរបស់កងទ័ព។
លោក ឧត្តមសេនីយ៍ឯក ម៉ៅ សុផាន់ មេបញ្ជាការរងកងទ័ពជើងគោក មេបញ្ជាការកងពលតូចលេខ៧០
ក្នុងខួប២៥ឆ្នាំ នៃថ្ងៃបង្កើតកងពលតូចលេខ៧០ បានប្រកាសយ៉ាងដាច់ណាត់ថា ត្រៀមជានិច្ចដើម្បីវាយកម្ទេចរាល់ការឃុប ឃិតប៉ុនប៉ងបំផ្លាញសុខ សន្ដិភាព ដែលរកបានមកដោយលំបាក។ នៅចំពោះមុខ សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ អញ្ជើញតំណាងដ៏ខ្ពង់ខ្ពស់ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា លោកឧត្តមសេនីយ៍ឯក ម៉ៅ សុផាន់ បានប្រកាសថា ប្តេជ្ញាវាយកម្ទេចរាល់ការឃុបឃិត ប៉ុនប៉ងបំផ្លាញសន្តិភាព ឧបាយកលបង្កើតឲ្យមានបដិវត្តន៍ពណ៌ លើទឹកដីកម្ពុជា និងប្រឆាំងដាច់ខាតចំពោះការជ្រៀតជ្រែក កិច្ចការផ្ទៃក្នុងកម្ពុជា ពីមជ្ឈដ្ឋានខាងក្រៅ។ លោកមេបញ្ជាការកងពលតូចលេខ៧០ បានអះអាងទៀតថា កងទ័ពមានចិត្តស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ និងប្តេជ្ញា ការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលស្របច្បាប់ ការពារសុខសន្តិភាព អធិ បតេយ្យភាពបូរណភាពទឹកដីឲ្យបាន ស្ថិតស្ថេរ រឹងមាំជាអមតៈ។
លើសពីនេះ កងពលតូចលេខ៧០ នឹងអនុវត្តន៍ឲ្យបានជោគជ័យ ទៅតាមផែនការកំណែទម្រង់កងយោធពលខេមរភូមិន្ទនយោបាយ និងផែនការយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ជាពិសេស បាវចនា កម្មវិធី២គឺ កែទម្រង់ខាងក្នុង បង្កើនមិត្តខាងក្រៅក្នុងស្មារតីឯករាជ្យ និងអភិក្រមទាំង៥ មុជទឹក ដុសក្អែល ឆ្លុះកញ្ចក់ ព្យាបាល និងវះកាត់។ បង្កើនការសាមគ្គីភាព ឯកភាពផ្ទៃក្នុង គោរពយ៉ាងម៉ឺងម៉ាត់នូវច្បាប់រដ្ឋ សារាចរ សេចក្តីណែនាំ សេចក្តីសម្រេច បទបញ្ជា និងបទវិន័យទូទៅ របស់កងយោធពលខេមរភូមិន្ទឲ្យបានខ្ជាប់ខ្ជួន។
លោកឧត្តមសេនីយ៍ឯក ម៉ៅ សុផាន់ ក៏បានប្តេជ្ញាបន្តយកចិត្តទុកដាក់បំពេញភារកិច្ច សំដៅសម្រេចបានសមិទ្ធផល់ជាបន្តបន្ទាប់ ដោយប្រែ ក្លាយរាល់ភាពប្រឈម ចំពោះមុខឲ្យក្លាយទៅជាចំណុចខ្លាំង ដើម្បីជាខឿនការពារជាតិដ៏រឹងមាំ និងប្រកបដោយការជឿទុកចិត្តបំផុតរបស់ជាតិ មាតុភូមិ និងប្រជាជន។ ប្ដេជ្ញាសម្រេច ឲ្យ បាននូវទិសដៅ៥ឆ្នាំ ២០១៩-២០២៤ របស់កងពល ដោយនឹងបន្តសកម្មភាពមនុស្សធម៌ ការងារសាងសង់ហេដ្ឋារចនាសម្ព័ន្ធនានា លើកកម្ពស់ ជីវភាពរស់នៅរបស់កងទ័ព ពង្រឹងគុណភាព និងសម្ថភាពកងទ័ព តាមរយៈការបណ្ដុះបណ្ដាលយោធិនបន្តវេន និងការធ្វើទំនើបកម្មសម្ភារៈដើម្បីត្រៀមខ្លួនអនុ វត្តរាល់បទបញ្ជារបស់រាជរដ្ឋាភិបាល ក្រសួងការពារជាតិ អគ្គបញ្ជាការ និងបញ្ជាការដ្ឋានកងទ័ពជើងគោក។
ថ្លែងក្នុងឱកាសនោះ សម្ដេចពិជ័យសេនា ទៀ បាញ់ ក៏បានសម្ដែងនូវការកោតសរសើរ ដល់កងពលតូចលេខ៧០ ដឹកនាំដោយលោកឧត្តមសេនីយ៍ឯក ម៉ៅ សុផាន់ មេបញ្ជាការ ដែលបានកិច្ចខិតខំប្រឹងប្រែងអភិវឌ្ឍន៍ខ្លួន។ ពិសេសបានដឹកនាំបញ្ជាកងកម្លាំង ព្រមទាំងកសាងអង្គភាពកាន់តែរីកចម្រើនពីមួយថ្ងៃទៅមួយថ្ងៃ ដើម្បីត្រៀមទទួលរាល់បទបញ្ជារបស់ប្រមុខនៃរាជរដ្ឋាភិបាល៕ដោយ៖កូឡាប
