តាកែវ៖ នៅព្រឹកថ្ងៃទី ១៣ ខែតុលា ឆ្នាំ ២០១៩ នេះ ក្រសួងពាណិជ្ជកម្ម រដ្ឋបាលខេត្ត បានរៀបចំការ បោះឆ្នោតរយៈពេលពេញ ១ថ្ងៃ ក្នុងគោលបំណងជ្រើសរើសសមាជិក ជ្រើសតាំងសភាពាណិជ្ជកម្មតំណាងឲ្យខេត្តតាកែវ អាណត្តិទី១ លើកទី១ ដើម្បីជួយគៀរគររកអ្នកវិនិយោគចូលមកវិនិយោគក្នុងស្រុក និងជួយដល់ពលរដ្ឋនៅក្នុងមូលដ្ឋានមានការងារធ្វើ ។ ការបោះឆ្នោតនេះដែរបានធ្វើឡើង នៅសាលមហោ ស្រពខេត្តតាកែវ ដោយមានការចូលរួមត្រួតពិនិត្យលោក វ៉េង សុធី រដ្ឋលេខាធិការ ក្រសួង ពាណិជ្ជកម្ម និងលោក អ៊ូច ភា អភិបាលខេត្តតាកែវ ។
ថ្លែងក្នុងពិធីបោះឆ្នោតជ្រើសរើសតំណាងសភាពាណិជ្ជកម្មនេះដែរ លោក វ៉េង សុធី បានមានប្រសាសន៍ថា ការៀបចំបោះឆ្នោតឲ្យមានសភាពាណិជ្ជកម្មនៅក្នុង ខេត្តតាកែវនេះ គឺក្រសួងកំពុងតែរៀបចំឲ្យមានសភាពាណិជ្ជកម្មគ្រប់រាជធានី ខេត្ត ទាំងអស់ នៅទូទាំងប្រទេស ព្រោះមិនចង់ឲ្យមានសភាពាណិជ្ជកម្មនៅខេត្តខ្លះ មានតែពីរឬបីខេត្តនោះទេ ពោលគឺមានសភាពាណិជ្ជកម្ម ថ្នាក់ខេត្តឲ្យដាច់ពីគ្នា ហើយនៅក្នុងការបោះឆ្នោតនេះដែរ យើងមានបេក្ខជនដែលឈរឈ្មោះជាប្រធាន អនុប្រធាន និងសមាជិកសភាពាណិជ្ជកម្មខេត្ត មានចំនួន១៥រូប លើបេក្ខជនដែលឈរឈ្មោះ ១៧រូប និងមានអង្គបោះឆ្នោតជាអាជីវករ និងពាណិជ្ជករក្នុងខេត្ត ចំនួន ២១០នាក់ ផងដែរ ដែលបានចូលមកបោះឆ្នោតជ្រើសតាំងនេះ ។
លោករដ្ឋលេខាធិការ បានបន្តថា តួនាទីសភាពាណិជ្ជកម្ម គឺធ្វើ ការទំនាក់ ទំនងជាមួយនឹងប្រភពសេដ្ឋកិច្ច ក្នុងនិងក្រៅប្រទេស ដើម្បីស្រង់យកព័ត៌មាន ដែលពាក់ព័ន្ធ នឹង ការអភិវឌ្ឍន៍ សហគ្រាសជាតិ បង្កើនប្រសិទ្ធភាព សហគ្រាសទាំងឡាយ ដើម្បីជាផលប្រយោជន៍ខាងវិស័យ ពាណិជ្ជកម្ម ឧស្សាហ៍កម្ម កសិកម្ម សិប្បកម្ម សេវាកម្ម និងសេដ្ឋកិច្ចទូទៅ ដូចជា ការ រៀបចំផ្សព្វផ្សាយនូវ ស្ថិតិពាណិជ្ជកម្ម និងសេដ្ឋកិច្ចការស្រាវជ្រាវ ពិចារណាលើបញ្ហាសេដ្ឋកិច្ច និងពាណិជ្ជកម្ម ការ លើកតម្កើនផ្នែកទេសចរណ៍ ។ ជាមួយគ្នានេះ សភាពាណិជ្ជកម្ម ក៏បានផ្ដល់ជូនរាជរដ្ឋាភិបាល និង អាជ្ញាធរ ខេត្ត-ក្រុង នូវយោបល់ព័ត៌មានទាំងឡាយ ស្តីពីបញ្ហាពាណិជ្ជកម្ម ឧស្សាហ៍កម្ម កសិកម្ម សិប្បកម្ម សេវាកម្ម ផងដែរ ។
លោកវ៉េង សុធី រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា ការបង្កើតឲ្យមាន សភាពាណិជ្ជកម្មនៅថ្នាក់ខេត្តនេះ គឺមានភារកិច្ចទាក់ទាញអ្នកវិនិយោគធំៗនៅ ក្រៅប្រទេស មកវិនិយោគ នៅក្នុង ខេត្តរបស់ខ្លួន ឬក៏អាចធ្វើការទំនាក់ទំនងទៅកាន់សភាពាណិជ្ជកម្ម ខេត្តផ្សេងៗបាន ហើយក៏អាច ទាក់ទង ទៅ កាន់សភាពាណិជ្ជកម្មនៅក្រៅប្រទេសផ្សេងទៀតក៏បានដែរ ពោលគឺយើងដឹងថាហើយដែរ ឲ្យតែអ្នកវិនិយោគិនបរទេសចង់វិនិយោគនៅខេត្តណាមួយ គឺគេនឹងមក ទាក់ ទងប្រធានសភាពាណិជ្ជកម្មខេត្តនោះ ដើម្បីធ្វើការទំនាក់ទំនងគ្នារកស៊ី ពិសេសគឺការទុកចិត្តគ្នាទៅវិញ ទៅមក មួយវិញទៀតប្រធានសភាពាណិជ្ជកម្មខេត្ត ក៏ត្រូវតែជួយជំរុញ និងសម្របសម្រួលទំហំពាណិជ្ជកម្ម។
ក្នុងនោះដែរលោកអ៊ូច ភា អភិបាលខេត្តតាកែវ បានចាត់ទុកសភាពាណិជ្ជកម្ម ខេត្តតាកែវថ្មី លោក ជីប ភក្តីភាព ដែលបានជាប់ឡើងពីការបោះឆ្នោតគាំទ្រ គឺជាស្ថាប័នតំណាងវិស័យឯកជនក្នុងខេត្ត ដែលបានទាក់ទាញ ការវិនិយោគ ដើម្បីអភិវឌ្ឍន៍ សេដ្ឋកិច្ចខេត្តឲ្យមានការរីកចម្រើន ស្របតាមគោលនយោបាយរបស់រាជរដ្ឋាភិបាលកម្ពុជា ដែលមាន សម្តេច តេជោ ហ៊ុន សែន ជានាយករដ្ឋមន្ត្រី ដើម្បីបង្កើតការងារលើកកម្ពស់ សហគ្រាសធុនតូច និងមធ្យម សហគ្រិនភាព ពង្រឹងភាពប្រកួតប្រជែងនិងជាក្បាលម៉ាស៊ីនដ៏សំខាន់ ក្នុងការជួយជំរុញសេដ្ឋកិច្ចក្នុងខេត្ត ឲ្យមាន ដំណើរ ការ បានឆាប់រហ័សបន្ថែមទៀត។ មួយវិញទៀត គ្រប់សមាជិកសភាពពាណិជ្ជកម្មទាំងអស់ នៅក្នុងខេត្តត្រូវតែមូលមតិគ្នា ឯកភាពគ្នាជាធ្លុងមួយ ពិសេសត្រូវតែរួមសាមគ្គីផ្ទៃក្នុងឲ្យបានរឹងមាំ ហើយ ត្រូវតែផ្តល់ ភាពទំនុកចិត្ត និងសង្ឃឹមទៅដល់អ្នកវិនិយោគទុក ដែលមានបំណងចង់មករកស៊ីបណ្តាក់ទុន នៅក្នុងខេត្ត តាកែវ របស់យើង ហើយក៏ត្រូវចេះគៀរគររក អ្នកវិ និយោគ ឲ្យបានច្រើន ដើម្បីធ្វើយ៉ាងណា ឲ្យបងប្អូន ប្រជាពលរដ្ឋ មានក្តីសង្ឃឹម និងជឿជាក់មកលើ សភាពាណិជ្ជកម្មខេត្តថ្មី ។
បន្ទាប់ពីត្រូវបានតែងតាំងជាប្រធានសភាពាណិជ្ជកម្មប្រចាំខេត្តតាកែវ លោក ជីប ភក្តីភាព បានធ្វើការប្តេជ្ញាចិត្តដោយខិតខំឲ្យអស់ពីសមត្ថភាព និងលទ្ធភាពដែលមាន ដើម្បីបំពេញភារកិច្ចរបស់អង្គភាពនៃសភាពាណិជ្ជកម្មខេត្ត បោះជំហានឆ្ពោះទៅរក ភាពជោគជ័យមួយ គឺផ្តល់ជូនជាវិជ្ជមានចំពោះប្រជាពលរដ្ឋក្នុងខេត្តតាកែវ សមស្របទៅនឹងគោល នយោបាយ របស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំដ៏ឈ្លាសវៃ ៕ ដោយ៖តាកែវ
