តាកែវ៖ ដោយមើលឃើញពីតម្រូវការចាំបាច់លើវិស័យអប់រំនៅកម្ពុជា ដែលកំពុងត្រូវការធនធានមនុស្ស សម្រាប់មកបម្រើការងារជួយដល់សង្គមជាតិ អង្គការស្ពានកម្ពុជាហូឡង់ បានធ្វើការជួយដល់វិស័យអប់រំ លើការសាងសង់អគារសិក្សាមួយខ្នង មាន៦បន្ទប់ ជូនដល់វិទ្យាល័យត្នោតជុំ ស្ថិតនៅឃុំអូរសារាយ ស្រុកត្រាំកក់ខេត្តតាកែវ ដែលចំណាយថវិកា ជាង ៥ម៉ឺនដុល្លារ រួមជាមួយប្រាក់បដិភាគរបស់សហគមន៍ក្នុងមូលដ្ឋាន ជាង១ម៉ឺនដុល្លារបន្ថែមទៀត ដើម្បីសម្រួលដល់ការសិក្សារបស់សិស្ស ។
ម្ចាស់ជំនួយតំណាងឲ្យអង្គការស្ពានកម្ពុជាហូឡង់ បានមានប្រសាសន៍ថា សាលារៀនដែលពួកគាត់បានផ្តល់ជូននេះ គឺក្នុងគោលបំណងជួយលើវិស័យអប់រំរបស់កម្ពុជា ដើម្បីពង្រីកធនធានមនុស្សសម្រាប់ជួយដល់សង្គមជាតិ ។ ដូច្នេះបន្ទាប់ពីការដាក់សម្ពោធនេះ សូមឲ្យលោកគ្រូអ្នកគ្រូ និងសិស្សានុសិស្សទាំងអស់ចូលរួមថែរក្សា ជាពិសេសគឺ សម្អាតបរិស្ថានជុំវិញសាលារៀនឲ្យបានស្អាត និងមានអនាម័យល្អ ទើបធ្វើឲ្យការសិក្សារបស់យើងមានការរីកចម្រើន ។
ថ្លែងជាមួយគ្នានេះដែរ លោក អ៊ូច ភា អភិបាលខេត្តតាកែវ ក៏បានជំរុញឲ្យលោកគ្រូអ្នកគ្រូជាពិសេសនាយកសាលា ត្រូវតែយកចិត្តទុក្ខដាក់លើការងារបង្រៀន និងរៀនរបស់សិស្សឲ្យបានហ្មត់ចត់ ដើម្បីឲ្យសិស្សបានប្រឡងជាប់នៅនិទ្ទេសល្អ ដែលជាកិត្តិយសមួយសម្រាប់សាលារបស់ខ្លួន ។ មួយវិញទៀត ចំពោះសិស្សានុសិស្សត្រូវតែខិតខំប្រឹងប្រែងរៀនសូត្រ ជាពិសេសត្រូវប្រតិបត្តិលើវិន័យរបស់សាលារៀនឲ្យបានល្អ និងត្រូវជៀសឆ្ងាយពីគ្រឿងញៀន និងអំពើអបាយមុខ ងាកមកកាន់សៀវភៅអាន ដើម្បីពង្រីកនូវការយល់ដឹងរបស់ខ្លួនបន្ថែមទៀត ទើបយើងអាចឈានជើងចូលក្នុងចំណោមយុវជនឆ្នើមបាន ។
លោក ចាន់ សារុន អ្នកតំណាងរាស្ត្រមណ្ឌលតាកែវ បានលើកឡើងថា នេះជាសមិទ្ធផលថ្មីមួយទៀតដែលប្រជាពលរដ្ឋក្នុងមូលដ្ឋានរបស់យើងទទួលបាន សូមឲ្យបងប្អូនចូលរួមជួយថែរក្សា និងខិតខំធ្វើឲ្យបានជោគជ័យ នៅគោលបំណងរបស់ម្ចាស់ជំនួយដែលចង់ឲ្យកម្ពុជាសំបូរទៅដោយធនធានមនុស្ស ។
ចុងបញ្ចប់នៃកម្មវិធីក៏មានពិធីបំពាក់មេដៃ និងលិខិតថ្លែងអំណរគុណដល់អង្គការ និងសប្បុរជន ដែលបានចូលរួមជួយក្នុងការសាងសង់អគារសិក្សាមួយខ្នងនេះ ហើយអង្គការស្ពានហូឡង់ ក៏បានចែកកង់ ដល់កុមារកំព្រាផងដែរ ដើម្បីជាមធ្យោបាយក្នុងការធ្វើដំណើរមកសិក្សា ៕ដោយ៖ តាកែវ
