ភ្នំពេញ ៖ រដ្ឋបាលរាជធានីភ្នំពេញចាប់ផ្តើមរៀបចំផែនការការពារសន្តិសុខសណ្តាប់ធ្នាប់ក្នុងឱកាសព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នាពេលខាងមុខនេះ ដើម្បីធានាបានសុខសុវត្ថិភាពជូនប្រជាពលរដ្ឋមកកម្សាន្តនៅព្រះរាជពិធីបុណ្យនេះប្រកបដោយភាពសប្បាយរីករាយ។
លោក ឃួង ស្រេងអភិបាលរាជធានីភ្នំពេញបានថ្លែង ពីការរឹតបន្តឹ ងសន្តិសុខសណ្តាប់យ៉ាងតឹងរ៉ឹងជទីបំផុតក្នុងឱកាសព្រះរាជពិធីបុណ្យអុំទូកនាថ្ងៃទី១០ , ១១ និងថ្ងៃទី១២ ខែវិច្ឆិកាខាងមុខនេះ ដោយមានការពង្រាយកម្លាំងដើរល្បាត និងដាក់បុស្តិ៍ឈរជើងការពារ២៤ម៉ោង លើ២៤ម៉ោងជុំវិញបរិវេណប្រារព្ធពិធី និងក្រៅបរិវេណកន្លែងប្រារព្វពិធី។
ថ្លែងក្នុងកិច្ចប្រជុំស្តីពីផែនការការពារនិងគ្រប់គ្រងសណ្តាប់ធ្នាប់នាឱកាស ព្រះរាជពិធីបុណ្យអុំទូកជាមួយមន្ត្រីជំនាញក្រោមឱវាទសាលារាជធានីភ្នំពេញនៅរសៀលថ្ងៃទី១៤ខែតុលានៅសាលារាជធានីភ្នំពេញ លោក អភិបាលបានបញ្ជាក់ថា ការរៀបចំផែនការការពារនិង កម្លាំងការពារសន្តិសុខនេះគឺដើម្បីរៀបចំជាមុនក្នុងការគ្រប់គ្រងស្ថានការណ៍បទល្មើស ការបង្កចលាចលនិងឧប្បទ្ទវហេតុគ្រោះថ្នាក់ផ្សេងៗនៅក្នុងកន្លែងប្រារព្ធព្រះរាជពិធី ខណៈដែលព្រះរាជពិធីបុណ្យនេះមានមនុស្សចូលរួមច្រើនងាយប្រឈមភាពងាយរងគ្រោះថ្នាក់កើតឡើងច្រើនជាយថាហេតុ។
លោក បានបញ្ជាក់ថា ដើម្បីធានាឲ្យព្រះរាជពិធីបុណ្យនេះបានប្រព្រឹត្តទៅដោយរលូនប្រកបដោយភាពសប្បាយរីករាយផែនការរបស់រាជធានីភ្នំពេញក៏បាន រៀបចំជាគណៈកម្មការជាច្រើនទៀត ដូចជាការគ្រប់គ្រងសន្តិសុខសណ្តាប់ធ្នាប់ គ្រប់គ្រងកន្លែងចំណតទូកនិង ក្រុមកីឡាករ ការរៀបចំសណ្តាប់ធ្នាប់សាធារណៈ តំបន់សប្បាយភាព និង គណៈកម្មការ ផ្សេងៗទៀត៕ ដោយ៖កូឡាប
