ខេត្តព្រះសីហនុ៖ កម្លាំងនគរបាលខេត្តព្រះសីហនុ បានឃាត់ខ្លួនជនជាតិចិនចំនួន៤នាក់ ក្រោយធ្វើសកម្មភាពលួចកាច់បំបែកសោ-កម៉ូតូ និងវាយប្លន់ជនជាតិចិនដូចគ្នាកាលពីថ្ងៃទី១៣ ខែតុលា ឆ្នាំ២០១៩ នៅម្តុំឧតុនិយម សង្កាត់៣ ក្រុង-ខេត្តព្រះសីហនុ។
ជនសង្ស័យទាំង៤នាក់មាន ៖ ឈ្មោះ Zhou Wen អាយុ២៥ឆ្នាំ មុខរបរមិនពិតប្រាកដ ស្នាក់នៅភូមិ៤សង្កាត់៤ ក្រុងព្រះសីហនុ, ឈ្មោះ Tan Bei អាយុ២៩ឆ្នាំ មុខរបរ មិនពិតប្រាកដ ស្នាក់នៅភូមិ២សង្កាត់២ ក្រុងព្រះសីហនុ, ឈ្មោះ Lin Wei អាយុ២៩ឆ្នាំ មុខរបរមិនពិតប្រាកដ ស្នាក់នៅភូមិ៥ សង្កាត់៤ ក្រុងព្រះសីហនុ និងឈ្មោះ Li HongLiang អាយុ៤២ឆ្នាំ មុខរបរមិនពិតប្រាកដ ស្នាក់នៅភូមិ៤សង្កាត់៤ ក្រុងព្រះសីហនុ។
ការឃាត់ខ្លួននេះ សមត្ថកិច្ចបានចាប់បានវត្ថុតាងរួមមាន៖ ឧបករណ៍សំរាប់ចម្លងសោរ, ឧបករណ៍សំរាប់ឆ្កឹះសោរ, សក់ក្លែងក្លាយចំនួន២ (សំរាប់ប្រព្រឹត្តបទល្មើសឧក្រិដ្ឋ), ស្រោមមុខខ្មៅ ឃើញតែរង្វង់ភ្នែកចំនួន៤(សំរាប់ប្រព្រឹត្តបទល្មើសឧក្រិដ្ឋ), ដំបងដែករលាស់ចំនួន២ដើម, មួកចំនួន ៣, ពិលឆក់ចំនួន១, វិទ្យុទាក់ទងចំនួន១, ម៉ាស៊ីនឆូតលុយចំនួន១, លិខិតឆ្លងដែន ចំនួន២ច្បាប់, ផ្លែកាច់សោ-កម៉ូតូចំនួន១៤ ផ្លែ, ដងសំរាប់កាច់បំបែកសោរកម៉ូតូលេខ៨ ចំនួន២ដើម, ដែកកាច់បំបែកសោ Solex ២ដើម, ឧបករណ៍សំរាប់បើកLock សន្ទះសោរម៉ូតូ១, ម៉ាស់ចំនួន១០, សោរម៉ូតូចំនួន៣, សោរអក្សរ T ចំនួន២, ឧបករណ៍សំរាប់បំបែកកញ្ចក់រថយន្តចំនួន ១, ឧបករណ៍សំរាប់ផ្តាច់ប្រព័ន្ធ Lock រថយន្ត ចំនួន១, ឧបករណ៍សំរាប់កាច់បំបែកសោរទូរដែកចំនួន១, ឧបករណ៍សំរាប់ឆ្កឹះសោរទា្វររថយន្ត, ទ្វារផ្ទះ, សោរម៉ូតូ, សោរផ្ទះមួយចំនួនធំ និងម៉ូតូម៉ាក Air Blade ចំនួន៦គ្រឿង។
ករណីខាងលើនេះ កម្លាំងជំនាញការិយាល័យនគរបាលព្រហ្មទណ្ឌកម្រិតស្រាល កំពុងបញ្ជូនជនសង្ស័យ ទៅកាន់សាលាដំបូងខេត្តព្រះសីហនុ ដើម្បីបន្តនីតិវិធីតាមច្បាប់៕ ដោយ៖ ដែន សីមា