រដ្ឋមន្រ្តីរតនាគារអាមេរិចលោក Steven Mnuchin បានធ្វើការព្រមានចិនថានឹងកំណត់ពន្ធថ្មី លើទំនិញនាំចូលពីចិន ដែលមានតម្លៃ ១៥៦ពាន់លានដុល្លារ ប្រសិនជាកិច្ចព្រមព្រៀងពាណិជ្ជកម្មរវាងប្រទេសទាំងពីរ មិនអាចបញ្ចប់មុនថ្ងៃទី ១៥ ខែធ្នូបាននោះទេ។
លោកបានថ្លែងថា លោកសង្ឃឹមថា កិច្ចចរចាពាណិជ្ជកម្មរវាងអាមេរិច និងចិន នឹងត្រូវព្រមព្រៀងគ្នានាពេលចុងបញ្ចប់។
កាលពីថ្ងៃសុក្រកន្លងទៅនេះ ប្រធានាធិបតីដូណាល់ ត្រាំ បានប្រកាសពន្យារពេលដំឡើងពន្ធពី ២៥ ទៅ ៣០ភាគរយ លើទំនិញនាំចូលពីចិន ដោយសារតែប្រទេសទាំងពីរ កំពុងតែធ្វើការចរចាពាណិជ្ជកម្ម។
លោកដូណាល់ ត្រាំ បាននិយាយថា អ្នកចរចាបានសម្រេចកិច្ចព្រមព្រៀងមួយ រួមមានការបង្កើនទិញផលិផលកសិកម្ម ដោះស្រាយបញ្ហាសេវាកម្មហិរញ្ញវត្ថុ និងការលួចបច្ចេកវិទ្យា។
លោកត្រាំ បាននិយាយថា “ពួកយើងបានមកដល់ដំណាក់កាលព្រមព្រៀងគ្នា ដែលនឹងសរសេរលើក្រដាស។” លោកបន្ថែមថា អ្នកចរចារនឹងធ្វើការពិភាក្សា លើដំណាក់បន្ថែមភ្លាម នៅពេលកិច្ចព្រមព្រៀងនេះត្រូវបានកត់ត្រាលើក្រដាស។
លោកក៏បានថ្លែងថា លោកប្រហែលនឹងធ្វើការចុះហត្ថលេខាលើកិច្ចព្រមព្រៀង ពាណិជ្ជកម្មជាមួយនឹងប្រធានាធិបតីចិន ស៊ី ជិនពីង នៅក្នុងកិច្ចប្រជុំកំពូលអង្គការសហប្រជាជាតិ នៅក្នុងប្រទេសឈីលី ក្នុងខែធ្នូខាងមុខ។
ទោះយ៉ាងណា មន្រ្តីចិនមានការប្រុងប្រយ័ត្ន ក្នុងការថ្លែងចំពោះលទ្ធផលនៃកិច្ចចរចា ដោយពួកគេគ្រាន់តែអះអាងថា កិច្ចប្រជុំរវាងប្រទេសទាំងពីររីកចម្រើន។
កាលពីសប្តាហ៍មុន មន្រ្តិអាមេរិចក៏បានព្រមានថា ការយកពន្ធនាំចូលលើមុខទំនិញផ្សេងៗទៀត របស់ចិន នៅតែស្ថិតក្នុងជម្រើសដដែល៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
