ខេត្តស្វាយរៀងៈ លោក ជុំ ហាត ប្រធានក្រុមប្រឹក្សាខេត្ត លោក ម៉ែន វិបុល អភិបាលខេត្តស្វាយរៀង នាព្រឹកថៃ្ងអង្គារ៍២រោច ខែអស្សុជ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៥ ខែតុលា ឆ្នាំ២០១៩នេះ នៅសាលាខេត្តស្វាយរៀង បានដឹកនាំ មន្រ្តីរាជការ មន្ទីរ-អង្គភាពជុំវិញខេត្ត កងកម្លាំងប្រដាប់អាវុធ លោកគ្រូអ្នកគ្រូ មេឃុំ ចៅសង្កាត់សរុបចំនួន៥០០នាក់ ចូលរួមគោរពព្រះវិញ្ញាណក្ខន្ធគម្រប់ខួប៧ឆ្នាំ ព្រះករុណាសម្តេចព្រះបាទនរោត្តម សីហនុ បន្ទាប់ពីព្រះអង្គយាងចូលទិវង្គត កាលពីថ្ងៃទី១៥ តុលា ឆ្នាំ២០១២ និងបានរាប់បាត្រប្រគេនព្រះសង្ឃចំនួន៩អង្គ ដើម្បីឧទ្ទិសថ្វាយព្រះរាជកុសលដល់ព្រះវិញ្ញាណក្ខន្ធ ព្រះករុណា សម្តេចព្រះបាទ នរោត្តមសីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះករុណា ព្រះបរមរតនកោដ្ឋ។
បន្ទាប់ពីព្រះសង្ឃជយន្តោ ថ្នាក់ដឹកនាំខេត្តមន្រ្តីរាជការ កងកម្លាំងប្រដាប់អាវុធ ទាំងអស់បានអញ្ជើញគោរពព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ បន្ទាប់មកលោកប្រធានមន្ទីរធម្មការ និងសាសនាខេត្ត បានអាននូវព្រះរាជជីវប្រវត្តិសង្ខេប របស់ព្រះករុណា សម្តេចព្រះបាទ នរោត្តម សីហនុ ដោយមានខ្លឹមសារថា ព្រះអង្គទ្រង់ប្រសូត្រ នៅថ្ងៃអង្គារ ទី៣១ ខែតុលា ឆ្នាំ១៩២២ នៅរាជធានីភ្នំពេញ ព្រះអង្គឡើងគ្រងរាជសម្បត្តិនៅថ្ងៃទី២៨ ខែតុលា ឆ្នាំ១៩៤១ ព្រះអង្គបានបំពេញព្រះរាជបូជនីយកិច្ច ទាមទារឯករាជ្យបានទាំងស្រុង ពីអាណានិគមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣។ បន្ទាប់មកព្រះអង្គជាព្រះប្រមុខរដ្ឋ ព្រះអង្គមានស្នាព្រហស្ថ ធំធេង ឧត្តុងឧត្តម កសាងអភិវឌ្ឍន៍ប្រទេសជាតិ មានការរីកចម្រើនគួរឲ្យកត់សម្គាល់។
សមិទ្ធផលទាំងនោះមាន សកលវិទ្យាល័យ មហាវិទ្យាល័យ ជាច្រើនជំនាញ ស្ថានីយទូរទស្សន៍ មន្ទីរពេទ្យមិត្តភាពខ្មែរសូវៀត រោងចក្រចំរាញ់ប្រេងកាត រោងចក្រស្រាបៀរ រោងចក្រដំឡើងត្រាក់ទ័រ និង រថយន្តធំ រោងចក្រស្ករស រោងចក្រវាយនភណ្ឌ រោងចក្រក្រចៅ រោងចក្រស៊ីម៉ងត៍ រោងចក្រកែវ រោងចក្រក្តារបន្ទះ រោងចក្រក្រដាស់ រោងចក្រជី រោងចក្រកង់ឡាន រោងចក្រត្រីខប្រអប់ រោងចក្រផលិតជ័រកៅស៊ូ រោងចក្រវារីអគ្គិសនី និង សមិទ្ធផលច្រើនទៀត នៅតាមបណ្តាខេត្ត ស្រុក មានសាលារៀន មន្ទីរពេទ្យ ទំនប់ប្រឡាយ ស្ពានថ្នល់ជាដើម។ ព្រះអង្គបានទទួលរងគ្រោះដោយរដ្ឋប្រហារ មិនស្របច្បាប់មួយ នៅភ្នំពេញ គឺជារដ្ឋប្រហារយោធាដែលមានលន់ នល់ ជាមេខ្លោងនៅថ្ងៃអង្គារ ទី១៨ ខែមិថុនា ឆ្នាំ១៩៧០។
ព្រះអង្គបានធ្វើព្រះរាជមាតុភូមិនិវត្តន៍ មកកាន់រាជធានីភ្នំពេញវិញ នៅថ្ងៃអង្គារ ទី១៤ ខែវិច្ឆិកា ឆ្នាំ១៩៩១ ព្រះអង្គបានគង់ជាម្លប់សម្រាប់ប្រជារាស្រ្ត រហូតដល់ព្រះអង្គយាងចូលព្រះទិវង្គត នៅវេលាម៉ោង១ និង ២០នាទី យប់រំលងអធ្រាត្រ ម៉ោងនៅរាជធានីភ្នំពេញ នៅថ្ងៃទី១៥ ខែតុលា ឆ្នាំ២០១២ នៅមន្ទីរពេទ្យមួយក្នុងក្រុងប៉េកាំង ប្រទេសចិន ក្នុងព្រះជន្ម៩០ព្រះវស្សា ដោយព្រះជរាពាធ។
លោក អភិបាលខេត្ត ព្រមទាំងអ្នកចូលរួម ក៏បានប្រគេនសាដក និងបច្ច័យ ដល់ព្រះសង្ឃ៩អង្គ ដើម្បីថ្វាយព្រះរាជកុសលដល់ព្រះវិញ្ញាណក្ខន្ធ ព្រះករុណា សម្តេចព្រះបាទ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និង ឯកភាពជាតិខ្មែរ ព្រះករុណា ព្រះបរមរតនកោដ្ឋ៕ ដោយ៖ វ៉ៃកូ