ភ្នំពេញ៖ នៅល្ងាចថ្ងៃទី១៥ខែតុលានេះ ក្រុមបាល់ទាត់កម្ពុជា នឹងជួបប្រកួតជាមួយក្រុមជម្រើសជាតិអ៊ីរ៉ាក់ នៅពហុកីឡដ្ឋានជាតិអូឡាំពិក ដែលស្ថិតនៅក្នុងការប្រកួតក្នុងពូល C ជុំទី២ FIFA World Cup។
ថ្លែងនៅក្នុងសន្និសីទសារព័ត៌មាន កាលពីថ្ងៃចន្ទ លោក Felix G.Dalmas គ្រូបង្គោលជម្រើសជាតិកម្ពុជា នៅតែបង្ហាញនូវទស្សនៈវិស័យ ក្នុងការអភិវឌ្ឍវិស័យកីឡាបាល់ទាត់កម្ពុជា ទៅមុខជានិច្ច បើទោះបីជាក្រុមកម្ពុជាបានឆ្លងកាត់ការប្រកួតកន្លងទៅចាញ់ម្ចាស់ផ្ទះ អ៊ីរ៉ង់ ១៤ទល់០ ហើយបន្តជួបក្រុមជម្រើសជាតិអ៊ីរ៉ាក់ដែលសុទ្ធសឹងជាក្រុមខ្លាំងនៅអាស៊ីក៏ដោយ។
គ្រូបង្គោលក្រុមបាល់ទាត់ជម្រើសជាតិកម្ពុជារូបនេះ អះអាង ក្រុមកម្ពុជាបានត្រៀមខ្លួនរួចរាល់សម្រាប់ជួបជាមួយក្រុមអ៊ីរ៉ាក់ ហើយលោកមើលឃើញថា ក្រុមអ៊ីរ៉ាក់ជាក្រុមមួយខ្លាំង នៅក្នុងចំណោមក្រុមខ្លាំងៗនៅក្នុងទ្វីបអាស៊ី ហើយកីឡាករអ៊ីរ៉ាក់មានគុណភាពបច្ចេកទេសល្អ ជាមួយនឹងកាយសម្បទាល្អដែរ ប៉ុន្តែទោះយ៉ាងនេះក្តី ក៏ក្រុមកម្ពុជា នឹងប្រឹងប្រែងឲ្យអស់ពីសមត្ថភាព។ លោក Felix បន្ថែមថា កីឡាករជម្រើស១១នាក់ ដំបូងរបស់អ៊ីរ៉ាក់ ជាពិសេសគឺខ្សែប្រយុទ្ធសុទ្ធតែមានគុណភាពខ្ពស់ៗ ដែលលេងនៅក្នុងលីគកំពូលទ្វីបអឺរ៉ុប។ ពេលនេះកម្ពុជាត្រូវជួបជាមួយក្រុមខ្លាំងៗ ខុសពីការប្រកួតកន្លងទៅ ប៉ុន្តែយើងនៅតែប្តេជ្ញាចិត្តខ្ពស់ ក្នុងឆន្ទៈអភិវឌ្ឍវិស័យកីឡាបាល់ទាត់ ឲ្យកាន់តែរីកចម្រើនទៅមុខទៀត ដោយវិធីតែមួយគត់ គឺយើងត្រូវតែខិតខំប្រកួតប្រជែង ក្រោកឡើងប្រយុទ្ធជាមួយពួកគេ ហើយប្រសិនបើយើងអង្គុយចាំតែការពារ ដែលនោះមិនមែនជាគោលដៅនៃការអភិវឌ្ឍនោះឡើយ។
លោក Strichko Katanetch គ្រូជម្រើសជាតិអ៊ីរ៉ាក់ថ្លែងដែរថា លោកបានផ្តល់ដំបូន្មានដល់កីឡាកររបស់លោកថា មិនត្រឹមតែប្រមូលអារម្មណ៍ខិតខំប្រកួតឲ្យបានល្អត្រឹម១០០%ប៉ុណ្ណោះទេ គឺត្រូវតែបង្កើនការលេង រហូតដល់១២០%ឯណោះ ពីព្រោះថាលទ្ធផលដ៏អាក្រក់មួយវាអាចនឹងកើតឡើង សម្រាប់ក្រុមរបស់លោកដូចគ្នា ប្រសិនបើយើងធ្វើមិនបានល្អ។ វាជារឿងដ៏លំបាកមួយ ដែលក្រុមកម្ពុជាលេងជាមួយក្រុមខ្លាំងមួយនៅក្នុងអាស៊ី។
លោកតែងតែរំលឹកជាញឹកញាប់ដល់ក្រុមរបស់ខ្លួនថា បាល់ទាត់វាអាចផ្លាស់ប្តូរ និងអាចកើតឡើងនូវលទ្ធផលមិនដូចអ្វីដែលយើងចង់បាន ដូច្នេះហើយយើងត្រូវប្រឹងប្រែងឲ្យអស់ ពីសមត្ថភាពដូចគ្នា ដោយការលើកឡើងបែបនេះ មិនមែនជាការបន្លាចកូនក្រុមខ្លួនឡើយ ប៉ុន្តែជាការជំរុញទឹកចិត្តឲ្យមានស្មារតីខិតខំបន្ថែមទៀត ដើម្បីដណ្តើមយកជ័យជម្នះឲ្យខាងតែបានសម្រាប់ការប្រកួត ឲ្យស្របតាមគោលដៅដែលចង់ឆ្លងផុតជុំទី២នេះ ហើយបន្តសិទ្ធិឡើងទៅប្រកួតនៅជុំទី៣ទៀត៕ដោយ៖បញ្ញាស័ក្តិ