ព្រះសីហនុ៖ សាលាដំបូង និងអយ្យការអមសាលាដំបូងខេត្តព្រះសីហនុ រួមទាំងនាយកដ្ឋានអាជ្ញាសាលា នៃអគ្គនាយកដ្ឋានអភិវឌ្ឍន៍វិស័យយុត្តិធម៌ នៃក្រសួងយុត្តិធម៌ ដែលបានផ្តួចផ្តើមរៀបចំកិច្ចប្រជុំផ្សព្វផ្សាយ តួនាទី និងភារកិច្ច ស្ថាប័នអនុវត្តន៍ និង នីតិវិធីអនុវត្តដោយបង្ខំនេះឡើង ដើម្បីពង្រឹងការយល់គ្នាទៅវិញទៅមក នៃគល់តួអង្គនានា ដែលធ្វើសកម្មភាពពាក់ព័ន្ធនឹងកិច្ចការអាជ្ញាសាលាតាមសភាពការវិវត្តន៍ជាក់ក្នុងខេត្តនេះ។
លោក នាង ស៊ីណាវឌ្ឍនៈ អគ្គនាយករង នៃអគ្គនាយកដ្ឋានអភិវឌ្ឍន៍វិស័យយុត្តិធម៌ បានថ្លែងក្នុងកម្មវិធីបិទកិច្ចប្រជុំផ្សព្វផ្សាយស្តីពី
“តួនាទី និងភារកិច្ច ស្ថាប័នអនុវត្ត” និង នីតិវិធីអនុវត្តដោយបង្ខំ នៅសាលាខេត្តព្រះសីហនុ នាថ្ងៃទី១៦ ខែតុលា ឆ្នាំ២០១៩។
លោក បានបន្តថា ឆ្លងតាមរបាយការណ៍ បទបង្ហាញ និងការពិភាក្សាក្នុងកិច្ចប្រជុំផ្សព្វផ្សាយនេះ យើងទាំងអស់គ្នា
ពិតជាបានជ្រាបហើយថា វិជ្ជាជីវៈអាជ្ញាសាលា គឺជាវិជ្ជាជីវៈតុលាការមួយ ដែលទទួលបន្ទុកជាអាទិ៍ ការអនុវត្ត
សេចក្តីសម្រេចរបស់សាលាជម្រះក្តីគ្រប់ជាន់ថ្នាក់ និងកិច្ចការបញ្ជូន ពោលគឺជាតួអង្គមួយដ៏សំខាន់ និងចាំបាច់ ក្នុងការដាក់ឱ្យចេញជារូបរាងនូវសេចក្តីសម្រេចរបស់សាលាជម្រះក្តី។
វាគ្មិនរបស់យើងបានធ្វើការឆ្លុះបញ្ចាំងប្រកបដោយខ្លឹមសារទូលំទូលាយពាក់ព័ន្ធនឹងតួនាទីជាសារវន្ត របស់អាជ្ញាសាលាក្នុងការអនុវត្តដោយបង្ខំ ស្ថាប័នអនុវត្តដោយបង្ខំ សិទ្ធិ និងករណីកិច្ចរបស់អាជ្ញាសាលាក្នុងពេលអនុវត្តដោយបង្ខំ ជាពិសេសទំនាក់ទំនងសមត្ថកិច្ចរវាងអាជ្ញាសាលា និងតុលាការ។
តួអង្គដែលទទួលបន្ទុកកិច្ចការអាជ្ញាសាលា មានការវិវត្តន៍គួរជាទីកត់សម្គាល់ ដែលទាមទារឱ្យមន្ត្រីអនុវត្តច្បាប់ អាជ្ញាធរ និងស្ថាប័នពាក់ព័ន្ធ យកចិត្តទុកដាក់ និងធ្វើការស្វែងយល់ឱ្យបានច្បាស់លាស់ និងគ្រប់ជ្រុងជ្រោយ។ ក្នុងន័យនេះ ព្រះរាជអាជ្ញា និងព្រះរាជអាជ្ញារង នៃអយ្យការអមសាលាដំបូង ត្រូវបានប្រគល់ភារកិច្ចជាមន្ត្រីទទួលបន្ទុកកិច្ចការអាជ្ញាសាលា តាមរយៈប្រកាសលេខ ៣០ កយ.ប្រក/១៧ ចុះថ្ងៃទី១៩ ខែកក្កដា ឆ្នាំ២០០៧ របស់ក្រសួងយុត្តិធម៌ រហូតដល់ថ្ងៃទី៣០ ខែមករា ឆ្នាំ២០១៩។ បន្ទាប់ពីមន្ត្រីអាជ្ញាសាលាត្រូវបានបណ្តុះបណ្តាល និងចាត់តាំងដោយក្រសួងយុត្តិធម៌ ឱ្យទៅប្រចាំការនៅសាលាដំបូង
និងអយ្យការអមសាលាដំបូងរាជធានី-ខេត្តរួចមក និង ស្របតាមប្រកាសរបស់ក្រសួងយុត្តិធម៌ ចុះថ្ងៃទី ៣០
ខែមករា ឆ្នាំ២០១៩ ស្តីពីបែបបទសម្រាប់អនុវត្តការងាររបស់មន្ត្រីអាជ្ញាសាលានៃក្រសួងយុត្តិធម៌ កិច្ចការ
អាជ្ញាសាលាត្រូវបានប្រគល់ជូនមន្ត្រីអាជ្ញាសាលាក្នុងក្របខ័ណ្ឌនៃដែនសមត្ថកិច្ចនៃសាលាដំបូង និងអយ្យការ
អមសាលាដំបូងដែលខ្លួនប្រចាំការ ប៉ុន្តែចំពោះសាលាដំបូង និងអយ្យការអមសាលាដំបូងដែលពុំទាន់មាន
មន្ត្រីអាជ្ញាសាលាប្រចាំការ កិច្ចការអាជ្ញាសាលាគឺត្រូវអនុវត្តន៍ដដែលដោយព្រះរាជអាជ្ញា ឬព្រះរាជអាជ្ញារង។
លោកថា តាងនាមក្រសួងយុត្តិធម៌ និងក្នុងនាមខ្លួនខ្ញុំផ្ទាល់ ខ្ញុំជឿជាក់យ៉ាងមុតមាំថា សិក្ខាកាមទាំងអស់បាន
ជ្រួតជ្រាបបន្ថែមទៀតអំពីសមត្ថកិច្ច តួនាទី និងភារកិច្ចរបស់អាជ្ញាសាលា ជាពិសេសសិទ្ធិអំណាចក្នុងការស្នើសុំកងកម្លាំង ដើម្បីធានាប្រសិទ្ធភាពនៃការអនុវត្តសេចក្តីសម្រេចរបស់សាលាជម្រះក្តីគ្រប់ជាន់ថ្នាក់។ លោក
ក៏សង្ឃឹមជឿជាក់ផងដែរថា អាជ្ញាធរ និងស្ថាប័នមានសមត្ថកិច្ច នឹងបន្តផ្តល់កិច្ចសហការយ៉ាងសកម្ម និង
ប្រកបដោយស្មារតីទទួលខុសត្រូវខ្ពស់ ដល់មន្ត្រីអាជ្ញាសាលារបស់ក្រសួងយុត្តិធម៌ ក្នុងការបំពេញភារកិច្ចរបស់ខ្លួន។
លោកបានលើកឡើងថា សាលាដំបូង និងអយ្យការអមសាលាដំបូងខេត្តព្រះសីហនុ រួមទាំងនាយកដ្ឋានអាជ្ញាសាលា នៃអគ្គនាយកដ្ឋានអភិវឌ្ឍន៍វិស័យយុត្តិធម៌ នៃក្រសួងយុត្តិធម៌ដែលបានផ្តួចផ្តើមរៀបចំកិច្ចប្រជុំផ្សព្វផ្សាយ ដ៏មានសារសំខាន់នេះឡើង ជាលើកទី២ នៅខេត្តព្រះសីហនុ ដើម្បីពង្រឹងការយល់គ្នាទៅវិញទៅមកនៃគល់តួអង្គនានា ដែលធ្វើសកម្មភាពពាក់ព័ន្ធនឹងកិច្ចការអាជ្ញាសាលាតាមសភាពការវិវត្តន៍ជាក់ក្នុងខេត្តនេះ និងធានាការពារប្រកបដោយប្រសិទ្ធភាព នូវផលប្រយោជន៍ស្របច្បាប់របស់ភាគី
ដែលបានផ្តល់ដោយសេចក្តីសម្រេចរបស់សាលាជម្រះក្តី៕ដោយ៖កូឡាប
