ភ្នំពេញ៖បុរសម្នាក់ត្រូវបានអ្នកភូមិប្រទះឃើញដេកស្លាប់ កណ្តាលផ្លូវលំមួយកន្លែង ស្ថិតនៅភូមិខ្វិត សង្កាត់សាក់សំពៅ ខណ្ឌដង្កោ រាជធានីភ្នំពេញ កាលពីវេលាម៉ោង៦ព្រឹក ថ្ងៃទី១៦ ខែតុលា ឆ្នាំ២០១៩ ។
សពមានឈ្មោះ មែក ភីន អាយុ ២៨ឆ្នាំ មុខរបរជាងឈើ និងជាងកញ្ចក់ ស្នាក់នៅម្តុំផ្សារស៊ិនជូរី សង្កាត់កាកាបទី១ ខណ្ឌពោធិ៍សែនជ័យ មានស្រុកកំណើតនៅភូមិសំភ្លី ឃុំព្រៃខ្លា ស្រុកកោះអណ្តែត ខេត្តតាកែវ។
ប្រភពព័ត៌មាននៅកន្លែងកើតហេតុ បានឲ្យដឹងថា នៅវេលាម៉ោងប្រហែល១០យប់ ថ្ងៃទី១៥ ខែតុលា ឆ្នាំ២០១៩ អ្នកភូមិនៅទីនោះ បានប្រាប់ឲ្យដឹងថា មានឮសំឡេងជនរងគ្រោះស្រែកជួយផងៗ ជាច្រើនដង តែដោយសាយប់ស្ងាត់ពេក និងជាតំបន់នេះដាច់ស្រយាល ពីផ្ទះអ្នកភូមិផងនោះ ទើបគ្មាននរណាចេញមកជួយ ធ្វើឲ្យជនសង្ស័យមានឱកាសវាយសម្លាប់ជនរងគ្រោះ ប្លន់យកម៉ូតូបានសម្រេច ហើយជិះគេចខ្លួនបាត់ដោយសុវត្ថិភាព។
ប្រភពពីក្រុមសាច់ញាតិជនរងគ្រោះ បានរៀបរាប់ថា ជនរងគ្រោះនិងប្រពន្ធ ចេញពីស្រុកកំណើតមកប្រកបមុខរបរ ជាជាងឈើ និងជាងកញ្ចក់ ចំណែកប្រពន្ធធ្វើជាកម្មកររោងចក្រ ស្នាក់នៅបន្ទប់ជួលនៅម្តុំផ្សារស៊ិនជូរី ដោយប្រពន្ធមានផ្ទៃពោះ៧ខែ ទើបជនរងគ្រោះឆ្លៀតពេលទំនេរ រត់ម៉ូតូឌុប ដើម្បីសន្សំលុយទុកសម្រាប់ឲ្យប្រពន្ធសម្រាលកូន មិននឹកស្មានថា ជនរងគ្រោះជួបរឿងអកុសល បែបនេះសោះ។ សពជនរងគ្រោះ ត្រូវបានសមត្ថកិច្ចប្រគល់ឲ្យក្រុមគ្រួសារ ដឹកយកទៅធ្វើបុណ្យតាមប្រពៃណី ។ ចំណែកសមត្ថកិច្ចកំពុងស្រាវជ្រាវ រកចាប់ជនល្មើស មកផ្តន្ទាទោសទណ្ឌ តាមច្បាប់៕ដោយ៖បញ្ញាស័ក្តិ