ខេត្តស្វាយរៀង៖ បុរសម្នាក់បានរងរបួសបែកឈាមពេញមុខ និងមនុស្ស៣នាក់ទៀតរង របួសស្រាល ដោយសារជួបគ្រោះថ្នាក់ចរាចរមួយ បណ្តាលមកពីអ្នកបើកបររថយន្តហាយឡែនឌ័រ ពណ៌ទឹកប្រាក់ ធ្លាក់ភ្នែកបន្តិច (មានជាតិស្រវឹង) បើកវ៉ាជែងក្នុងសភាពគ្រោះថ្នាក់ ដោយវ៉ារថយន្តកុងតឺន័រ ហើយទាន់ហ្វ្រាំង ត្រូវកុងតឺន័រ បុកពីក្រោយជ្រុលទៅបុករថយន្តហាយឡែនមួយគ្រឿងទៀត បញ្ច្រាសទិសគ្នា បណ្តាលឲ្យមានអ្នករងរបួសតែម្តង។
ករណីគ្រោះថ្នាក់ចរាចរនេះ បានកើតឡើងកាលពីវេលាម៉ោង៣និង៤០នាទីរសៀល ថ្ងៃទី១៥ ខែតុលា ឆ្នាំ២០១៩ នៅលើផ្លូវជាតិលេខ១ ស្ថិតក្នុងភូមិសាមគ្គី សង្កាត់ ច្រកម្ទេស ក្រុង បាវិត ខេត្តស្វាយរៀង។
យោតាមសមត្ថកិច្ចបានឲ្យដឹងថា៖ នៅមុនពេលកើតហេតុ គេឃើញមានរថយន្តហាយឡែនឌ័រមួយគ្រឿង ពណ៌ ទឹកប្រាក់ ពាក់ផ្លាកលេខ ភ្នំពេញ 2AD 8111 បើកបរដោយបុរសម្នាក់ឈ្មោះ សំបូរ សីហា អាយុ ៣៨ឆ្នាំ មុខរបររត់តាក់ស៊ី មានទីលំនៅភូមិ ព្រៃធំ សង្កាត់ ព្រៃអង្គុញ ក្រុង បាវិត ខេត្តស្វាយរៀង ធ្វើដំណើរពីលិចទៅកើត លុះមកដល់ចំណុចកើតហេតុខាងលើ ក៏វ៉ារថយន្តកុងតឺន័រ ស្របពេលនោះ ក៏វាក់រថយន្តមកពីមុខ ហើយជាន់ហ្វ្រាំង ក៏ត្រូវរថយន្តកុងតឺន័រ បុកពីក្រោយជ្រុលទៅបុករថយន្តហាយឡែនឌ័រ ពណ៌ សម្បកឪឡឹក ពាក់ផ្លាកលេខ ភ្នំពេញ 2AX 4453 បើកបរដោយឈ្មោះ ម៉ៅ សីហា អាយុ ៣១ឆ្នាំ មុខរត់តាក់ស៊ី (ដឹកជនជាតិចិន) ធ្វើដំណើរពីកើតទៅលិច ចំចម្ហៀងខាងឆ្វេង ដាច់កង់ តែសំណាងល្អមិនមានគ្រោះថ្នាក់ ដល់អាយុជីវិតនោះទេ។
ក្រោយពីកើតហេតុ សមត្ថកិច្ចចុះមកសម្រួលចរាចរណ៍ ហើយភាគីខាងរថយន្តហាយឡែនឌ័រ ពណ៌ទឹកប្រាក់ សុខចិត្តសងខាងរថយន្តហាយឡែនឌ័រ ពណ៌សម្បកឪឡឹក ដើម្បីបញ្ចប់រឿង៕ដោយ៖វ៉ៃកូ