ខេត្តស្វាយរៀង ៖ លោក រស់ ផា រិទ្ធ អភិបាលរងខេត្តស្វាយរៀង បានមានប្រសាសន៍ថា បើយើងមានជំនាញពិត នឹងធ្វើឲ្យជីវិតប្រសើរឡើង ប្រែក្លាយជាមនុស្សដែលសមត្ថភាពគ្រប់គ្រាន់ ក្នុងការបំពេញការងារ។
លោកអភិបាលរងខេត្ត បានមានប្រសាសន៍ដូច្នេះ ក្នុងឱកាសដែលលោកបានអញ្ជើញជាអធិបតី នៅក្នុងវេទិកាផ្សព្វផ្សាយ ស្តីពី ការអប់រំបណ្តុះបណ្តាលបច្ចេកទេស និងវិជ្ជាជីវៈ នៅវិទ្យាស្ថានពហុបច្ចេកទេស ភូមិភាគតេជោសែនស្វាយរៀង នៅព្រឹកថ្ងៃទី១៦ ខែតុលា ឆ្នាំ២០១៩នេះ។
លោកបានមានប្រសាសន៍បន្តថា ក្រសួងការងារនិងបណ្តុះបណ្តាលវិជ្ជាជីវៈ ក៏ដូចជា វិទ្យាស្ថានពហុបច្ចកទេស ភូមិភាគតេជោសែនស្វាយរៀង ត្រូវទទួលរ៉ាប់រង ការងារធំៗ ក្នុងដំណាក់កាលនៃការវិវឌ្ឍវិស័យបច្ចេកទេស ក៏ដូចជាបដិវត្តន៍ឧស្សាហកម្មជំនាន់ទី៤ (IR4.4) ដើម្បីលើកកម្ពស់គុណភាពបណ្តុះបណ្តាល ផលិតភាពការងារ របស់កម្ម និយោជិក នៅក្នុងតំបន់ជាពិសេសក្នុងខេត្តស្វាយរៀង ត្រូវបានបណ្តាក់ទុន វិនិយោគធំៗ បង្កើន រោងចក្រ សហគ្រាសជាច្រើន ដែលអាចមានលទ្ធភាព ទទួលយកកម្មរឲ្យបម្រើការងារ នៅតាមទីផ្សារការងារ ។
លោកបានបញ្ជាក់ថា បញ្ហាទាំងអស់នេះមានការពាក់ព័ន្ធ ដោយផ្ទាល់ជាមួយវិទ្យាស្ថាន ពហុបច្ចេកទេសភូមិភាគតេជោស្វាយរៀង ដែលមានតួនាទីសំខាន់ ក្នុងក្នុងបណ្តុះបណ្តាល ជំនាញជូនពលរដ្ឋ ដើម្បីឲ្យពួកគាត់ទទួលបាននូវចំណេះដឹង និងមានសមត្ថភាពគ្រប់គ្រាន់ ជាពិសេសទៅទៀតថ្ងៃនេះមានអាជ្ញាធរ លោក លោកស្រីជាមេឃុំ ចៅសង្កាត់ ឪពុកម្តាយអាណាព្យាបាលនិងប្អូនៗសិស្សានុសិស្ស មកពីអនុវិទ្យាល័យ វិទ្យាល័យ ចូលរួមស្តាប់ការផ្សព្វផ្សាយអំពីអត្ថប្រយោជន៍ នៃជំនាញបច្ចេកទេសនិងវិជ្ជាជីវៈ និងជួយផ្សព្វផ្សាយបន្តដល់បងប្អូនប្រជាពលរដ្ឋ និងជំរុញឲ្យមកចុះឈ្មោះចូលរៀន និងជ្រើសរើសយកជំនាញបច្ចេកទេស និងវិជ្ជាជីវៈនៅវិទ្យាស្ថាននេះផងដែរ។
លោកអភិបាលរងខត្តស្វាយរៀង ក៏បានធ្វើការសំណូមពរដល់លោក លោកស្រីរួមសហការ ជាមួយវិទ្យាស្ថាន ក្នុងកំណត់មុខជំនាញសិក្សា ការអភិវឌ្ឍកម្មវិធីសិក្សា ដើម្បីឲ្យស្របតាមស្ថានភាព ទីផ្សារការងារបច្ចុប្បន្ន និងចូលរួមសហការក្នុងការផ្តល់ទីកន្លែង សម្រាប់សិក្ខាកាម សិស្សនិស្សិតក្នុងការចុះកម្មសិក្សា ក៏ដូចជាទទួលសិក្ខាកាមសិស្ស និស្សិតឲ្យចូលបម្រើការងារ នៅពេលបញ្ចប់ការសិក្សា ៕ដោយ៖វ៉ៃកូ
