ព្រះវិហារ៖ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន នៅថ្ងៃទី១៧ ខែតុលា ឆ្នាំ២០១៩ បានឲ្យដឹងថា
ពិតជាគួរឱ្យសោកស្តាយដែលសត្វប្រើសឈ្មោលមួយក្បាលទម្ងន់ប្រមាណ ២០០ គីឡូក្រាមត្រូវបានរត់មកងាប់ក្នុងភូមិបុស្សធំ ឃុំប្រមេរ ស្រុកត្បែងមានជ័យ ខេត្តព្រះវិហារក្បែរនឹងដែនជម្រកសត្វព្រៃព្រះរកា ក្រោយពីត្រូវបានព្រានព្រៃបាញ់សម្លាប់ ដោយប្រើគ្រាប់កាំភ្លើងកែច្នៃ នៅថ្ងៃទី១៦ ខែតុលា ឆ្នាំ ២០១៩នេះ។
លោកថា ការងាប់សត្វប្រើសឈ្មោលមួយក្បាលនេះ បានធ្វើឱ្យសត្វប្រើសចំនួន ៣ ក្បាល ដែលមួយក្បាលៗទម្ងន់ប្រមាណ ២០០ គីឡូក្រាមបានងាប់បាត់បង់ ជីវិតក្នុងរយៈពេល ២ ខែមកនេះនៅក្នុងខេត្តព្រះវិហារក្នុងនោះ ១ ក្បាលងាប់ដោយរថយន្តបុក និង ២ក្បាលងាប់ដោយការបាញ់សម្លាប់របស់ព្រានព្រៃ។
ជំរុញឱ្យកម្លាំងមានសមត្ថកិច្ចបន្តពង្រឹងការអនុវត្តច្បាប់ប្រឆាំងនឹងជនល្មើស អ្នកប្រើប្រាស់អាវុធកែច្នៃខុសច្បាប់។ ពលរដ្ឋមួយចំនួនដែលរស់នៅជុំវិញតំបន់ការពារធម្មជាតិ នៅតែបន្តលួចលាក់កាន់កាប់អាវុធកែច្នៃខុសច្បាប់ និងបានលួចចូលព្រៃបរបាញ់សត្វ និងដាក់អន្ទាក់ចាប់សត្វដែលជាទង្វើខុសច្បាប់ និងត្រូវតែប្រឈមមុខច្បាប់ ប្រសិនបើកម្លាំងសមត្ថកិច្ចចាប់បង្ក្រាបបាន។
លោកបានឱ្យដឹងថា យោងតាមការពិនិត្យកោសល្យវិច័យ របស់មន្ត្រីមន្ទីរបរិស្ថានខេត្តព្រះវិហារ សត្វប្រើសដែលបានស្លាប់នេះ ត្រូវបានព្រានព្រៃបាញ់ត្រូវត្រង់គល់ក ដោយគ្រាប់កាំភ្លើងប្រភេទកែច្នៃ ដែលប្រើសម្រាប់ការបរបាញ់សត្វ ហើយបានរត់គេចមកងាប់នៅក្នុងភូមិបុស្សធំ ដែលស្ថិតនៅជាប់ដែនជម្រកសត្វព្រៃព្រះរការ ក្នុងភូមិសាស្ត្រខេត្តព្រះវិហារ។
តាមការបញ្ជាក់របស់លោក នេត្រ ភក្ត្រា ក្នុងរយៈពេល២ខែចុងក្រោយនេះ សត្វប្រើសចំនួន៣ក្បាលដែលក្នុងមួយក្បាលៗ មានទម្ងន់ប្រមាណ ២០០ គីឡូក្រាម ត្រូវបានងាប់ក្នុងទឹកដីខេត្តព្រះវិហារដែលក្នុង នោះ១ក្បាលត្រូវបានរថយន្តបុកងាប់ និង ២ក្បាលត្រូវបានព្រានព្រៃបាញ់សម្លាប់ហើយ ១ក្បាលចុងក្រោយនេះ ត្រូវបានបាញ់សម្លាប់ នៅថ្ងៃទី១៦ ខែតុលា ឆ្នាំ ២០១៩។
រដ្ឋលេខាធិការនៃក្រសួងបរិស្ថាន លោក នេត្រ ភក្ត្រា បានបង្ហាញការសោកស្តាយយ៉ាងខ្លាំង ចំពោះការបាត់បង់ជីវិតសត្វប្រើសទាំងនេះ ហើយលោក បានជំរុញឱ្យកម្លាំងមានសមត្ថកិច្ច បន្តពង្រឹងការអនុវត្តច្បាប់ប្រឆាំងនឹងជនល្មើស អ្នកប្រើប្រាស់អាវុធកែច្នៃខុសច្បាប់ ដោយថ្លែងថា៖ ពលរដ្ឋមួយចំនួនដែលរស់នៅជុំវិញតំបន់ការពារធម្មជាតិ នៅតែបន្តលួចលាក់កាន់កាប់អាវុធកែច្នៃខុសច្បាប់ និងបានលួចចូលព្រៃបរបាញ់សត្វ និងដាក់អន្ទាក់ចាប់សត្វដែលជាទង្វើខុសច្បាប់ និងត្រូវតែប្រឈមមុខច្បាប់ ប្រសិនបើកម្លាំងសមត្ថកិច្ចចាប់បង្ក្រាបបាន។
លោក នេត្រ ភក្ត្រា បានឱ្យដឹងថា សកសពសត្វប្រើសដែលត្រូវបានព្រានព្រៃបាញ់សម្លាប់នេះ ត្រូវបានដឹកជញ្ជូន មកកាន់ខេត្តសៀមរាប ដើម្បីឱ្យអ្នកជំនាញរៀបចំធ្វើជារូបសំណាក ដើម្បីទុកបម្រើផល ប្រយោជន៍ សម្រាប់ការសិក្សាផ្នែកវិទ្យាសាស្ត្រអំពីជីវៈចម្រុះ និងប្រភេទសត្វប្រើសដែលជាសត្វព្រៃ និងសម្រាប់ការដាក់តាំងពិព័រណ៍សម្រាប់សាធារណជនទស្សនា ពេលមានពិព័រណ៍នានា ដែលក្រសួងបរិស្ថាន ចូលរួម។
រដ្ឋលេខាធិការក្រសួងបរិស្ថានរូបនេះថ្លែងថា ការបំផ្លិចបំផ្លាញសត្វព្រៃត្រូវប្រឈមមុខច្បាប់ និងបានអំពាវនាវដល់បងប្អូនប្រជាពលរដ្ឋទាំងអស់ត្រូវនិយាយថា ទេ ចំពោះសាច់សត្វព្រៃ។ ប្រសិនបើស្រឡាញ់ធនធានធម្មជាតិ សត្វព្រៃជីវៈចម្រុះគ្រប់ប្រភេទ សូមកុំបរិភោគសាច់សត្វព្រៃ ម្យ៉ាងបរិភោគសាច់សត្វព្រៃ អាចបង្កផលប៉ះពាល់ដល់សុខភាព ដោយសារតែគ្មានការត្រួតពិនិត្យត្រឹមត្រូវ និងសត្វព្រៃខ្លះបង្កប់ដោយមេរោគកាចសាហាវ ដែលអាចសម្លាប់អ្នកហូបភ្លាមៗ។
លោក នេត្រ ភក្ត្រា បានគូសបញ្ជាក់ថា ដើម្បីទប់ស្កាត់ឱ្យមានប្រសិទ្ធភាពលើបទល្មើសទាំងនេះ ប្រជាពលរដ្ឋដែលបានឃើញជនល្មើសបរបាញ់សត្វព្រៃ ឬលក់សាច់សត្វព្រៃ សូមរាយការណ៍ជាបន្ទាន់ទៅកាន់មន្ត្រីបរិស្ថាន ឬមន្ត្រីសមត្ថកិច្ចពាក់ព័ន្ធ ដើម្បីចាត់វិធានការតាមផ្លូវច្បាប់។
ជាមួយគ្នានេះ រដ្ឋលេខាធិការក្រសួងបរិស្ថាន លោក នេត្រ ភក្ត្រា បានថ្លែងថា បទល្មើសសត្វព្រៃនៅតែកើតមាន ប៉ុន្តែលោកបានគូសបញ្ជាក់ថា ចំនួននៃបទល្មើសមានការថយចុះ ដោយសារតែការរឹតបន្តឹងការអនុវត្តច្បាប់ប្រឆាំងនឹងក្រុមជនល្មើស ការទប់ស្កាត់បង្ក្រាបបទល្មើស និងការដកអន្ទាក់ពីក្នុងព្រៃ ការចុះផ្សព្វផ្សាយអប់រំ ណែនាំ ការចុះបិទខិត្តប័ណ្ណ រាយការណ៍ពីបទល្មើសសត្វព្រៃផ្សេងៗ។
រដ្ឋលេខាធិការក្រសួងបរិស្ថាន បានជំរុញឱ្យប្រជាពលរដ្ឋដែលកាន់កាប់ ដោយខុសច្បាប់នូវកាំភ្លើងកែច្នៃត្រូវប្រគល់ជូនដល់ សមត្ថកិច្ចអាជ្ញាធរមូលដ្ឋាន និងបញ្ឈប់ការបរបាញ់សត្វ ឬដាក់អន្ទាក់សត្វដែលជាទង្វើខុសច្បាប់។
លោកបានបញ្ជាក់ថា កន្លងទៅនេះដោយអនុវត្តគោលការណ៍ភូមិឃុំមានសុវត្ថិភាព បងប្អូនប្រជាពលរដ្ឋមួយចំនួន ដែលរស់នៅជុំវិញតំបន់ការពារធម្មជាតិ បានស្ម័គ្រចិត្តប្រគល់អាវុធកែច្នៃដល់សមត្ថកិច្ច។
លោកក៏បានឱ្យដឹងផងដែរថា ដោយសារតែប្រសិទ្ធភាពនៃការការពារធនធានធម្មជាតិ សត្វព្រៃជាច្រើន ត្រូវបានមើលឃើញថា មានចំនួនកើនឡើងក្នុងតំបន់ការពារធម្មជាតិ ដូចជាប្រភេទសត្វជ្រូកព្រៃ ប្រើស ខ្លាឃ្មុំ ស្វាក្រវ៉ាត់ មាន់ព្រៃ សំពោចភ្នំ ឈ្លូស និងសត្វជាច្រើនប្រភេទទៀត ក្នុងនោះមានទាំងសត្វកម្រផង ត្រូវបានរកឃើញមានវត្តមាន នៅក្នុងតំបន់ការពារធម្មជាតិរបស់កម្ពុជា។
បើតាមរដ្ឋលេខាធិការក្រសួងបរិស្ថាន លោក នេត្រ ភក្ត្រា បច្ចុប្បន្ននេះ តំបន់ការពារធម្មជាតិ និងរបៀងអភិរក្សជីវៈចម្រុះ ស្ថិតក្រោមការគ្រប់គ្រងរបស់ក្រសួងបរិស្ថាន មានទំហំប្រមាណ ៧.៥ លានហិកតា និងមានមន្ត្រីឧទ្យានុរក្សចំនួន១២២០នាក់ បាននិងកំពុងដើរល្បាត ការពារធនធានធម្មជាតិ និងអភិរក្សជីវៈ ចម្រុះ សម្បត្តិធម្មជាតិ និងវប្បធម៌ ក្នុងតំបន់ការពារធម្មជាតិ និងរបៀងអភិរក្សជីវៈចម្រុះ៕ដោយ៖កូឡាប
