ខេត្តស្វាយរៀង៖ ហ្វូងសត្វននាល ប្រមាណរាប់ពាន់ក្បាល បានហើរមកចុះនៅក្នុងវាលស្រែ ដើម្បីរកចំណី ជិតច្រកទ្វារព្រំដែនអន្តរជាតិបាវិត ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
តាមការឱ្យដឹងពីសំណាក់ប្រជាពលរដ្ឋនៅម្តុំនេះ និយាយថា៖ ហ្វូងសត្វននាលបានហើរ និងចុះមករកចំណីទីនេះ គឺនៅចម្ងាយតែជាង២០០ម៉ែត្រ ពីមាត់ច្រកទ្វារព្រំដែនអន្តរជាតិបាវិត ហើយវាសំបូរនៅរដូវទឹកសម្រក សំបូរត្រី ជាចំណីរបស់វា ស្របពេលទីនេះគឺពុំមានអ្នកបរបាញ់នោះទេ ដោយឆ្នាំមុនវាមានចំនួនមិនដល់១០០ក្បាលនោះទេ តែនៅពេលរសៀលវា ហើរទៅប្រទេសវៀតណាមវិញ ដើម្បីរកទីជម្រក ។
បើតាមមន្រ្តីនគបាលអន្តោប្រវេសន៍ប្រចាំការ នៅច្រកទ្វារព្រំដែន បានឲ្យដឹងថា សត្វននាលប្រមាណជាង១ពាន់ក្បាលនេះ ទើបតែហើរមកចុះរកចាប់ចំណី បានប្រហែលរយៈពេល បីបួនថ្ងៃនេះទេ។ កន្លងមក ពួកវាចុះរកចំណី តាមវាលស្រែ នៅតាមព្រំដែន ហើយពេលល្ងាចគេឃើញសត្វននាលទាំងនេះ ហើរចូលទៅក្នុងប្រទេសវៀតណាម ហើយសត្វននាលទាំងនេះ យប់ហើរទៅដេកនៅឯភ្នំជើងមីដែង (ភ្នំយាយម៉ៅ) បច្ចុប្បន្ននៅខេត្តតៃនិញ ប្រទេសវៀតណាម លុះព្រឹកឡើង សត្វននាលទាំងនេះបានហើរត្រឡប់មកវិញ រកចំណីនៅតាមវាលស្រែ ជាប់ព្រំដែននៃក្រុងបាវិត ខេត្តស្វាយរៀង។
សមត្ថកិច្ចបានឃ្លាំមើលមិនឲ្យមានការបរបាញ់ ឬទាក់សត្វននាលនេះទេ ហើយតំបន់នេះ បើមានទីជម្រក ឲ្យវាពងកូនបាន ច្បាស់ជាវានៅទីនេះ ព្រោះគ្មានអ្នកចាប់ត្រី ឆក់ត្រី ដូចនៅប្រទេសជិតខាងនោះឡើយ ៕ ដោយ៖ វ៉ៃកូ
