អង្គការលើកលែងទោសអន្តរជាតិ (Amnesty International) បានជំរុញឲ្យអាជ្ញាធរហុងកុងធ្វើការស៊ើបអង្កេតជាបន្ទាន់ ក្រោយពេលមានការវាយប្រហារដ៏ឃោរឃៅទៅលើមេដឹកនាំក្រុមបាតុករម្នាក់នៅហុងកុង។ ការវាយប្រហារនោះកើតឡើង មុនពេលមានគម្រោងធ្វើការបាតុកម្មនៅចុងសប្តាហ៍នេះ។
នេះគឺជាការវាយប្រហារលើទី ២ ហើយទៅលើលោក Jimmy Sham ដែលជាប្រធានរណសិរ្យសិទ្ធិមនុស្សស៊ីវិល ចាប់តាំងពីមានការផ្ទុះការតវ៉ាដ៏ខ្លាំងក្លា នៅហុងកុងកាលពីពាក់កណ្តាលខែមិថុនាមក។
“អាជ្ញាធរត្រូវតែធ្វើការស៊ើបអង្កេត លើករណីវាយប្រហារដ៏គួរឲ្យខ្លាចនោះ ដើម្បីជាសារប្រាប់ថា ការវាយប្រហារទៅលើសកម្មជនអាចនឹងមានផលវិបាក”។ នេះជាការបញ្ជាក់របស់លោក Joshua Rosenzweig ប្រធានការិយាល័យប្រចាំតំបន់អាស៊ីអាគ្នេយ៍ នៃអង្គការលើកលែងទោសអន្តរជាតិ។
ប៉ូលីសបញ្ជាក់កាលពីថ្ងៃពុធថា មានមនុស្សប្រមាណ ៥នាក់ដែលពាក់សម្លៀកបំពាក់ខ្មៅ បានធ្វើការវាយប្រហារទៅលើលោក Jimmy Sham ដោយប្រើញញួរ និងកាំបិត អស់រយៈពេលច្រើនជាង ១០វិនាទី នៅតំបន់ Mong Kok។
ប៉ូលីសបានធ្វើការថ្កោលទោសចំពោះការវាយប្រហារនោះ និងបានប្តេជ្ញាធ្វើការស៊ើបអង្កេត។ រហូតមកដល់ពេលនេះ ស្ថានភាពរបួសរបស់លោក Jimmy Sham បានស្ថិតក្នុងភាពនឹងនរ។ នេះបើតាមការបញ្ជាក់របស់អ្នកនាំពាក្យរដ្ឋាភិបាល។
ក្រុមរបស់លោក Jimmy Sham ដែលបានរៀបចំការបាតុកម្មដ៏ធំនៅក្នុងខែមិថុនា មានគម្រោងធ្វើការហែរក្បួននៅថ្ងៃអាទិត្យសប្តាហ៍នេះ នៅតំបន់ Kowloon ប៉ុន្តែអាជ្ញាធរមិនទាន់បានធ្វើការបញ្ជាក់ថា គម្រោងនោះនឹងបានការអនុញ្ញាតឬយ៉ាងណាទេ។
សូមបញ្ជាក់ថា ទីក្រុងហុងកុង ដែលជាអតីតដែនដីអាណានិគមន៍របស់អង់គ្លេស ត្រូវបានញាំញីដោយការបាតុកម្មអស់រយៈពេល ៤ខែមកហើយ ដោយសារតែច្បាប់ធ្វើបត្យាប័ន ដែលប្រកាសដោយមេដឹកនាំហុងកុង។ ទោះបីជាច្បាប់នេះ ត្រូវបានរដ្ឋាភិបាល ប្រកាសបោះបង់ចោលក្តី ក៏មិនទាន់ធ្វើឲ្យមានការពេញចិត្តដល់ក្រុមបាតុករដែរ ព្រោះពួកគេនៅទាមទារច្រើនចំណុចទៀត៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia