តាកែវ: លោកឧត្តមសរនីយ៍ទោ សុខ សំណាង ស្នងការនគរបាលខេត្តតាកែវ បានធ្វើការជំរុញទៅលើមន្ត្រីនគរបាល ដែលឈរជាប់នៅតាមមូលដ្ឋាន ត្រូវសិក្សា និងក្តាប់ពីសភាពការណ៍ឲ្យបាន ចំពោះក្រុមជនអមិត្ត ដែលមានចេតនាគៀរគរប្រជាពលរដ្ឋប្រឆាំង និងរាជរដ្ឋាភិបាល ស្របច្បាប់ដែលកើតឡើងចេញពីការបោះឆ្នោត ។ លោកស្នងការបានបន្តថា សកម្មភាពរបស់ជនអមិត្ត បានធ្វើចលនាជាច្រើន ប្រឆាំងជាមួយនិងរាជរដ្ឋាភិបាលកម្ពុជារបស់យើង នៅផ្នែកខាងក្រៅនៃប្រទេស ដូចជាធ្វើការញុះញង់ គៀរគរគ្នា ធ្វើការរារាំងអ្នកវិនិយោគក្រៅប្រទេសមិនឲ្យមកវិនិយោគនៅក្នុងស្រុក ដែលចលនានេះ ជាចេតនាមួយក្នុងគោលបំណងប្រឆាំង ជាមួយនិងរាជរដ្ឋាភិបាលស្របច្បាប់ ។
ថ្លែងបែបនេះក្នុងពេលដែលលោកស្នងការនគរបាលខេត្តតាកែវ ចូលរួមក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចសហប្រតិបត្តិការការពារសន្តិសុខ សណ្តាប់ធ្នាប់សង្គមប្រចាំខែកញ្ញា និងផ្សព្វផ្សាយ ផែនការការពារបុណ្យឯករាជ្រជាតិ បុណ្យអ៊ុំទូកបណ្តែតប្រទីបសំពះព្រះខែ និងប្រកាសផ្ទេរមុខតំណែង បំពាក់ឋាន្តនរសិក្តជូននគរបាលជាតិចំនួន ៤៦០រូប នៅរសៀលថ្ងៃទី ១៦ ខែតុលា ឆ្នាំ២០១៩ នៅសាលប្រជុំរបស់ស្នងការខេត្ត ។
លោកឧត្តមសេនីយ៍ទោ សុខ សំណាង បានបញ្ជាក់យ៉ាងច្បាស់ថា ដើម្បីទុបទល់ជាមួយនិង ការគ្រោងធ្វើផែនការរបស់ជនអមិត្ត កងកម្លាំងទាំងអស់ ដែលជានគរបាលជាតិ ត្រូវតែមានការទទួលខុសត្រូវខ្ពស់ មានមុខលើការប្រចាំបញ្ជា ២៤ម៉ោង លើ២៤ម៉ោង ដើម្បីត្រៀមទប់ទល់ រាល់សកម្មភាព ដែលអាចកើតមានឡើង អំពីសកម្មភាពរបស់ជនអមិត្ត ដែលជាចេតនាមួយធ្វើឲ្យ អសន្តិសុខក្នុងសង្គម និងអសណ្តាប់ធ្នាប់សាធារណៈ ដូច្នេះក្នុងនាមយើងជានគរបាល ដែលមានភារកិច្ចរក្សាសន្តិសុខសណ្តាប់ធ្នាប់សាធារណៈ ត្រូវតែបង្ក្រាប និងឃាត់ខ្លួនភ្លៀម ៗ ចំពោះក្រុមអមិត្តណាដែលបង្កើតឲ្យមានសកម្មភាពចលាចល់នៅក្នុងសង្គម ក្នុងគោលបំណងប្រឆាំងនិងរាជរដ្ឋាភិបាល ស្របច្បាប់ ៕ដោយ៖ តាកែវ