ខេត្តកំពង់ចាម៖ “គ្រូបង្រៀនជាវិស្វករព្រលឹង” ជាចំណងជើងកំណាព្យ និងជាស្នាដៃនិពន្ធផ្ទាល់របស់លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដែលមានខ្លឹមសារបានបង្ហាញពីគុណវុឌ្ឍិ កិច្ចខិតខំប្រឹងប្រែងរបស់លោកគ្រូ អ្នកគ្រូ សាស្ត្រាចារ្យ ទូទាំងប្រទេស។ លោកបានសូត្រកំណាព្យនេះជូនលោកគ្រូ អ្នកគ្រូ ក្នុងឱកាសនៃការប្រារព្ធទិវាគ្រូបង្រៀន ៥ តុលា ២០១៩ ក្រោមប្រធានបទ “គុណភាពគ្រូ ជាមូលដ្ឋានគ្រឹះ នៃយុគសម័យឌីជីថល” នៅវិទ្យាល័យកងតាណឹង ស្រុកកងមាស ខេត្តកំពង់ចាម។
ក្នុងឱកាសនោះ លោករដ្ឋមន្ត្រីបានមានប្រសាសន៍ថា ក្នុងនាមជារដ្ឋមន្ត្រីម្នាក់ ត្រូវគិតដល់យុទ្ធសាស្ត្រនៃការគ្រប់គ្រង ពង្រឹងវិស័យអប់រំ ផ្ដល់ការលើកទឹកចិត្ត គាំទ្រលោកគ្រូ អ្នកគ្រូ រៀបចំជាចក្ខុវិស័យ យុទ្ធសាស្ត្រ ដាក់ផែនការអនុវត្តន៍ និងស្វែងរកថវិកាដើម្បីកំណែទម្រង់ស៊ីជម្រៅវិស័យអប់រំ។ បច្ចុប្បន្ន វិស័យអប់រំ ទទួលបានជោគជ័យ ក៏ដោយសារការខិតខំប្រឹងប្រែងរបស់លោកគ្រូ អ្នកគ្រូ ដែលនេះជាជោគជ័យរួមមួយ។
ក្នុងឱកាសនៃការប្រារព្ធទិវាគ្រូបង្រៀននេះ លោករដ្ឋមន្ត្រី ក៏បានជូនប័ណ្ណសរសើរ ដល់លោកគ្រូ អ្នកគ្រូ ចូលនិវត្តន៍ ដែលធ្លាប់មានស្នាដៃ ខិតខំប្រឹងប្រែងក្នុងការផ្ទេរចំណេះដឹងជូនដល់សិស្សានុសិស្សផងដែរ។ សូមជម្រាបថា កម្មវិធីនេះមានការចូលរួមពីសំណាក់ ថ្នាក់ដឹកនាំក្រសួងអប់រំ យុវជន លោកគ្រូ អ្នកគ្រូ សិស្សានុសិស្សសរុបប្រមាណ៨២៥នាក់៕ដោយ៖កូឡាប