ខេត្តព្រះសីហនុ៖ កាលពីព្រឹកថ្ងៃទី១៨ ខែតុលា ឆ្នាំ២០១៩នេះ កម្លាំងគណៈបញ្ជាការឯកភាព នៃរដ្ឋបាលខេត្តព្រះសីហនុ បានចុះបង្ក្រាប និងចាប់ខ្លួន ក្រុមឧក្រិដ្ឋជនចំនួន៥នាក់ ដែលធ្វើសកម្មភាពទាក់ទងបទល្មើសចាប់ជំរិតមនុស្សយកប្រាក់ ក្នុងខេត្តព្រះសីហនុ។
សមត្ថកិច្ចនគរបាល បានឲ្យដឹងថា ក្នុងប្រតិបត្តិការខាងលើនេះ កម្លាំងជំនាញ បានរំដោះជនរងគ្រោះម្នាក់ជាជនជាតិចិន ដែលក្រុមជនសង្ស័យជនជាតិចិនដូចគ្នា ចាប់បង្ខាំងទុកក្នុងផ្ទះធ្វើទារុណកម្ម ក្នុងអំពើចាប់ជំរិតយកប្រាក់ជាងមួយសប្តាហ៍កន្លងមកហើយ ស្ថិតនៅភូមិ៣ សង្កាត់លេខ៣ ក្រុងព្រះសីហនុ (ម្តុំស្ថានីយរថភ្លើង)។
មន្ត្រីមូលដ្ឋាន បានឲ្យដឹងថា ជនរងគ្រោះដែលសមត្ថកិច្ចរំដោះបាន គឺមានរបួសពេញខ្លួន ហើយត្រូវបានរថយន្តសង្គ្រោះ របស់កំពង់ផែក្រុងព្រះសីហនុ ដឹកយកទៅសង្គ្រោះនៅមន្ទីរពេទ្យបង្អែកខេត្តព្រះសីហនុភ្លាមៗដែរ។
ប្រភពបន្តទៀតថា ក្រុមឧក្រិដ្ឋជន បានប្រើហិង្សាលើជនរងគ្រោះ ជាមួយនឹងការផ្តល់អាហារគិតជាប្រាក់ (បាយមួយកញ្ចប់ ៣០០ដុល្លារ ទឹកសុទ្ធមួយដប១០០ដុល្លារ)។
យ៉ាងនេះក្តី សមត្ថកិច្ចនៅមិនទាន់បញ្ចេញរបាយការណ៍លម្អិតជុំវិញបទល្មើសខាងលើនេះទេ ដោយស្នើរង់ចាំកម្លាំងជំនាញ ធ្វើការសាកសួរ និងស្រាវជ្រាវបញ្ចប់សំណុំរឿងខាងលើឲ្យរួចរាល់សិន៕ ដោយ៖ ដែន សីមា