អគ្គព្រះរាជអាជ្ញាប្រទេសវេណេហ្ស៊ុយអេឡា លោក Tarek William Saab បានប្រកាសនៅថ្ងៃព្រហស្បតិ៍ម្សិលមិញថា នឹងធ្វើការដោះលែងមន្រ្តីបក្សប្រឆាំងចំនួន ២៤រូបចេញពីពន្ធធនាគារ ដែលការដោះលែងនោះគឺជាផ្នែកមួយនៃកិច្ចព្រមព្រៀង ដែលបានធ្វើឡើងដើម្បីផ្សះផ្សារជាតិរវាងរដ្ឋាភិបាល និងក្រុមបក្សប្រឆាំង។
នៅក្នុងកិច្ចពិភាក្សាជាតិដែលបង្កើតឡើង ដោយអ្នកតំណាងរដ្ឋាភិបាល និងបក្សប្រឆាំង មានការស្នើថា អាជ្ញាធរត្រូវធ្វើការស្នើសុំឲ្យមានការដោះលែងអ្នកទោស។
អ្នកដែលនឹងត្រូវដោះលែងទាំងនោះ ត្រូវគេកាត់ទោសពីបទប្រព្រឹត្តិឧក្រិដ្ឋកម្ម ក្នុងអំឡុងការតវ៉ាប្រឆាំងរដ្ឋាភិបាលកាលពីចន្លោះឆ្នាំ ២០១៤ ដល់ ២០១៧។
លោកបានថ្លែងថា “កាយវិការសប្បុរសគឺជាកិច្ចប្រឹងប្រែងដ៏មានសារសំខាន់ខ្លាំង ដែលបានផ្ញើសារយ៉ាងច្បាស់ទៅកាន់ប្រទេសទាំងមូល និងសហគមន៍អន្តរជាតិ អំពីឆន្ទៈក្នុងការចរចា ដើម្បីរកដំណោះស្រាយសន្តិភាព”។
លោកបន្ថែមថា “ប្រទេសវេណេហ្ស៊ុយអេឡា សង្គមស៊ីវិល អង្គការសិទ្ធិមនុស្ស ប្រព័ន្ធយុត្តិធម៌ និងអ្នកនយោបាយ បានធ្វើការចាត់វិធានការរួមគ្នា ក្នុងការឆ្ពោះទៅកាន់ការសហការគ្នាប្រកបដោយសន្តិវិធី និងការពិភាក្សាគ្នាបែបប្រជាធិបតេយ្យ។”
សូមបញ្ជាក់ថា រហូតមកដល់ពេលនេះ ការស៊ើបអង្កេតរបស់គណៈកម្មការស្វែងរកការពិត បានធ្វើឲ្យមានការដោះលែងមនុស្សចំនួន ២៩នាក់មកហើយ រួមមានអនុប្រធានរដ្ឋសភាជាតិ លោក Edgar Zambrano៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua