សៀមរាប : ឧត្តមសេនីយ៍ឯក ជ័យ បុប្ផា បានថ្លែងថា អ្នកញៀនគ្រឿងញៀនមួយចំនួន នៅមិនទាន់ភ្ញាក់រលឹក ស្ម័គ្រចិត្តទៅទទួលសេវាព្យាបាល និងស្តារនីតិសម្បទា ដែលតម្រូវឲ្យយើងទាំងអស់គ្នា ដែលជាអ្នកពាក់ព័ន្ធត្រូវខិតខំបន្ថែមទៀត ឈរលើស្មារតីរួម សហការគ្នា ក្នុងគោលបំណងតែមួយ ជួយអ្នកប្រើនិងអ្នកញៀនគ្រឿងញៀន ឲ្យទទួលបានការព្យាបាលស្តារនីតិសម្បទា។
នៅថ្ងៃទី១៨ ខែតុលា ឆ្នាំ២០១៩ វគ្គបណ្តុះបណ្តាលស្តីពីការគ្រប់គ្រង និងអភិបាលកិច្ច លើការងារព្យាបាលនិងស្តារនីតិសម្បទា អ្នកញៀនគ្រឿងញៀននៅកម្ពុជា ដែលជាជំនួយLOAប្រចាំឆ្នាំ២០១៩ ត្រូវបានបិទបញ្ចប់ ក្រោមអធិបតីភាពលោកស្រីឧត្តមសេនីយ៍ឯក ជ័យ បុប្ផា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន ។
លោកវេជ្ជបណ្ឌិត ស៊ិន អ៊ាប ពីក្រសួងសុខាភិបាល បានរាយការណ៍បូកសរុបវគ្គបណ្តុះបណ្តាល ស្តីពីការគ្រប់គ្រង និងអភិបាលកិច្ចលើការងារព្យាបាល និងស្តារនីតិសម្បទា អ្នកញៀនគ្រឿងញៀន បានផ្តល់ដល់សិក្ខាកាមបង្កើននូវចំណេះដឹង ដែលឈានឆ្ពោះទៅសម្រេចបានការពង្រឹងការគ្រប់គ្រង និងអភិបាលកិច្ចលើការងារព្យាបាល និងស្តារនីតិសម្បទាអ្នកញៀនគ្រឿងញៀននៅកម្ពុជា។
ឧត្តមសេនីយ៍ត្រី ឈឿន សុចិត្ត ស្នងការរងនិងជាអនុប្រធានអចិន្រ្តែយ៍ លេខាធិការដ្ឋានគណៈកម្មាធិការត្រួតពិនិត្យគ្រឿងញៀន ខេត្តកណ្តាល បានមានប្រសាសន៍ថា វគ្គបណ្តុះបណ្តាលនេះពិតជាមានសារសំខាន់ ស្នើសុំឲ្យវគ្គបណ្តុះបណ្តាលបែបនេះ ក្រោយៗទៀត ដើម្បីធ្វើឲ្យប្រសើរឡើង នូវប្រសិទ្ធភាពការងារព្យាបាលស្តានីតិសម្បទា អ្នកញៀនគ្រឿងញៀននៅកម្ពុជា។
ក្នុងឱកាសនោះ លោកស្រី ឧត្តមសេនីយ៍ឯក ជ័យ បុប្ផា អគ្គលេខាធិការរង បានមានប្រសាសន៍ដោយបានលើកឡើង ពីការខិតខំប្រឹងប្រែង របស់គណៈកម្មាធិការទទួលបន្ទុកការងារព្យាបាល និងស្តារនីតិសម្បទាអ្នកញៀនគ្រឿងញៀនបានពង្រឹងនិងពង្រីកការងារព្យាបាល សហការកាន់តែល្អប្រសើរ រវាងក្រសួង-ស្ថាប័ន និងអង្គភាពពាក់ព័ន្ធពិសេសរវាងអង្គភាពអនុវត្តន៍ច្បាប់ ព្រះរាជអាជ្ញា តុលាការ និងមូលដ្ឋានផ្តល់សេវាសុខភាព ជាមួយនឹងការកើនឡើងនូវការយល់ដឹង និងភ្ញាក់រលឹករបស់ប្រជាពលរដ្ឋ ក្នុងការជំរុញកូនចៅដែលប្រើប្រាស់ ឬញៀនគ្រឿងញៀន ឲ្យទៅទទួលយកសេវាព្យាបាល និងស្តារនីតិសម្បទា ។
ក្នុងឱកាសនោះដែរ លោកស្រី ឧត្តមសេនីយ៍ឯក ជ័យ បុប្ផា បានថ្លែងបន្តថា ទន្ទឹមនឹងការខិតខំសម្រេចបាន នូវលទ្ធផលការងារ អ្វីដែលនៅជាបញ្ហានោះ គឺអ្នកញៀនគ្រឿងញៀនមួយចំនួន នៅមិនទាន់ភ្ញាក់រលឹកស្ម័គ្រចិត្ត ទៅទទួលសេវាព្យាបាល និងស្តារនីតិសម្បទាដែលតម្រូវឲ្យយើងទាំងអស់គ្នា ដែលជាអ្នកពាក់ព័ន្ធត្រូវខិតខំបន្ថែមទៀត ឈរលើស្មារតីរួម សហការគ្នាក្នុងគោលបំណងតែមួយ ជួយអ្នកប្រើនិងអ្នកញៀនគ្រឿងញៀន ឲ្យទទួលបានការព្យាបាលស្តារនីតិសម្បទា ដោយមិនត្រូវទុកឲ្យអ្នកញៀនគ្រឿងញៀន ណាម្នាក់នៅក្រៅការព្យាបាលឡើយ៕ដោយ៖កូឡាប