សៀមរាប៖ មន្ត្រីជាន់ខ្ពស់នៃស្នងការដ្ឋានខេត្តសៀមរាប បានឲ្យដឹងនៅរសៀលថ្ងៃទី១៨ នេះថា ជនសង្ស័យ២នាក់ប្តីប្រពន្ធ ជនជាតិប៉េរូ ត្រូវបាននគរបាលជំនាញឃាត់ខ្លួន ករណីលួចកាបូបស្ពាយរបស់ស្រ្តីជនជាតិចិនរួចគេចខ្លួន។
ហេតុការណ៍ឃាត់ខ្លួននេះធ្វើឡើងនៅវេលាម៉ោងប្រហែល ១៧និង៣០នាទីថ្ងៃទី១៧ ខែតុលា ឆ្នាំ២០១៩ ស្ថិតនៅភូមិសាលាកន្សែង សង្កាត់ស្វាយដង្គំ ក្រុង/ខេត្តសៀមរាប និងបញ្ជូនមកការិយាល័យ ស៊ើបអង្កេតនិងអនុវត្តន៍នីតិវិធី នៅវេលាម៉ោង ១៤និង០០នាទីថ្ងៃទី១៨ ខែតុលាឆ្នាំ២០១៩។
លោកឧត្តមសេនីយ៍ត្រី ជា គឹមសាន ស្នងការរង ទទួលផែនអន្តោប្រវេសន៍នៃស្នងការដ្ឋាននគរបាលខេត្តសៀមរាប បានឲ្យដឹងថា កម្លាំងនគរបាលការិយាល័យស៊ើបអង្កេតនិងអនុវត្តន៍នីតិវិធី បានឃាត់ខ្លួនជនបរទេសចំនួន ២នាក់ ពាក់ព័ន្ធនឹងករណីអំពើលួច។ ជនបរទេសទាំង២នាក់នេះ ១-MENDEZ TINCO EPIFANIO ភេទ ប្រុស អាយុ៦៥ឆ្នាំ ជនជាតិ ប៉េរូ កាន់លិខិតឆ្លងដែនលេខ ២១៦២៥២៥០៣ ជាភ្ញៀវទេសចរ (ប្តី) ស្នាក់នៅសណ្ឋាគារ សាកវ៉ក ភូមិតាភុល សង្កាត់ស្វាយដង្គំ ក្រុង/ខេត្តសៀមរាប និងឈ្មោះ QUISPE ESPINOZA CARMEN LUZ ភេទស្រី អាយុ៤៩ឆ្នាំ ជនជាតិ ប៉េរូ កាន់លិខិតឆ្លងដែនលេខ ១១៨៦១៣០៥៤ ជាភ្ញៀវទេសចរ (ប្រពន្ធ) ស្នាក់នៅសណ្ឋាគារ សាយវ៉ក ភូមិ តាភុល សង្កាត់ ស្វាយដង្គំ ក្រុង/ខេត្តសៀមរាប។
លោកស្នងការរង បានបន្តថា អង្គហេតុ នាវេលាម៉ោងប្រហែល ១១និង៥៥នាទីថ្ងៃទី១៦ ខែតុលា ឆ្នាំ២០១៩ នៅចំណុចភោជនីយដ្ឋានសមុទ្រធម្មជាតិ ស្ថិតនៅភូមិ សាលាកន្សែង សង្កាត់ ស្វាយដង្គំ ក្រុង/ខេត្តសៀមរាប។ ជនសង្ស័យទាំង២នាក់ខាងលើ បានធ្វើសកម្មភាពលួចកាបូបស្ពាយរបស់ជនរងគ្រោះឈ្មោះ ZHOU LI HUA ភេទ ស្រី កើតឆ្នាំ ១៩៥៦ ជនជាតិចិន ជាភ្ញៀវទេសចរ ហើយគេចខ្លួនបាត់។
លោក បានបន្ថែមថា សម្ភារៈក្នុងកាបូបរួមមាន៖ លិខិតឆ្លងដែន ២ក្បាល-ទូរស័ព្ទដៃ ម៉ាក HUAWEI ១គ្រឿង-ប័ណ្ណឥណទាន ១សន្លឹក។ រហូតដល់វេលាម៉ោងប្រហែល ១៧និង៣០នាទីថ្ងៃទី១៧ ខែតុលាឆ្នាំ២០១៩ ជនសង្ស័យទាំង២នាក់ បានចូលទៅក្នុងភោជនីយដ្ឋានសមុទ្របៃតង ហើយក៏ត្រូវបានបុគ្គលិក និងថៅកែហាងឃាត់ខ្លួន ប្រគល់ឲ្យសមត្ថកិច្ចនគរបាលទេសចរណ៍ ចាត់ការតាមនីតិវិធី។ បច្ចុប្បន្នជនសង្ស័យទាំង២នាក់ត្រូវបានលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប សម្រេចឲ្យឃាត់ខ្លួនបណ្តោះអាសន្ន នៅការិយាល័យស៊ើបអង្កេតនិងអនុវត្តន៍នីតិវិធី នៃស្នងការដ្ឋាននគរបាលខេត្តសៀមរាប ដើម្បីរៀបចំកសាងសំណុំរឿង បញ្ជូនទៅសាលាដំបូងខេត្តចាត់ការបន្តតាមនីតិវិធី៕ ដោយ៖កូឡាប