ភ្នំពេញ៖ អធិការដ្ឋាននគរបាលខណ្ឌទួលគោក បានឲ្យដឹងថា នគរបាលបានឃាត់ខ្លួនជនសង្ស័យ១នាក់ ពីបទហិង្សាដោយចេតនាមានស្ថានទម្ងន់ទោស (ទំនាស់គ្នាវាយដោយដៃរវាងជនជាតិចិន៤នាក់ វាយលើជនរងគ្រោះខ្មែរ១នាក់ បណ្ដាលឲ្យរបួសជាច្រើនកន្លែង) កើតហេតុនៅក្នុងមូលដ្ឋានសង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ តាមបណ្តោយផ្លូវកម្ពុជាក្រោម។
នៅថ្ងៃទី១៧ ខែតុលា ឆ្នាំ២០១៩ វេលាម៉ោងប្រហែល២៣:០៥នាទីកម្លាំងផ្នែកព្រហ្មទណ្ឌនៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវឃាត់ខ្លួនជនសង្ស័យ១នាក់ ពីបទហិង្សាដោយចេតនាមានស្ថានទម្ងន់ទោស (ទំនាស់គ្នាវាយដោយដៃរវាងជនជាតិចិន៤នាក់វាយលើជនរងគ្រោះខ្មែរ១នាក់បណ្ដាលឲ្យរបួសជាច្រើនកន្លែង) ឃាត់ខ្លួននៅចំណុចមុខខារ៉ាអូខេទន្លេសេកុង មានទីតាំងផ្ទះលេខ៧៧ ផ្លូវ១២២ ក្រុមទី១៨ ភូមិ៦ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ដែលប្រព្រឹត្តនៅចំណុចមុខផ្ទះ៦២៤ ផ្លូវលេខ១២៨ ក្រុមទី១៥ ភូមិ៦ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ កាលពីថ្ងៃទី១៦ ខែតុលា ឆ្នាំ២០១៩ វេលាម៉ោងប្រហែល២:០០នាទី រំលងអធ្រាត្រ។
ជនសង្ស័យឈ្មោះTSAI JIDA ហៅADA ភេទប្រុស អាយុ៣៨ឆ្នាំ ជនជាតិចិនតៃវ៉ាន់ (គ្មានលិខិតឆ្លងដែន) មុខរបរអាជីរវករស្នាក់នៅផ្ទះលេខ២៦៦ ផ្លូវលេខ១០Mថ្មី បូរីពិភពថ្មីសែនសុខ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ជនរងគ្រោះឈ្មោះសឿន រដ្ឋា ភេទប្រុស អាយុ៣៨ឆ្នាំ ជនជាតិខ្មែរ មុខរបរអាជីវករ ស្នាក់នៅផ្ទះលេខ៤៣ ផ្លូវរំដួលបូរីអ័រគីដេរសែនសុខ សង្កាត់អូរបែកក្អម ខណ្ឌសែនសុខ រាជធានីភ្នំពេញ។
ជនរងគ្រោះរងរបួសស្នាមលើដើមទ្រូងជាំ, កញ្ចឹងកខាងក្រោយ, ជើងខាងស្ដាំ, ចង្កេះស្ដាំ, ដៃស្ដាំ, ភ្នែកទាំងសងខាង, ត្រចៀកទាំងសងខាង, ក្បាលជាទម្ងន់ជាំហើមនិងជាំត្រចៀកទាំងសងខាង (ដោយសារជនសង្ស័យឈ្មោះTSAI JIDA ហៅADA និងបក្សពួកវាយដោយដៃបណ្ដាលឲ្យរបួសក្នុងពេលកើតហេតុ) ។
ការពិនិត្យទីកន្លែងកើតហេតុឃើញ រួមមាន៖ម៉ូតូ១គ្រឿងម៉ាកDIO ពណ៌សពាក់ផ្លាកលេខភ្នំពេញ1HP-1073 ដែលមានលេខតួ: 1380694 និងលេខម៉ាស៊ីន: 1381388 (ជាម៉ូតូរបស់ជនសង្ស័យឈ្មោះALON ជាបក្ខពួកឈ្មោះTSAI JIDA ហៅADA រត់ចោលនៅកន្លែងកើតហេតុ ពេលវាយប្រវាយប្រតប់គ្នាជាមួយជនរងគ្រោះ)។
ដំណើររឿងហេតុនៅថ្ងៃទី១៥ ខែតុលា ឆ្នាំ២០១៩ វេលាម៉ោងប្រហែល២៣:០០នាទី ជនរងគ្រោះឈ្មោះសឿន រដ្ឋា ភេទប្រុស អាយុ៣៨ឆ្នាំ ជនជាតិខ្មែរ និងឈ្មោះអាន ភេទប្រុស អាយុប្រហែល២៤ឆ្នាំ ជនជាតិខ្មែរ បានបើករថយន្តម៉ាកឆែរ៉ូឡែត ពណ៌ខ្មៅស៊េរី2018 ពណ៌ខ្មៅ ចេញពីផ្ទះ ក្នុងគោលបំណងទៅរកញាំអាហារ នៅខាងក្រៅ តែមិនបានញាំទេជនរងគ្រោះនិងឈ្មោះអាន ក៏បានជិះរថយន្តដើរលេងតាមផ្លូវ លុះជិះមកដល់ចំណុចមុខផ្ទះ៦២៤ ផ្លូវលេខ១២៨ ក្រុមទី១៥ ភូមិ៦ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ ស្រាប់តែមានជនសង្ស័យឈ្មោះTSAI JIDA ហៅADA ភេទប្រុស អាយុ៣៨ឆ្នាំ ជនជាតិចិនតៃវ៉ាន់ និងបក្ខពួកមានគ្នា៣នាក់ទៀត ទី១,ឈ្មោះLE CHEN LANG ហៅលីកឺ ភេទប្រុស អាយុប្រហែល៤២ឆ្នាំ ជនជាតិចិនតៃវ៉ាន់, ទី៣ ឈ្មោះអ៊ូកឺ ភេទប្រុស អាយុប្រហែល៤៥ឆ្នាំ ជនជាតិចិនតៃវ៉ាន់ និងឈ្មោះALON ភេទប្រុស អាយុប្រហែល២៥ឆ្នាំ ជនជាតិចិនតៃវ៉ាន់ បានបើករថយន្តចំនួន១គ្រឿងម៉ាកFord Ranger ពណ៌ស មិនចាំផ្លាកលេខ និងម៉ូតូ២គ្រឿងម៉ាកHonda Zoomer X ពណ៌ខ្មៅលាយក្រហម ពាក់ផ្លាកលេខភ្នំពេញ1HF-0713 និងម៉ូតូ១គ្រឿងទៀត ម៉ាកDIO ពណ៌សពាក់ផ្លាកលេខភ្នំពេញ 1HP-1073 តាមផ្លូវ១២៨ ពីលិចទៅកើតពេលនោះជនរងគ្រោះឈ្មោះសឿន រដ្ឋា ក៏បានបើករថយន្តវ៉ាទៅមុន ក្រុមជនសង្ស័យជាជនជាតិចិនខាងលើ រួចហើយ ជនសង្ស័យឈ្មោះTSAI JIDA ហៅADA និងបក្ខពួកក៏បានចុចស៊ីផ្លេររថយន្តជាច្រើនដងខ្លាំងៗ រួចហៅជនរងគ្រោះឈ្មោះសឿន រដ្ឋា ឲ្យឈប់ ពេលនោះជនរងគ្រោះ ក៏បានឈប់រថយន្តរួចហៅជនសង្ស័យឈ្មោះTSAI JIDA ហៅADA និងបក្ខពួក៣នាក់ថា មានរឿងអីបានហៅអញឲ្យឈប់ ពេលនោះជនសង្ស័យឈ្មោះTSAI JIDA ហៅADA និងបក្ខពួកក៏បានឈប់រថយន្តនិងម៉ូតូ រួចនិយាយជាភាសាចិនខ្លាំងៗ រួចហើយក្រុមជនសង្ស័យទាំង៤នាក់ខាងលើ ក៏បានចុះពីលើរថយន្តនិងម៉ូតូ រួចដើរសំដៅមករកជនរងគ្រោះ រួចវាយលើជនរងគ្រោះ បណ្ដាលឲ្យត្រូវរបួសជាច្រើនកន្លែង ក្នុងពេលនោះជនរងគ្រោះ ក៏បានវាយតបតទៅលើក្រុមជនសង្ស័យវិញ ដើម្បីការពារខ្លួនទៅវិញក្រោយមក ក៏មានអ្នកជិតខាងជួយឃាត់បំបែកគ្នា លុះមួយសន្ទុះក្រោយមកក៏មានការប្រវាយប្រតប់គ្នាជាលើកទី២ ដោយដេញវាយគ្នាពេញផ្លូវ១២៨ ដោយក្រុមជនសង្ស័យទាំង៤នាក់ បានប្រើដៃវាយមកលើជនរងគ្រោះ ឈ្មោះសឿន រដ្ឋា និងលោតធាក់ដើមទ្រូង១កន្លែងជាំ កញ្ចឹងកខាងក្រោយ, ជើងខាងស្ដាំ, ចង្កេះស្ដាំ, ដៃស្ដាំ, ភ្នែកទាំងសងខាង, ត្រចៀកទាំងសងខាង, ក្បាលជាទម្ងន់ជាំហើមជាំ និងត្រចៀកទាំងសងខាង ក្នុងពេលវាយតប់គ្នា ក្រុមជនសង្ស័យឈ្មោះALON បានរត់ចោលម៉ូតូ១គ្រឿង ម៉ាកDIO ពណ៌សពាក់ផ្លាកលេខភ្នំពេញ1HP-1073 នៅលើផ្លូវលេខ១២៨ រួចហើយក្រុមជនសង្ស័យទាំង៤នាក់ខាងលើ ក៏បានគេចរត់ខ្លួនបាត់ទៅ ចំណែកជនរងគ្រោះត្រូវបានក្រុមគ្រួសារ ដឹកយកទៅសង្គ្រោះបន្ទាន់នៅមន្ទីរពេទ្យតែម្ដង ក្រោយពេលកើតហេតុសមត្ថកិច្ចយើង ក៏បានចុះទៅដល់កន្លែងកើតហេតុ ដើម្បីចាប់យកម៉ូតូ១គ្រឿងម៉ាកDIO ពណ៌សពាក់ផ្លាកលេខភ្នំពេញ1HP-1073 ដែលក្រុមជនសង្ស័យជនជាតិចិន បានរត់ចោល និងបានធ្វើការស្រាវជ្រាវរកជនសង្ស័យខាងលើ យកមកផ្តន្ទាទោសទៅតាមផ្លូវច្បាប់។
លុះរហូតមកដល់ថ្ងៃទី១៧ ខែតុលា ឆ្នាំ២០១៩ វេលាម៉ោងប្រហែល២៣:០៥នាទី កម្លាំងផ្នែកព្រហ្មទណ្ឌ នៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវ ឈានដល់ការឃាត់ខ្លួនជនសង្ស័យ១នាក់ឈ្មោះTSAI JIDA ហៅADA ភេទប្រុស អាយុ៣៨ឆ្នាំ ជនជាតិចិនតៃវ៉ាន់ ឃាត់ខ្លួននៅចំណុចមុខខារ៉ាអូខេទន្លេសេកុង ដែលមានទីតាំងផ្ទះលេខ៧៧ ផ្លូវ១២២ ក្រុមទី១៨ ភូមិ៦ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ រួចបញ្ជូនមកកាន់ អធិការដ្ឋាននគរបាលខណ្ឌទួលគោក ចាត់ការតាមផ្លូវច្បាប់។ ចំណែកបក្ខពួក៣នាក់ទៀត ឈ្មោះLE CHEN LANG ហៅលីកឺ, ឈ្មោះអ៊ូកឺ និងឈ្មោះALON បានគេចខ្លួនបាត់។
ការធ្វើតេស្តស្វែងរកសារធាតុញៀន ក្នុងទឹកនោម ជនសង្ស័យរូបនេះ ជាលទ្ធផលមានភាពអវិជ្ជមាន។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ន នៅអធិការដ្ឋាននគរបាលខណ្ឌទួលគោក ដើម្បីចាត់ការតាមផ្លូវច្បាប់៕ដោយ៖កូឡាប
