មនុស្សចំនួន ៥នាក់បានស្លាប់ ក្រោយពេលរោងចក្រកាត់ដេរមួយកន្លែងត្រូវបានក្រុមចោរលួច ដុតនៅក្បែរទីក្រុង Santiago នៃប្រទេសឈីលី។ ការលួចអីវ៉ាន់ និងការដុតរោងចក្រកើតឡើងក្រោយពេលមានការតវ៉ាយ៉ាងខ្លាំង។
យោធា និងប៉ូលីសបានប្រើប្រាស់ឧស្ម័នបង្ហូរទឹកភ្នែក និងកាណុងបាញ់ទឹកប្រឆាំងនឹងក្រុមអ្នកតវ៉ា។
ភាពច្របូលច្របល់ ដែលផ្ទុះឡើងដោយសារតែតម្លៃសំបុត្ររថភ្លើងក្រោមដៃថ្លៃពេក កាន់តែរីកធំឡើងដោយវាបានឆ្លុះបញ្ចាំងកំហឹងយ៉ាងខ្លាំងជុំវិញតម្លៃនៃការរស់នៅ និងវិសមភាព។
លោកប្រធានាធិបតី Sebastián Piñera បានការពារចំពោះវិធានការឆ្លើយតបរបស់រដ្ឋាភិបាលលើក្រុមបាតុករ។
លោកថ្លែងថា “ខ្ញុំជឿជាក់ថា ប្រជាធិបតេយ្យមិនត្រឹមតែជាការមានសិទ្ធិប៉ុណ្ណោះទេ តែវាមានកាតព្វកិច្ចក្នុងការពារខ្លួនឯង តាមរយៈការប្រើប្រាស់អ្វីៗទាំងអស់ ដែលផ្តល់ដោយប្រជាធិបតេយ្យ និងនីតិរដ្ឋ ក្នុងការប្រយុទ្ធប្រឆាំងនឹងជនទាំងឡាយណា ដែលចង់បំផ្លាញប្រជាធិបតេយ្យ”។
ការតវ៉ានៅតែបន្តផ្ទុះឡើងទូទាំងប្រទេស បើទោះបីជាមានការប្រកាសអាសន្ននៅក្នុងតំបន់ចំនួន ៥ដោយប្រធានាធិបតី Sebastián Piñera។ ក្រោយប្រកាសដាក់តំបន់ ៥ក្នុងគ្រោះអាសន្ន អាជ្ញាធរបានរឹតត្បិតសេរីភាពនៃការបម្លាស់ទី និងសិទ្ធិប្រមូលផ្តុំរបស់ក្រុមបាតុករ។
សូនបញ្ជាក់ថា កាលពីថ្ងៃអាទិត្យម្សិលមិញនេះ ការលួចប្លន់ និងការលួចដុតនៅតែបន្តកើត ហើយក្រុមអ្នកតវ៉ាបានធ្វើការដុតរថយន្តក្រុងជាច្រើនគ្រឿង និងបានបំផ្លាញស្ថានីយ៍រថភ្លើងក្រោមដី និងបានប៉ះទង្គិចជាមួយប៉ូលីស៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC