អាជ្ញាធរអេហ្សីបបានដាក់បង្ហាញមឈូសឈើបុរាណចំនួន ៣០ដែលមានអាយុកាលរាប់ពាន់ឆ្នាំ។ មឈូស ទាំងនោះត្រូវបានស្រាវជ្រាវរកឃើញនៅទីក្រុង Luxor ប៉ែកខាងកើតនៃទន្លេនីល ហើយក្នុងមឈូសមានសាកសពអប់។
លោក Mostafa Waziri អគ្គលេខានៃឧត្តមក្រុមប្រឹក្សាវត្ថុបុរាណអេហ្សីប បានថ្លែងប្រាប់អ្នកសារព័ត៌មានថា ការរកឃើញមឈូសទាំងនោះ គឺជាការរកឃើញដ៏ធំបំផុតរបស់ប្រទេសអេហ្សីប ក្នុងរយៈពេលមួយសតវត្សរ៍ចុងក្រោយនេះ។
វាគឺជាការរកឃើញមឈូសដោយក្រុមបេសកកម្មអេហ្សីបផ្ទាល់តែម្តង ក្រោយពេលមានការរុករកជាច្រើនឆ្នាំ ដែលដឹកនាំដោយក្រុមបុរាណវិទូបរទេស។
លោកនិយាយថា “ការរកឃើញចុងក្រោយគឺក្នុងឆ្នាំ ១៨៩១ ដែលជាការរកឃើញដោយក្រុមបរទេស ចំណែកការរកឃើញមឈូសបុរាណក្នុងឆ្នាំ ១៨៨១ ក៏ត្រូវរកឃើញដោយបរទេសដែរ ប៉ុន្តែការរកឃើញក្នុងឆ្នាំ ២០១៩នេះ គឺជាការឃើញដោយអេហ្សីបផ្ទាល់។
រដ្ឋមន្រ្តីវត្ថុបុរាណអេហ្សី លោក Khaled El-Enany បានពណ៌នាមឈូសដែលមានអាយុកាល ៣០០០ឆ្នាំនោះថា វាត្រូវបានរក្សាទុកយ៉ាងល្អ និងមានពណ៌នៅយ៉ាងល្អ។
មឈូសបុរាណទាំងនោះ មានសាកសពអប់របស់បុរស និងស្រ្តី ព្រមទាំងកូនក្មេង ២នាក់ផងដែរ ដែលពួកគេជឿជាក់ថា សាកសពនៃមនុស្សទាំងនោះគឺមកពីឋានៈមនុស្សធម្យម៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN