ត្បូងឃ្មុំ៖ ប្រជាពលរដ្ឋដែលមានទំនាស់ដីធ្លីបាននាំគ្នាចុះដើរទៅតុលាការ ខេត្តត្បូងឃ្មុំ ដើម្បីទាមទារឲ្យតុលាការដោះលែងតំណាងរបស់ពួកគាត់ ដែលអាជ្ញាធរចាប់ខ្លួននិងឃុំខ្លួនដោយគ្មានកំហុស។
តំណាងប្រជាពលរដ្ឋបានលើកឡើងថា មូលហេតុដោយសារគាត់ដើរដោយថ្មើរជើងនេះ ដោយសារអាជ្ញាធរបានរារាំងពួកគាត់ មិនឲ្យជិះគោយន្ត ហើយពួកគាត់ក៏ សម្រេចចិត្តទុកគោយន្តចោល ហើយដើរដោយថ្មើរជើងតែម្ដង។
បើតាមហ្វេសប៊ុកព័ត៌មានសហគមន៍ដីធ្លីភូមិស្រែប្រាំងខេត្តត្បូងឃ្មុំ បានឲ្យដឹងថា នៅថ្ងៃទី ២១ ខែតុលា ឆ្នាំ២០១៩ ប្រជាពលរដ្ឋសហគមន៍ភូមិស្រែប្រាំង នឹងភូមិបុស្សស្នោរ ឃុំត្រពាំងព្រីង ស្រុកតំបែរ ខេត្តត្បូងឃ្មុំ បាននាំគ្មាទៅសាលាដំបូងខេត្តត្បូងឃ្មុំ (តុលាការ) ដើម្បីទាមទារឲ្យតុលាការដោះលែងតំណាងរបស់ពួកគាត់ ដែលត្រូវសមត្ថកិច្ចចាប់ខ្លួន ដោយគ្មានកំហុសនឹងមិនដឹងមូលហេតុ ហើយពួកគាត់ខ្លះទៀត ក៏ត្រូវចូលខ្លួនបំភ្លឺតាម ដីកាកោះហៅរបស់តុលាការផងដែរ ប៉ុន្តែពួកគាត់ត្រូវបានសមត្ថកិច្ចឃាត់ គោយន្តមិនឲ្យទៅ ទើបពួកគាត់សម្រេចចិត្តចុះដើរទៅតុលាការ៕ ដោយ៖កូឡាប
