ខេត្តស្វាយរៀង ៖ បុរសពីរនាក់់ត្រូវបានរន្ទះបាញ់ ស្លាប់ម្នាក់ និងរងរបួសធ្ងន់ ខណៈមេឃកំពុងភ្លៀងស្រិចៗ បាននាំគ្នាទៅដាក់ម៉ងយកត្រី ។
ករណីរន្ទះបាញ់ដ៏កំណាចនេះ បានកើតឡើងនៅម៉ោង២០និង៣០នាទីយប់ថ្ងៃទី២០ ខែតុលា ឆ្នាំ២០១៩ នៅចំណុចវាលស្រែ ស្ថិតក្នុងភូមិព្រៃតាធឹក ឃុំគគីសោម ស្រុកស្វាយទាប។
សមត្ថកិច្ចនគរបាលស្រុកស្វាយទាប បានឲ្យដឹងថា នៅមុនពេលកើតហេតុការណ៍នេះ ឡើងមានបុរសពីរបាន នាំគ្នាទៅដាក់ម៉ងយកត្រី នៅចំណុចក្នុងភូមិ ឃុំកើតហេតុខាងលើ ស្របពេលនោះមានភ្លៀងស្រិចៗស្រាប់តែមានផ្គរ រន្ទះ ផ្លេកបន្ទោលឆ្វេចឆ្វាចពេញផ្ទៃមេឃ ខណៈនោះរន្ទះបាញ់ដ៏កំណាចបានប្រហារជីវិតបុរសម្នាក់ភ្លាមៗ និងបុរសម្នាក់ទៀតរងរបួសធ្ងន់ នៅកណ្ដាលវាលស្រែបណ្តាល ត្រូវបានអ្នកភូមិជួយសង្គ្រោះ ដោយបានវះទ្រូងសត្វទារកាប៉ា សម្រក់ឈាមដាក់ទ្រូងជនរងគ្រោះ ដើម្បីធ្វើការជួយសង្គ្រោះបន្ទាន់ ។
សមត្ថកិច្ចបានបន្តថា ជនរងគ្រោះទី១ ឈ្មោះ ឡាយ សុភាព ភេទប្រុស អាយុ៣៦ឆ្នាំ មុខរបរកសិករ (ស្លាប់) និង២ ឈ្មោះ ចន ធៅ ភេទប្រុស អាយុ១៦ឆ្នាំ មុខរបរសិស្ស (របួសធ្ងន់) អ្នកទាំងពីរមានទីលំនៅភូមិឃុំកើតហេតុ ៕ដោយ៖ វ៉ៃកូ
