មានរឿងតំណាលតៗគ្នាជាច្រើនពីហាងស្រាបុរាណ The Griffin ទីក្រុង Wakefield មណ្ឌល Yorkshire ប្រទេសអង់គ្លេស ជាច្រើនឆ្នាំមកហើយ ។ ចំពោះអ្នកអរូបិយវិទ្យា Andrew Williamson បានឃ្លាំមើលមួយរយៈពេលវែង តែលោកពុំដែលបានឃើញនូវរឿងរ៉ាវសម្បូរបែបនៅទីនោះម្តងណាឡើយ រហូតដល់ពេលលោកឃើញស្រមោលខ្មៅ១ ក្នុងរូបថត ដែលលោកថតបានដោយផ្ទាល់ដៃ ។
ស្រមោលខ្មៅ បង្ហាញវត្តមាននៅពីមុខរូបថតព្យួរនៅជញ្ចាំង
អ្នកវិទ្យាសាស្ត្រវ័យ៥៤ឆ្នាំនោះ ឲ្យដឹងថា ស្រមោលខ្មៅដែលដើរកាត់ក្នុងរូបភាពនេះ មានរាងរៅស្រដៀងនឹងមនុស្សស្រីម្នាក់ ។ ប៉ុន្តែខណៈពេលលោកថតបានរូបនេះ ក្នុងហាងពុំមាននរណាម្នាក់ទេ ក្រៅពីរូបលោក ។
មុនពេលបានមើលរូបភាពនេះ ម្ចាស់ហាងលោក Michael Briggs អាយុ ២៩ឆ្នាំ ក៏ធ្លាប់ប្រទះឃើញហេតុការណ៍ចម្លែកៗ ក្នុងកាមេរ៉ាសុវត្ថិភាព ក្រោយពេលហាងរបស់លោកបិទទ្វារនាពេលយប់អាធ្រាត ។ Michael ឲ្យដឹងថា មានពេលខ្លះកែវក្នុងហាងដែលព្យួរបានធ្លាក់…សេរី ដោយពុំមានមូលហេតុ ។
ពេលខ្លះដប កែវ នៅរាយប៉ាយពេញហាង ទោះបីជាខណៈពេលនោះពុំមានទទួលភ្ញៀវទេ ។
អ្នកអរូបិយវិទ្យា Andrew ពុំត្រឹមឃើញស្រមោលខ្មៅប៉ុណ្ណោះទេ លោកតែងទទួលអារម្មណ៍ពីវត្តមានអ្វីមួយ ដែលអរូបិយ នៅហាងស្រាបុរាណនេះ។ ពេលខ្លះលោកបានប្រើប្រាស់ញ្ញាណទី៧ របស់ខ្លួនដើម្បីសំឡឹងមើលបាតុភូតដ៏ចម្លែកនេះ ។
ហាងស្រាបុរាណនេះ បង្កប់នូវរឿងរ៉ាវអាថ៌កំបាំងជាច្រើន
អ្នកអរូបិយវិទ្យា Andrew Williamson ទទួលអារម្មណ៍ថា មានរឿងចម្លែកក្នុងហាងស្រាបុរាណនេះ
