ខេត្តស្វាយរៀងៈ លោក ហែម ពិសិដ្ឋ អភិបាលរងខេត្តស្វាយរៀង តំណាងលោក ម៉ែន វិបុល អភិបាលខេត្ត និង លោក បេង ហុងសុជាតិខេមរ៉ូ អគ្គនាយក នៃអគ្គនាយកដ្ឋានលំនៅឋាន ក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃចន្ទ ទី២១ ខែតុលា ឆ្នាំ២០១៩នេះ បានអញ្ជើញជាអធិបតី នៅក្នុងពិធីចាប់ឆ្នោតទទួលលេខរៀងផ្ទះជូនគ្រួសារអតីតយុទ្ធជនជំហានទី២ស្ថិតនៅភូមិជីកដី ឃុំអណ្ដូងត្របែក ស្រុករមាសហែក ខេត្តស្វាយរៀង ។ ពិធីនេះបានប្រព្រឹត្តទៅនៅសាលប្រជុំសាលាខេត្តស្វាយរៀង។
មានប្រសាសន៍ទៅកាន់ពិធីនេះ លោក ហែម ពិសិដ្ឋ បានលើកឡើងថា តាមរយៈសុខសន្តិភាព ប្រទេសជាតិមានការអភិវឌ្ឍរីកចម្រើនជាបន្តបន្ទាប់ គួរជាទីមោទនភាព ។ រាជរដ្ឋាភិបាលតែងតែយកចិត្តទុក ដាក់ចំពោះសុខទុក្ខប្រជាជនទូទៅ ជាពិសេសគ្រួសារអតីតយុទ្ធជន និងនិវត្តជនដែលមានជីវភាពក្រីក្រ ។ ដោយការយកចិត្តទុកដាក់ពីរាជរដ្ឋាភិបាល បានរៀបចំកម្មវិធីចែកដី និងផ្ទះ ជូនគ្រួសារអតីតយុទ្ធជន និងនិវត្តជនក្រីក្រក្នុងជំហានទី១ ចំនួនចំនូន ២០០ ខ្នងផ្ទះ បានដោយជោគជ័យមានការកោតសរសើរពីរាជរដ្ឋាភិបាល និងមហាជនទូទៅ។
លោកអភិបាលរងខេត្តបានបន្តថា យើងបានធ្វើរួចហើយកាលជំហានទី១ ដោយសារមកពីការខិតខំ ប្រឹងប្រែងអស់ពីកម្លាំងកាយចិត្ត ពីក្រុមការងារ និងរដ្ឋបាលខេត្តស្វាយរៀង។ ហើយក្នុងជំហានទី២នេះ រាជរដ្ឋាភិបាលនឹងចែកដី និងផ្ទះ ចំនួន ២០០ ខ្នងបន្ថែមទៀតស្ថិតនៅក្នុងភូមិជីកដី ឃុំអណ្តូងត្របែក ស្រុករមាសហែក ជូនគ្រួសារអតីតយុទ្ធជន និងនិវត្តជនក្រីក្រដើម្បីជួយសម្រួលដល់ការលំបាករបស់ពួកគាត់ ។
លោក គឹម ពិសិដ្ឋ ប្រធានមន្ទីររផបចំដែនដី នគរូបនីយកម្ម សំណង់ និងសុរិយោដីខេត្ត បានបញ្ជាក់ថា ក្នុងជំហានទី២ ការសាងសង់ផ្ទះ ២០០ខ្នង លើផ្ទៃដីទំហំជាង ៩៨ហិកតា ស្ថិតនៅក្នុងភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង ដែលបានចាប់ដំណើរការសាង់សង់ចាប់ថ្ងៃទី ២៨ ខែមេសា ឆ្នាំ២០១៩ រហូតដល់បច្ចុប្បន្ន លទ្ធផលសម្រេចបានចំនួន ១០៧ខ្នងផ្ទះ ក្នុងនោះ ៖ – ផ្ទះចំនួន ៨៩ខ្នង បានសាងសង់រួច ១០០% – ផ្ទះចំនួន ១០ខ្នង បានឡើងគ្រោងដែក – ផ្ទះចំនួន ០៨ខ្នង បានជីកគ្រឹះចាក់សសរ។
ការសាងសង់ផ្ទះក្នុងជំហានទី២នេះ នឹងបញ្ចប់រួចរាល់ជាស្ថាពរ ក្នុងខែធ្នូ ឆ្នាំ២០១៩ នេះ ។
លោកស្រី គង់ គីណា ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា អានអនុក្រឹត្យលេខ ១៩ អន ប្រ.ក ចុះថ្ងៃទី១៩ ខែមីនា ឆ្នាំ២០០៣ ស្ដីពីសម្បទានដីសង្គមកិច្ច(អានជំពូកទី៥) និងគំរូកិច្ចសន្យាប្រគល់ និងទទួលយកដី និងផ្ទះ នៅភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង ។
លោក បេង ហុងសុជាតិខេមរ៉ូ អគ្គនាយក នៃអគ្គនាយកដ្ឋានលំនៅឋាន ក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា រាជរដ្ឋាភិបាល បានប្រគល់ដីសម្បទានសង្គមកិច្ច ទំហំ ៤០ម៉ែត្រ គុណ ៥០ម៉ែត្រ និងផ្ទះប៉ិតរចនាបថខ្មែរទំហំ ៦,៥ ម៉ែត្រ គុណ ៧,៣ ម៉ែត្រ ធ្វើពីសសរបេតុងអាម៉េ ផ្នែកខាងក្រោម និងផ្នែកខាងលើក្រាលស្មាបត ជញ្ជាំងស្មាបត ប្រក់ក្បឿង ជូនគ្រួសារអតីតយុទ្ធជន និងនិវត្តជនក្រីក្រ ។ ផ្ទះនេះកសាងឡើងតាមលក្ខណៈបច្ចេកទេសដែលមានភាពជន នឹងគ្រោះធម្មជាតិ(ខ្យល់កន្ត្រាក់) ។ ផ្អែកតាមលក្ខខណ្ឌ ក្រោយពីទទួលមានដី និងផ្ទះរួចហើយ ម្ចាស់ផ្ទះត្រូវទៅស្នាក់នៅឲ្យមានញឹកញាប់ ឬជាអចិន្ត្រៃយ៍ ព្រមទាំងមុនរយៈពេល៥ឆ្នាំ មិនអាចលក់ដូរ និងផ្ទេរកម្មសិទ្ធិជូនអ្នកផ្សេងបានឡើង ។ ត្រូវយកចិត្តទុកដាក់ក្នុងការ ដាំដំណាំរួមផ្សំ ដើម្បីបង្កើនជីវភាពគ្រួសារផងដែរ ៕ដោយ៖ វ៉ៃកូ
