ភ្នំពេញ៖ នាសៀល ថ្ងៃចន្ទ ទី២១ ខែតុលា ឆ្នាំ២០១៩ លោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ បានដឹកនាំកិច្ចប្រជុំគណៈកម្មការជាតិដើម្បីពិនិត្យបញ្ជីស្នើសុំបន្ធូរបន្ថយទោស និងលើកលែងទោស ដល់ទណ្ឌិត ក្នុងឱកាសបុណ្យអុំទូក បណ្តែតប្រទីប សំពះព្រះខែ និងអកអំបុក (តាំងតុ) លើបញ្ជីស្នើសុំបន្ធូរបន្ថយទោស និងលើកលែងទោសពីពន្ធនាគាររាជធានី-ខេត្ត ចំនួន២៣ និងពីមណ្ឌលអប់រំកែប្រែចំនួន ៤ ដោយមានទណ្ឌិតសរុប ៥១២ នាក់ (ស្រី ៥៨នាក់) នៅទីស្តីការក្រសួងយុត្តិធម៌។
លោក សុច សុផាន់ណារ៉ា អគ្គនាយករងនៃអគ្គនាយកដ្ឋានកិច្ចការអយ្យការ និងជាអនុប្រធានលេខាធិការដ្ឋាន ក្នុងការស្នើរសុំលើកលែងទោសបន្ធូរបន្ថយទោស បានបញ្ជាក់ថា ទណ្ឌិតចំនួន៥១២នាក់ ក្នុងចំណោមនោះមានស្ត្រីចំនួន៥៨នាក់នឹងត្រូវដោះលែង ក្នុងអំឡុងពិធីបុណ្យអុំទូកនាថ្ងៃទី១០ ដល់ថ្ងៃទី១២ ខែវិច្ឆិកា ឆ្នាំ២០១៩នេះ។
លោក សុច សុផាន់ណារ៉ា មានប្រសាសន៍ថាចំណោមអ្នកដែលដាក់ពាក្យស្នើរសុំបន្ធូរបន្ថយទោស និងលើកលែងទោស ទាំង៥១២នាក់នោះ គឺជាទណ្ឌិតដែលដែលជាប់ពន្ធនាគារនៅតាមខេត្ត និងរាជធានីចំនួន២៣ និងមណ្ឌលកែប្រែចំនួន៤។ លោកបន្តថាក្នុងចំណោមនោះ មានទណ្ឌិតជាជនបរទេស ដែលមានជនជាតិវៀតណាម ចិន និងជនជាតិដ៏ទៃទៀតប្រមាណពី១០ភាគរយទៅ១៥ភាគរយ។
បើតាម លោក សុច សុផាន់ណារ៉ា ទណ្ឌិតដែលស្នើរសុំបន្ធូរបន្ថយទោស រឺលើកលែងទោសត្រូវជាអ្នកទោសដែលមានការប្រកាសសាលក្រមស្ថាពររួចរាល់ ទើបអាចទទួលបានការលើកលែងពិសេសក្នុងពិធីបុណ្យជាតិខាងមុខ។
លោក សុច សុផាន់ណារ៉ា ឲ្យដឹងថាអ្នកទោសចំនួនប្រមាណជាជាង៣៤០០០នាក់ ដែលក្នុងនោះមានស្ត្រីជាង១០០០នាក់ កំពង់ជាប់ពន្ធនាគារក្នុងប្រទសកម្ពុជា។ ក្នុងចំណោមអ្នកទោសទាំងនោះមានអ្នកទោសជាជនជាតិបរទេសចំនួនជាង១០០០នាក់៕ ដោយ ៖ កូឡាប
