ខេត្តព្រះសីហនុ៖ មន្ត្រីរដ្ឋបាលក្រុង ព្រះសីហនុ បានឲ្យដឹងថា អាជ្ញាធរក្រុង បានចុះសហការជាមួយ មន្ត្រីមូលដ្ឋានសង្កាត់លេខ២ ដើម្បីរៀបចំសណ្តាប់ធ្លាប់តាមផ្លូវសាធារណៈមួយចំនួន ដើម្បីរក្សាសោភ័ណ្ឌភាពក្រុងទេសចរណ៍មួយនេះ ឲ្យមានរបៀបរៀបរយល្អ។
តំណាងឲ្យរដ្ឋបាលសាលាក្រុងព្រះសីហនុ លោក លឹម ភត្រី បញ្ញាក់ថា សកម្មភាពខាងលើនេះ បានចាប់ផ្តើមកាលពីរសៀលថ្ងៃចន្ទ ទី២១ ខែតុលា ឆ្នាំ២០១៩នេះ។
លោក ភត្រី បន្តថា ការងារចុះរៀបចំសណ្តាប៎ធ្នាប់សាធារណៈនេះ គឺអាជ្ញាធរក្រុងព្រះសីហនុ បានចុះសហការជាមួយ អាជ្ញាធរសង្កាត់លេខ២ ដឹកនាំដោយលោកចៅសង្កាត់ផ្ទាល់ ដោយបានចុះរៀបចំសណ្តាប់ធ្នាប់នេះ ចាប់ពីមុខមន្ទីរទេសចរណ៍ រហូតដល់មុខផ្សារពាណិជ្ជកម្ម និងមុខអតីតមន្ទីរគមនាគមន៍ ស្ថិតក្នុងសង្កាត់២ ក្រុង-ខេត្តព្រះសីហនុ។
លោក លឹម ភត្រី បន្តថា ទីតាំង របស់ប្រជាពលរដ្ឋមួយចំនួន ដែលប៉ះពាល់ដល់សណ្តាប់ធ្នាប់ ឬផ្លូវសាធារណៈ ត្រូវបានអាជ្ញាធរធ្វើការអប់រំ ឲ្យរុះរើដោយខ្លួនឯង និងទុករយៈពេល៣ថ្ងៃ ចាប់ពីថ្ងៃធ្វើកិច្ចសន្យា ឬចាប់ពីថ្ងៃធ្វើការអប់រំតទៅ។
មន្ត្រីរដ្ឋបាលក្រុងព្រះសីហនុ ឲ្យដឹងដូច្នេះ រួចបញ្ជាក់ថា ចំពោះសណ្តាប់ធ្នាប់នៅមុខផ្សារពាណិជ្ជកម្ម គឺអាជ្ញាធរ មានវិធានការក្តៅ ដោយបានចាប់យកម៉ូតូចតគ្មានសណ្តាប់ធ្នាប់ ឬចតលើផ្លូវសាធារណៈ អនាធិបតេយ្យចំនួន៦គ្រឿង យកទៅរក្សាទុកនៅសាលាក្រុងព្រះសីហនុ ដើម្បីអប់រំ ម្ចាស់ និងផាកពិន័យតសមច្បាប់កំណត់។
បន្ថែមលើនេះ អាជ្ញាធរក៏បានបន្តចុះស្ទូចរថយន្ត ១គ្រឿងទៀត ដែលម្ចាស់ចតចោល នៅលើផ្លូវសាធារណៈ ត្រង់ចំណយចជាប់របងសួនច្បារអតីតមហោស្រព ដឹកយកទៅរក្សាទុកនៅសាលាក្រុងព្រះសីហនុ ដើម្បីបន្តនីតិវិធីច្បាប់។
ផ្តើមពីបញ្ហានេះ មន្ត្រីរដ្ឋបាលសាលាក្រុងព្រះសីហនុ បានអំពាវនាវដល់ប្រជាពលរដ្ឋ នុងធាជីវករទូទៅ ឲ្យងាកមកចូលរួមរក្សាសណ្តាប់ធ្នាប់សាធារណៈ និងអនាម័យបរិស្ថាន ឲ្យបានទាំងអស់គ្នា ប្រយោជន៍ដើម្បីលើកកិត្តយស ឬមុខមាត់ក្រុងទេសចរណ៍មួយនេះ ឲ្យមានរបៀបរៀបរយល្អ និងមានសោភ័ណ្ឌគួរជាទីទាក់ទាញថែមទៀត នាថ្ងៃអនាគត៕ ដោយ៖ ដែន សីមា
